އަންނަ އަހަރަށް ލަފާކުރާ ދައުލަތުގެ ބަޖެޓު އެކުލަވާލާފައިވާނީ އެއްވެސް ތަފާތު ކުރުމެއް ނެތި ހުރިހާ ރަށެއްވެސް ހިމެނޭހެން ޕީ.އެސް.އައި.ޕީ ޕްރޮގްރާމްތައް ހިންގޭނެ ގޮތަށްކަމަށް ފިނޭންސް މިނިސްޓަރ އިބްރާހީމް އަމީރު ވިދާޅުވެއްޖެ އެވެ.

އަންނަ އަހަރަށް ލަފާކުރާ ދައުލަތަށް ބަޖެޓަށް ބަހުސްކުރައްވަމުން މެމްބަރުން ދެއްކެވި ވާހަކަފުޅަށް ޖަވާބު ދެއްވުމަށް ލިބިވަޑައިގެންނެވި ފުރުސަތުގައި މިނިސްޓަރ ވިދާޅުވީ 2020 ވަނަ އަހަރުގެ ބަޖެޓް އެކުލަވާލާފައިވަނީ މިސަރުކާރުގެ މެނިފެސްޓޯއަށް ބަލައިގެން ވެފައިވާ ވައުދުތައް ފުއްދޭނެ ގޮތަށްކަމަށެވެ. މިނިސްޓަރ ވިދާޅުވީ ސަރޕްލަސް ބަޖެޓެއްގެ ވާހަކަ ދައްކާއިރު ރައްޔިތުންގެ ހާލަތު އެނގެންޖެހޭ ކަމަށާއި ރާއްޖޭގެ ގިނަ ރަށްރަށަކީ އަސާސީ ހިދުމަތްތައްވެސް ގާއިމުވެފައި ނެތް ރަށްރަށް ކަމަށެވެ.

އެހެންކަމުން ބަޖެޓް ބެލެންސްކޮށްގެން ހިންގައިގެން ތަރައްޤީ ގެނެވެންނެތް ކަމަށާއި ބަޖެޓް ހުށަހަޅާފައިވާނީ އެކްސްޕޭންޝަނަރީ ފިސްކަލް ޕޮލިސީއެއްގެ ދަށުންކަމަށް މިނިސްޓަރ ވިދާޅުވި އެވެ.

މީގެއިތުރުން މިނިސްޓަރ ވިދާޅުވީ ބަޖެޓް އެކުލަވާލުމުގައި އެކްސްޗޭންޖް ރޭޓަށް ވީހާވެސް ކުޑަކޮށް ލޮޅުން އަރާނެ ގޮތަކަށް ވިސްނާފައިވާނެ ކަމަށެވެ. ޑޮލަރު ރޭޓް 15.42 ގައި ހުންނަ އިރު މިދިޔަ އަހަރު އެކްސްޗޭންޖް ރޭޓް ގާތްގަޑަކަށް ހުރީ ދެ އިންސައްތައިގެ ޕްރިމިޔަމް އެއްގައި ކަމަށް މިނިސްޓަރ ވިދާޅުވި އެވެ. އަދި ބަޖެޓް ފައިނޭންސް ކުރުމަށް މިހާރު ބަޖެޓްގައި ހުރި ގޮތްތަކުން އެކްސްޗޭންޖް ރޭޓަށް އެއްވެސް ނުރައްކަލެއް ނެތް ކަމަށް މިނިސްޓަރ ވިދާޅުވި އެވެ.

މިނިސްޓަރ ވިދާޅުވީ ޕީއެސްއައިޕީ ޕްރޮޖްކެޓްތައް ހިންގުމަށް ހަމަޖައްސާފައިވާނީ ޕްރޮޖެކްޓް ލޯނުންކަމަށެވެ. އެއީ ބޭރުގެ ފަންޑިން އެޖެންސީ ތަކުން ޕްރޮޖެކްޓް ލޯންގެ ގޮތުގައި ލިބިފައި ހުރި ޕްރޮޖެކްޓްތައް ކަމަށާއި އެހެންކަމުން ރާއްޖޭގައި ހިންގޭ ބޮޑެތި ޕަބްލިކް ސެކްޓަރ އިންވެސްޓްމަންޓް ޕްރޮގްރާމް ހިންގާނީ ރާއްޖޭގެ ބޭރުގެ ފަރާތްތަކުން ބޭރުގެ ފަންޑިން ހަމަޖެހިގެންކަން މިނިސްޓަރ ފާހަގަކުރެއްވި އެވެ.

މިނިސްޓަރ ވިދާޅުވީ ބަޖެޓް ފައިނޭންސަށް ބޭރުން ދަރަނި ނެގިޔަސް އެނިގެންގެންދާނީ އިތުރު އިގްތިޞާދީ ހަރަކާތްތަކެއް ހިންގުމަށްކަމަށެވެ. އެހެންކަމުން ކުރިޔަށް އޮތްތާންގައި އިތުރު ކެޕިޓަލް ހަރަދުކުރެވިގެން އޭގެން އިގްތިޞާދީ ކުރިއެރުން ލިބިގެންދާނެކަމަށް މިނިސްޓަރ ވިދާޅުވި އެވެ.

އަންނަ އަހަރަށް ލަފާކުރާ ދައުލަތުގެ ބަޖެޓްގެ ޖުމްލަ އަދަދަކީ 37.5 ބިލިއަން ރުފިޔާ އެވެ. އަންނަ އަހަރު ހަރަދުގެ ގޮތުގައި ހިނގާނެ ކަމަށް އަންދާޒާކޮށްފައިވަނީ 35.6 ބިލިއަން ރުފިޔާ އެވެ. އަންނަ އަހަރު ޖުމްލަ އާމްދަނީ އާއި ހިލޭ އެހީގެ ގޮތުގައި ލިބޭނެކަމަށް ލަފާކޮށްފައިވަނީ 29.9 ބިލިއަން ރުފިޔާ އެވެ.