މިނިސްޓްރީ އޮފް އިކޮނޮމިކް ޑިވޮލޮޕްމަންޓުގެ ރަޖިސްޓަރަރ އޮފް ކޮމްޕެނީޒްއަށް ލިބިފައިވާ ބާރުގެ ދަށުން އަހަރީ ފީ ނުދައްކާ 19 ކުންފުންޏެއް އުވާލަން ނިންމައިފިއެވެ.

އާދިއްތަ ދުވަހު އިކޮނޮމިކް މިނިސްޓްރީން ކުރި އިޢުލާނެއްގައި ބުނީ، އާންމު ކޮށްފައިވާ 19 ކުންފުންޏަކީވެސް "ކުންފުނި އުވައިލުމަށް ރެޖިސްޓްރަރ އޮފް ކޮމްޕެނީޒް ކަނޑައަޅައި އުވައިލުމުގައި އަމަލުކުރާނެ ގޮތުގެ ޤަވައިދު" ގެ ދަށުން އަހަރީ ފީ ދައްކާފައިނުވާތީ އުވައިލުމަށް ކަނޑައަޅާފައިވާ ކުންފުނިތަކުގެ ތެރެއިން 2017 އިން 2018 ގެ ނިޔަލަށް މިނިސްޓްރީގައި ރަޖިސްޓަރީކޮށްފައިވާ ކުންފުނިތައް ކަމަށެވެ.

އޭގެ އިތުރުން، އާންމު ކޮށްފައިވާ 19 ކުންފުނީގެ ތެރެއިން އެއްވެސް ކުންފުންޏެއް އަލުން ހިންގަން ކުންފުނީގެ ވެރިން ބޭނުންވާނަމަ އެކުންފުންޏަކުން ފުރިހަމަކުރަންޖެހޭ އެންމެހައި ކަންކަން 03 ޑިސެމްބަރ 2019 ގެ ކުރިން ފުރިހަމަކުރުމަށްފަހު އެކަން އަންގައިދޭ ލިޔެކިޔުންތަކާއިއެކު ހުށައެޅުމަށާއި، ކުންފުނި ހިންގަން ބޭނުންވާކަން އަންގައިދިނުމަށްޓަކައި ކުންފުނީގެ ޑިރެކްޓަރުންގެ ބޯޑުގެ ޤަރާރެއް ފާސްކޮށްފައި ހުށައެޅުމަށްވެސް އިޢުލާނުގައި ބުނެފައިވެއެވެ.

އޭގެ ތެރެއިން އެއްވެސް ކުންފުންޏެއްގެ މައްޗަށް އެއްވެސް ދަރަންޏެއް ނުވަތަ ދަޢުވާއެއް އޮތްނަމަ އެކަމާގުޅޭ ތަފުޞީލުތައް 03 ޑިސެމްބަރ 2019 ގެ ކުރިން ހުށައެޅުމަށްވެސް މިނިސްޓްރީގެ އިޢުލާނުގައި ބުނެފައިވެއެވެ.

ކުންފުންޏާބެހޭ ޤާނޫނުގެ ދަށުން ރަޖިސްޓްރީ ކޮށްފައިވާ ކުންފުނިތައް އުވާލެވޭ 3 ގޮތެއް އޮވެއެވެ. އެއީ ކުންފުނި އުވާލުމަށް އެ ކުންފުންޏަކުން އަމިއްލައަށް ކަނޑައެޅުމާއި، ކުންފުނި އުވާލުމަށް ކޯޓަކުން އަމުރެއް ނެރުމާއި، ކުންފުނި އުވާލުމަށް ރެޖިސްޓްރަރ އޮފް ކޮމްޕެނީޒް ނިންމެވުމެވެ.