ދަރިވަރުންގެ އަތަށް ދިން ރިޕޯޓު ފޮތަށްވުރެ މާ ތަފުޞީލީ މަޢުލޫމާތު "މިމިސް" އެޕްލިކޭޝަނުން ލިބޭނެ ކަމަށް އެޑިޔުކޭޝަން މިނިސްޓްރީގެ ޑެޕިއުޓީ މިނިސްޓަރ މުޙައްމަދު އިޙުސާން ވިދާޅުވެއްޖެއެވެ.
ރާއްޖެޓީވީ ފަލަސުރުޚީ ޕްރޮގްރާމުގައި ޑެޕިއުޓީ މިނިސްޓަރ މުޙައްމަދު އިޙްސާން ވިދާޅުވީ އެޑިޔުކޭޝަންގެ ހުރިހާ މަސައްކަތްތައް ޑިޖިޓަލައިޒް ކުރުމުގެ މަސައްކަތް ކުރަމުން އަންނަ ކަމަށެވެ.
އެގޮތުން 20 ޞަފުހާގެ ރިޕޯޓު ފޮތްތައް ތައްޔާރުކުރުމުގެ މަސައްކަތް ނިމުމަކަށް ގެނެސް އެމަސައްކަތް ޑިޖިޓަލައިޒް ކުރެވިފައިވާ ކަމަށް އިޙްސާން ވިދާޅުވިއެވެ. އިޙްސާން ވިދާޅުވީ މީގެ ކުރިން ރިޕޯޓު ފޮތް ހެދުމަށް ހޭދަކުރި ގިނަ ޢަދަދެއްގެ ކަރުދާސް މިހާރު ބޭނުން ކުރަން ނުޖެހޭ ކަމަށާއި، މިއީ ޚަރަދަށް ވެސް ލިބުނު ބޮޑު ލުޔެއް ކަމަށެވެ.
އިޙްސާން ވިދާޅުވީ މިމިސް އެޕްލިކޭޝަނުން އެދަރިވަރަކާ ބެހޭ މުހިންމު ތަފުޞީލީ މަޢުލޫމާތު ލިބޭނެ ކަމަށާއި، މާއްދާތަކުން ލިބުނު މާކްސް އާއި ރަނގަޅު ކުރަންޖެހޭ ކަންކަން ވެސް ފެންނަން ހުންނާނެ ކަމަށެވެ. އަދި ވިދާޅުވީ ކުއްޖާގެ ހެދިބޮޑުވުމަށް އަންނަ ބަދަލުތަކުގެ ތަފްޞީލާއި، އިތުރު ޙަރަކާތްތަކާއި، ހޯދާފައިވާ ކާމިޔާބުތަކާއި، ކްލާހުގެ ހާޟިރީ ވެސް ފެންނަން ހުންނާނެ ކަމަށެވެ.
ކުރިން ދިން ކަހަލަ 20 ޞަފުޙާގެ ރިޕޯޓު ފޮތެއް މިހާރު ނުދޭނެ. މިހާރު މިދެނީ ސްކޫލު ނިންމާ ދުވަހު ގާތްގަނޑަކަށް ތިން ޞަފުޙާގެ ފޮތެއް. އޭގައި ހިމެނޭނެ މައިގަނޑު ގޮތެއްގައި ކުއްޖާގެ އެންމެ މުހިންމު މަޢުލޫމާތު. މާއްދާތަކަށް ޓީޗަރުން ދީފައި ހުރި ބައެއް މުހިންމު ކޮމެންޓުތަކާ ލިބިފައި ހުރި މާކްސްތައް ފެންނަން ހުންނާނެ. ތަފްޞީލު ފެންނާނެ މިމިސް އެޕްއިން.އިހްސާން- އެޑިޔުކޭޝަން މިނިސްޓްރީގެ ޑެޕިއުޓީ މިނިސްޓަރު
ސީނިއަރ ޕޮލިސީ ޑިރެކްޓަރ މޫސާ އާދަމް ވިދާޅުވީ މިމިސް އެޕްލިކޭޝަނުން ދަރިވަރުންގެ ރިޕޯޓުކާޑު ހެދޭ ގޮތް ވުމަކީ ވަގުތު ވަރަށް ބޮޑަށް ސަލާމަތް ކުރެވުނު ކަމެއްކަމަށާއި، އޭގެ ފައިދާ ބެލެނިވެރިންނަށާއި، ޓީޗަރުންނަށް ކުރަމުން އަންނަ ކަމަށެވެ.
މޫސާ ވިދާޅުވީ އެއްގްރޭޑުން އަނެއް ގްރޭޑަށް ދަރިވަރުން ބަދަލުވާއިރު، ރިޕޯޓު ފޮތް ގެއްލޭ މައްސަލަ މީގެ ކުރިން ދިމާވެފައި އެބަހުރި ކަމަށާއި، އެހެން ވުމުގެ ސަބަބުން ދަރިވަރުން ކުރީގެ ގްރޭޑްތަކުގައި ކޮށްފައި ހުންނަ މަސައްކަތް ބެލެނިވެރިއާއަށް ބެލޭނެ ގޮތެއް ނޯންނަ ކަމަށެވެ. ނަމަވެސް މިމިސް އެޕްލިކޭޝަނާއެކު މިމައްސަލައަށް ވެސް ޙައްލު ލިބިފައިވާ ކަމަށް މޫސާ ވިދާޅުވިއެވެ.
މީގެ އިތުރުން މޫސާ ވިދާޅުވީ ސްކޫލުގައި ރަޖިސްޓްރީވާ ކޮންމެ ބެލެނިވެރިއަކަށް އެކުއްޖާއަށް ދޭ ލޮގިންއާ ޕާސްވޯޑް ބޭނުންކޮށްގެން ކޮންމެ ވަގުތަކު އެކުއްޖާގެ މަޢުލޫމާތު ކޮންމެ ތަނެއްގައި ހުރެގެން ވެސް ބެލޭނެ ކަމަށެވެ. އަދި ވިދާޅުވީ އެޕްލިކޭޝަނުން ދުވަހުގެ ހާޟިރީ ވެސް މައިންބަފައިންނަށް ވަގުތުން ވަގުތަށް ބެލޭނެ ކަމަށެވެ.
