އެންމެ ލަސްވެގެން އަންނަ އަހަރުގެ ޖޫން މަހު، ރާއްޖެއަށް ކޮމަންވެލްތުގެ މެމްބަރުކަން ލިބޭނެކަމުގެ ފުރިހަމަ ޔަޤީންކަން އެބައޮތް ކަމަށް މިނިސްޓްރީ އޮފް ފޮރިން އެފެއަރޒްގެ ފޮރިން ސެކްރެޓަރީ ޢަބްދުލް ޣަފޫރު މޫސާ ވިދާޅުވެއްޖެއެވެ.
ޣަފޫރު މިހެން ވިދާޅުވީ ރާއްޖެ ޓީވީގެ "ފަލަސުރުޚީ" ޕްރޮގުރާމުގައި ވާހަކަދައްކަވަމުންނެވެ. ޢަފޫރު ވިދާޅުވީ ކޮމަންވެލްތުގައި ބައިވެރިވުމުގެ މަސައްކަތް ރައީސް އިބްރާހިމް މުޙައްމަދު ޞާލިޙު ސަރުކާރާއި ޙަވާލުވެވަޑައިގެންނެވި ފުރަތަމަ ހަފުތާގެ ތެރޭގައި ފެއްޓެވިކަމަށެވެ. އެގޮތުން ކޮމަންވެލްތުގެ މެމްބަރޝިޕް އަލުން ރާއްޖެއަށް ދިނުމަށްޓަކައި ކޮމަންވެލްތުގެ ޓީމެއް ދެ ފަހަރެއްގެ މަތިން ރާއްޖެ އައިސް ރާއްޖޭގެ ޙާލަތު ބަލާފައިވާކަމަށެވެ. އަދި އަލުން ރާއްޖެއަށް މެމްބަރޝިޕް ދިނުމަށްޓަކައި ކެނަޑާ، އޮސްޓްރޭލިއާ އަދި އިންޑިއާ ފަދަ ބޮޑެތި ޤައުމުތަކުގެ ތާއީދުވެސް ލިބިފައިވާކަން ޢަފޫރު ފާހަގަކުރެއްވިއެވެ.
ޢަފޫރު ވިދާޅުވީ ކޮމަންވެލްތުގެ މެމްބަރޝިޕް ރާއްޖެއަށް ލިބުން ލަސްވެދާނެ ކަމަށް ޤަބޫލު ނުކުރައްވާކަމަށާއި އެންމެ ލަސްވެގެންވެސް އަންނަ އަހަރު ރުވާންޑާގައި އޮންނަ ކޮމަންވެލްތުގެ އެންމެ އިސްވެރިންގެ ބައްދަލުވުމުގައި ރާއްޖެއަށް މެމްބަރޝިޕް ލިބިގެންދާނެ ކަމުގެ ޔަޤީންކަން އެބައޮތްކަމަށެވެ.
ޣަފޫރު ވިދާޅުވީ ކޮމަންވެލްތު ފަދަ ޖަމާޢަތްތަކުން ރާއްޖެ ފަދަ ކުދި ޤައުމުތަކަށް އިސްކަން ދޭ ކަމަށެވެ. އެގޮތުން ކުދި ޤައުމުތަކަށް އިޤްތިޞާދީ ގޮތުންނާއި އިޖްތިމާޢީ މައްސަލަތަކުގައި އެހީތެރިކަން ފޯރުކޮށްދޭ ކަމަށެވެ. އަދި ކުދި ޤައުމުތަކަށް ފަންނީ ގޮތުން އެހީ ތެރިކަން ފޯރުކޮށްދިނުމަށް ކޮމަންވެލްތުން ޚާއްޞަ އަހަމިއްޔަތުކަމެއް ދެމުން އަންނަކަން ޣަފޫރު ފާހަގަ ކުރެއްވިއެވެ.
ކުދި ޤައުމުތަކަށް ކޮމަންވެލްތުން އިސްކަމެއް ދޭ ކަން ފާހަގަ ކުރައްވާ ޣަފޫރު ވިދާޅުވީ ރާއްޖެއަށް ވެސް ކޮމަންވެލްތުން އެހީތަކެއް ފޯރުކޮށްދިން ކަމަށެވެ.
