ރިހިބެލިޓޭޝަން ފުރުސަތު ނުލިބި ތިބި ވަރަށް ގިނަ އަދަދެއްގެ ބަޔަކު އެބަތިބި ކަމަށާއި، އެފަރާތްތަކަށް އެފުރުސަތު ފަހިކޮށްދިނުމަށް މަސައްކަތް ކުރަމުންދާ ކަމަށް ޖެންޑަރ މިނިސްޓަރު ޝިދާތާ ޝަރީފް ވިދާޅުވެއްޖެއެވެ.

ރައީސް އިބްރާހިމް މުހައްމަދު ސޯލިހުގެ ސަރުކާރަށް އެއްއަހަރު ފުރުމާ ގުޅިގެން ރާއްޖެޓީވީން ގެނެސްދޭ ލައިވް ކަވަރޭޖްގައި ވާހަކަފުޅު ދައްކަވަމުން މިނިސްޓަރ ޝިދާތާ ވިދާޅުވީ ރިހިބެލިޓޭޝަން ފުރުސަތު ބޭނުންވާ ގިނަ ބަޔަކު އެބަތިބި ކަމަށެވެ.

އެފަރާތްތަކަށް ފުރުސަތުތައް ހޯދިނުމުގެ ގޮތުން މިޚިދުމަތްތައް ދިނުމަށް ޕްރައިވެޓް އިންސިޓިއުޝަންތަކަށް ހުއްދަ ދެމުންދާ ކަމަށާއި، މިޚިދުމަތްތަކާއެކު މަސައްކަތް ކުރުމުގެ ފުރުސަތުތައް ހުޅުވާލާފައިވާ ކަމަށް މިނިސްޓަރ ވިދާޅުވިއެވެ. އަދި ވިދާޅުވީ ކޮމިއުނިޓީ ސަރވިސްއާއި، ކުރީގެ ހިންގަމުންދިޔަ ޕްރޮގްރާމެއް ކަމަށްވާ މެތަޑޯން ޕްރޮގްރާމް އިތުރު ފުރިހަމަ ކަމަކާއެކު ފަށައިގެން ކުރިއަށް ގެންދިއުމަށް މަސައްކަތް ކުރާ ކަމަށެވެ.

މިނިސްޓަރު ޝިދާތާ ވިދާޅުވީ ރާއްޖޭގައި މަސްތުވާތަކެތީގެ މައްސަލައަކީ ވަރަށް ބޮޑު މައްސަލައެއް ކަމަށާއި، ގިނަ އަދދެއްދެ ޒުވާނުން މަސްތުވާތަކެތީގެ ޝިކާރައަކަށްވެފައިވާކަމަށެވެ. މަސްތުވާތަކެތީގެ މައްސަލައަށް ޖުމްލަ ހައްލެއް ހޯދުމަށް ސަރުކާރުން ކުރަމުންދާ މަސައްކަތްތަކުގެ ތެރެއިން ރާއްޖޭގައި ޑްރަގް ރިހިބެލެޓޭޝަން ތިން ސެންޓަރެއް ޤާއިމުކޮށްފައިވާ ކަން މިނިސްޓަރ ފާހަގަކުރެއްވިއެވެ.