ލާމަރުކަޒީ ގާނޫނަށް ގެނެވޭ ބަދަލާއެކު ކައުންސިލްތަކަށް ދޭ ފައިސާ ދިނުމުގެ ކުރިން، ހަރުދަނާ އުސޫލުތަކެއް އެކަށައަޅަން ޖެހޭ ކަމަށް އޮޑިޓަރ ޖެނެރަލް ހަސަން ޒިޔަތު ވިދާޅުވެއްޖެއެވެ.

ބުދަ ދުވަހުގެ ރޭ ބޭއްވި ބަޖެޓު ދިރާސާ ކޮމިޓީގައި ވާހަކަފުޅު ދައްކަވަމުން ޒިޔަތު ވިދާޅުވީ، ހަގީގީ މާނައިގައި ލާމަރުކަޒު ކުރެވޭނީ ކައުންސިލްތަކަށް މާލީ މިނިވަންކަން ދީގެން ކަމަށް ގަބޫލުފުޅު ކުރައްވާ ކަމަށެވެ. ނަމަވެސް، ކައުންސިލްތަކަށް މާލީ މިނިވަންކަން ދިނުމުގެ ކުރިން ކައުންސިލްތަކުން އެ ފައިސާ ހަރަދުކުރަނީ ކިހިނެއްތޯ ބެލުމަށް ހަރުދަނާ އުސޫލުތަކެއް އެކުލަވާލަން ޖެހޭ ކަމަށް ޒިޔަތު ވިދާޅުވިއެވެ.

ޒިޔަތު އިތުރަށް ވިދާޅުވި ގޮތުގައި، ބައެއް ފަހަރު ކައުންސިލްތަކުން ކޮންމެ އަހަރަކު ހުށައަޅަން ޖެހޭ މާލީ ބަޔާން ވެސް ހުށައަޅާފައި ނުވެއެވެ. އަދި ކައުންސިލްތަކަށް ފައިސާ ދިނުމުގެ ކުރިން، މާލީ ބަޔާން ހުށައެޅުން ކަށަވަރުން ކުރަން ޖެހޭ ކަމަށް އޭނާ ވިދާޅުވިއެވެ.

ކައުންސިލްތަކުން ހަރަދުކުރާ ފައިސާ ހަރަދުކުރަނީ ދައުލަތުގެ މާލިއްޔަތު ގަވައިދާ އެއްގޮތަށް ކަން ކަށަވަރު ކުރުމަށް ހަރުދަނާ އުސޫލުތަކެއް ގާއިމްކުރުމަށް ސަމާލުކަން ދޭންޖެހޭ ކަމަށްވެސް ޒިޔަތު ވިދާޅުވިއެވެ. އޮޓިޓަރ ޖެނެރަލް އޮފީހުގެ އަމާޒަކީ ކޮންމެ އަހަރަކު އެއް ފަހަރު ހުރިހާ ކައުންސިލްތަކެއް އޮޑިޓްކޮށް ނިންމުމެވެ.

އޮޑިޓަރ ޖެނެރަލް ވަނީ ދައުލަތުން މާލީ ބުރައެއް އުފުލަން ޖެހޭ ހުރިހާ އެއްބަސްވުންތަކަކާއި ގުޅޭ މައުލޫމާތު އެ އޮފީހާ ހިއްސާކުރުމަށް ވެސް އެދިފައެވެ. އެއްބަސްވުންތަކާ ބެހޭ މައުލޫމާތު ހިއްސާކުރުމުން ކައުންސިލްތައް އޮޑިޓް ކުރުމަށް ފަސޭހަވެގެންދާނެ ކަމަށްވެސް ޒިޔަތު ވިދާޅުވިއެވެ.

އަންނަ އަހަރުގެ ބަޖެޓުގައި ވަނީ ކޮންމެ ކައުންސިލަކަށް ވަނީ ބްލޮކް ގްރާންޓްގެ ގޮތުގައި ފަސް މިލިއަން ރުފިޔާއާ ހަ މިލިއަން ރުފިޔާއާ ދޭތެރޭގެ އަދަދަކަށް ފައިސާ ދިނުމަށް ހަމަޖެހިފައެވެ. އަދި ލާމަރުކާޒީ ގާނޫނު ފާސްވެ ތަންފީޒުކުރެވޭ ހިސާބުން ކައުންސިލްތަކުގެ އިހްތިސާސްގެ ދަށުގައިވާ ތަންތަނުން ލިބޭ ފައިސާވެސް ކައުންސިލަތަކަށް ލިބޭނެއެވެ.