މިހުރިހާ ކަމަކުން ރާއްޖެއަށް ފައިދާތަކެއް ލިބޭ. އަޅުގަނޑުމެންގެ ވަރަށް ގިނަ، އަޅުގަނޑުމެންގެ ޖީލުގެ ވަރަށް ގިނަ ބަޔަކަށް ތަމްރީނުތަކެއް ލިބިގެންދިޔަ ސީއެފްޓީސީގެ ތެރެއިން، ކޮމަންވެލްތް ފަންޑް ފޯ ޓެކްނިކަލް ކޯޕަރޭޝަންގެ ތެރެއިން އަދި ކޮމަންވެލްތުގެ ގައުމުތަކުން ފަހިކޮށްދޭ އެތައް ސްކޮލަރޝިޕްތަކެއް ކޮމަންވެލްތުގެ މެމްބަރުންނަށް ވީތީ. ކޮމަންވެލްތުގެ މެމްބަރުންނަށް ވީތީ އެކި ގައުމުތަކާއި އޮންނަ ބައިލެޓެރަލް ރިލޭޝަންސްވެސް އިތުރަށް ސްޓްރެންތްން ވެގެންދޭ. އަޅުގަނޑުމެން ބައިނަލްއަގްވާމީ މުޖުތަމައުގައި ވަކާލާތުކުރަމުންދާއިރުގައި ކޮމަންވެލްތުގެ އެހީތެރިކަން ލިބޭމިނިސްޓްރީ އޮފް ފޮރިން އެފެއަރޒްގެ ފޮރިން ސެކެޓްރީ އަބްދުލް ޣަފޫރު މޫސާ
ކޮމަންވެލްތުގެ މެމްބަރު ޤައުމެއްގެ ގޮތުގައި ރާއްޖެ އޮތުމަކީ ރާއްޖެއަށް އެކި ގޮތްގޮތުން ފައިދާ ކުރާނެ ކަމެއްކަން ފާހަގަކުރައްވާ ޣަފޫރު ވިދާޅުވީ ކޮމަންވެލްތުގެ މެމްބަރު ޤައުމެއްގެ ގޮތުގައި ރާއްޖެ އޮވެގެން ލިބޭ ގެއްލުމަށް ވުރެ ފައިދާތައް އިތުރުކަމަށް ޤަބޫލުކުރައްވާކަމަށެވެ.
ކުރީ ސަރުކާރުގައި ރާއްޖެ ކޮމަންވެލްތުން ވަކިވި ސަބަބުތަކަށް އިޝާރާތް ކުރައްވާ ޣަފޫރު ވިދާޅުވީ ކޮމަންވެލްތުން ވަކި ވުމަކީ ރާއްޖެއަށް ގެއްލުންތަކެއް ވީ ކަމެއް ކަމަށެވެ. އަދި އަލުން އަނބުރާ މެމްބަރު ޤައުމަކަށް ރާއްޖެ ވެގެން ދިއުމަކީ ލިބޭ ވަރަށް ބޮޑު ކުރިއެރުމެއް ކަން ފާހަގަކުރައްވައި، އެ ގެއްލުނު ފުރުޞަތުތަކަކީ އަލުން އިއާދަވާނޭ ކަމެއްގެ ގޮތުގައި ޣަފޫރު ސިފަކުރެއްވިއެވެ.
ދިވެހިރާއްޖެއިން ކޮމަންވެލްތުގައި ފުރަތަމަ ބައިވެރިވެފައިވަނީ 9 ޖުލައި 1982 ގައެވެ. އަދި ކޮމަންވެލްތުން ވަކި ވެފައިވަނީ 13 އޮކްޓޫބަރު 2016 ގައި ކުރީގެ ރައީސް ޢަބްދުﷲ ޔާމީނުގެ ސަރުކާރުގައެވެ. ކޮމަންވެލްތުން ވަކިވާން ރައީސް ޔާމީނުގެ ސަރުކާރުގައި ނިންމާފައިވަނީ ރާއްޖޭގެ ދާޚިލީ ކަންކަމުގެ ތެރެއަށް ކޮމަންވެލްތުންކަމަށް ބުނެއެވެ.
