އެޗްވަންއެންވަން އަށް ޕޮޒިޓިވް ވެފައިވާ މީހުންގެ އަދަދު 82 އަށް އަރައިފިއެވެ.

އެޗްޕީއޭ އިން އާންމުކޮށްފައިވާ ތަފާސްހިސާބުތަކަށް ބަލާއިރު ބައްޔަށް ޝައްކުކުރެވޭ 279 މީހަކު ވަނީ އެޗްވަންއެންވަން އަށް ޓެސްޓުކޮށްފައެވެ. މީގެ ތެރެއިން 82 މީހަކު އެޗްވަންއެންވަން އަށް ޕޮޒިޓިވް ވެފައިވާކަމަށް އެ އެތޯރިޓީ އިން އާންމުކޮށްފައިވާ ތަފާސްހިސާބުތައް ދައްކައެެވެ.

ރާއްޖޭގައި ހަލުވިކަމާއެކު ފެތުރެމުންދާ ހުން އަދި އަރިދަފުސްރޯގާ އާއި އެޗްވަންއެންވަން އަށް ފަރުވާ ހޯދުމަށް ހާއްސަ ފްލޫ ކްލިނިކްތަކެއް ވަނީ ގާއިމްކޮށްފައިވާއިރު، މި ރޯގާ ހަލުއިކަމާއިއެކު، މާލޭގެ އިތުރުން އަތޮޅުތެރޭގައިވެސް ދަނީ ފެންނަމުންނެވެ.

ރޯގާ އާއި ގުޅިގެން އެކުލަވާލާފައިވާ ޓާސްކު ފޯހުން ބުދަދުވަހު ބުނެފައިވަނީ، އެޗްވަންއެންވަން އަށް ޕޮޒިޓިވް ވާ ބަލިމީހުންގެ އަދަދު އަދިވެސް އިތުރުވާނެކަމަށެވެ.

އެޗްޕީއޭއިން ރޯގާގޭ ހާލަތާއި ގުޅޭގޮތުން ބުދަ ދުވަހުގެރޭ ނެރުނު ބަޔާނެއްގައި ބުނެފައިވަނީ، ބަލި ކޮންޓްރޯލްކުރުމަށް ހެލްތުމިނިސްޓްރީން ގިނަ ފިޔަވަޅުތަކެއް އަޅަން ފަށާފައިވާކަމަށެވެ.

ބަލި ކޮންޓްރޯލް ކުރުމުގެ ގޮތުން މާލޭގެ އިތުރުން ވިލިމާލޭއާއި އަތޮޅު ތެރޭގައިވެސް ފްލޫ ކުލިނިކްތައް ގާއިމް ކުރުމަށް ނިންމާފައިވާކަމަށް އެޗްޕީއޭއިން ވަނީ ބުނެފައެވެ.

މިބަލީގައި ރާއްޖެއިން މިހާތަނަށް އެކަކު މަރުވެފައިވާއިރު ހާލު ސީރިއަސް މާބަނޑު މީހެއްގެ ސިޒޭރިއަން ހަދައި ދަރިފުޅު ވަނީ ނަގައިފައެވެ. އަންހެން މީހާ އާއި ދަރިފުޅުގެ ހާލުވެސް ސީރިއަސް ކަމަށް އައިޖީއެމްއެޗުން ބުނެއެވެ. އައިޖީއެމްއެޗްގައި ހާލު ސީރިއަސް ހަތަރު މީހަކަށް އެޑްމިޓްކޮށްގެން ފަރުވާ ދެމުން އަންނަ އިރު، އެތަނުން ދެމީހަކު އެޗްވަންއެންވަން ވަނީ ޕޮޒިޓިވް ވެފައިކަމަށް އެޗްޕީއޭއިން ބުނެއެވެ. މީގެއިތުރުން އޭޑީކޭގައި ކުޑަދެކުއްޖަކު އެޑްމިޓްކޮށް ފަރުވާދެމުންއަންނައިރު އެ ދެކުދިންގެ ޓެސްޓްތައް ނެގެޓިވްކަމަށް އެޗްޕީއޭއިން ބުންޏެވެ.

ރޯގާ އަށް ފަރުވާދިނުމަށް އައިޖީއެމްއެޗްގެ ހާއްސަ ފްލޫ ކްލިނިކެއް ތާޖުއްދީން ސްކޫލުގައި ހުޅުވާފައިވާއިރު އޭޑީކޭގެ ފްލޫ ކްލިނިކް ގާއިމްކޮށްފައިވަނީ ގައުމީ ޔުނިވާސިޓީގެ ފެކަލްޓީ އޮފް ސައިންސް ހިންގާ އިމާރާތުގައެވެ. މީގެ އިތުރުން ހުޅުމާލެ ހޮސްޕިޓަލާއި ވިލިމާލޭގެ އިތުރުން ސެނެހިޔާ އިންވެސް ވަނީ ހާއްސަ ފްލޫ ކްލިނިކްތައް ގާއިމްކޮށްފައެވެ.