ދައުލަތުގެ ދެ ބާރުން ވެސް ޤާނޫނު ޢަސާސީ އަށް ބޯލަނބަން ޖެހޭ ކަމަށާއި، އެއްވެސް ފަރާތަކަށް ޤާނޫނު އަސާސީ އަށް ވުރެ މަތީގައި ނުހުރެވޭނެ ކަމަށް ރައީސް އިބްރާހިމް މުޙައްމަދު ޞާލިޙް ވިދާޅުވެއްޖެއެވެ.

ޖުމްހޫރީ ދުވަހުގެ މުނާސަބަތުގައި ވާހަކަފުޅު ދައްކަވަމުން ރައީސް ޞާލިޙް ވިދާޅުވީ، ސަރުކާރުން މަޝްރޫޢުތައް ހިންގުމާއި، ޚިދުމަތްތައް ދިނުމުގައި އެއްވެސް ރައްޔިތަކު ތަފާތުކޮށް، އެއްވެސް ބަޔަކު ބާކީކޮށްގެން ނުވާނެ ކަަމަށެވެ. ސަރުކާރު ދެމި އޮންނާނީ، އެއްވެސް ރައްޔިތަކަށް ތަފާތުކުރުމެއްނެތި، ހުރިހާ ރައްޔިތުންނަށް ޚިދުމަތް ކުރުމުގައި ކަމުގެ ޔަޤީންކަން އެމަނިކުފާނު ވަނީ އަރުއްވާފައެވެ.

ސަރުކާރު ހިންގުމުގައި ކޯލިޝަންގެ ހަތަރު ލީޑަރުންގެ ފަރާތުން ލިބެމުންދާ އެއްބާރުލުން ފާހަގަކުރައްވަމުން ރައީސް ޞާލިޙް ވަނީ އެ ލީޑަރުންނަށް ޝުކުރު އަދާކުރައްވާފައެވެ.

ރައްޔިތުންގެ މަޖިލީހުން ޤާނޫނުތައް ހަދަންވާނީ، ރައްޔިތުންގެ ޢަސާސީ ޙައްޤުތައް ޙިމާޔަތްކުރެވި، ރައްޔިތުންގެ އެންމެ މަތީ މަސްލަޙަތު ރައްކާތެރި ކުރެވޭނެ ގޮތަށްކަން ފާހަގަކުރައްވަމުން ރައީސް ވިދާޅުވީ، ފަނޑިޔާރުގޭގެ މަޤްޞަދަކަށް ވާންވާނީ، ޢަދުލުވެރިކަމާއެކު ރައްޔިތުންގެ ޙައްޤުތައް ފުރިހަމައަށް ހޯދައިދިނުން ކަމަށެވެ.

އެއަށް ފަހު ޤާނޫނޫ ޢަސާސީގެ އަށްވަނަ މާއްދާޔަށް ރިޢާޔަތް ކުރައްވަމުން ރައީސް ޞާލިޙް ވިދާޅުވީ، ދިވެހި ދިދައިގެ ދަށުގައި އުޅޭ އެއްވެސް ބަޔަކަށް ޤާނޫނު ޢަސާސީން ނުދޭ ބާރެއް ލިބިފައި ނޯންނާނެ ކަމަށެވެ.

ދައުލަތުގެ އެންމެ މަތީ ބާރުގެ ވެރިޔާ ވިދާޅުވީ، ޤާނޫނު އަސާސީ ނަގައި ދެމެހެއްޓުމުގެ މަސައްކަތް ކުރައްވާނެ ކަމަށެވެ. ރައްޔިތުންނަށް ވީ ވަޢުދުތަކުގެ ތެރެއިން، މި އަހަރު އެންމެ ބޮޑު ސަމާލުކަމެއް ދީފައިވާނީ، މުޖްތަމަޢުގެ ހަމަޖެހުމާއި އަމާންކަން ކަށަވަރުކޮށްދިނުން ކަމަށް ރައީސް ވިދާޅުވިއެވެ.