ރައީސުލްޖުމްހޫރިއްޔާ އިބްރާހީމް މުހައްމަދު ޞާލިހަކީ ވައްކަން ކުރައްވާނެ ބޭފުޅެއް ނޫންކަމަށް ވިދާޅުވެ ހަނިމާދޫ ދާއިރާގެ މެމްބަރ އަބްދުލްޣަފޫރު މޫސާ ކާށިދޫ ދާއިރާގެ މެމްބަރ އަބްދުﷲ ޖާބިރަށް ރައްދު ދެއްވައިފިއެވެ.
ރައްޔިތުންގެ މަޖިލީހުގެ ޖަލްސާތަކުގައި މިފަހަކަށް އައިސް ޖާބިރު ގެންދަވަނީ ރައީސް ސޯލިހަށް ވަރަށް ބޮޑަށް ފާޑުވިދާޅުވެ ވާހަކަ ދައްކަވަމުންނެވެ. މިއަދުގެ ޖަލްސާގައި އިންތިގާލީ އިންސާފުގެ ބިލަށް ބަހުސްކުރެއްވުމަށް ލިބިވަޑައިގެންނެވި ފުރުސަތުގައި ވާހަކަދައްކަވަމުން ޖާބިރު ވިދާޅުވީ އެމްއެމްޕީއާރުސީގެ ހިޔާނާތުގެ މައްސަލާގައި ރައީސް ސޯލިހު ބައިވެރިވެ ވަޑައިގަންނަވާ ކަމަށެވެ. އެމްއެމްޕީއާރުސީގެ ޚިޔާނާތުގެ މައްސަލަ ތަހުގީގުކުރުމަށް މަޖިލީހުން ވަކި ކޮމެޓީއެއް ނެގުމަށް އެދިވަޑައިގެން މަޖިލީހުގެ ރައީސަށް ފޮނުއްވި ސިޓީގައިވެސް ޖާބިރު ވަނީ ރައީސް ސޯލިހު އެމްއެމްޕީއާރުސީ ހިޔާނާތުގެ ފައިސާގައި ޖެހިވަޑައިގެންފައިވާ ކަމަށް ވިދާޅުވެފަ އެވެ.
މިއަދުގެ ޖަލްސާގައި ވާހަކަދައްކަވަމުން ޖާބިރު ވިދާޅުވީ އެމައްސަލަތައް ބެލުމަށް ރިޔާސީ ކޮމިޝަނަށް އެދުމަށް ސިޓީއެއް މިހާރު މަޖިލީހުގެ އިދާރީ މޭޒާ ހަވާލުކޮށްފައިވާ ކަމުގައެވެ. ޖާބިރު ވިދާޅުވީ ކުރީގެ ރައީސް ޔާމީންގެ ވެރިކަމުގައި ޖާބިރުގެ ވިޔަފާރިތަކަށް ދީފައިވާ ގެއްލުންތައް އިޔާދަ ކޮށްދެއްވާނެ ކަމަށް ރައީސް ސޯލިހު ވައުދުވެ ވަޑައިގެންފައިވާ ކަމަށެވެ.
އަޅުގަނޑު އަތުން ވަރަށް ބައިވަރު ލާރިވެސް އޭނާ (ރައީސް ސޯލިހު) ނެގި. ދިވެހިރާއްޖޭގައި މަކަރާއި ހީލަތާއި ވައްކަންކުރުމާއި ހިޔާނާތުން އެމަގުން ޕީއެޗްޑީ ނަންގަވާފައި ހުންނެވި މީހެއް ރައީސް ސޯލިހަކީ.ކާށިދޫ ދާއިރާގެ މެމްބަރ އަބްދުﷲ ޖާބިރު
ޖާބިރު ގެންދަވަނީ ނޫމަޑި މައްސަލާގައި ދައުލަތުން ގެއްލުމުގެ ބަދަލު ދިނުމުން އެކަމާ ހިތްޕުޅު ހަމަޖެހިވަޑައި ނުގެންވެސް ވާހަކަ ދައްކަވަމުންނެވެ. އެކަމުގައި ފިނޭންސް މިނިސްޓަރާއި އެކޮނޮމިކް މިނިސްޓަރ އެފައިސާ ދިނީ ރައީސް ސޯލިހު އަންގަވައިގެންކަމަށް ޖާބިރު ތުހުމަތު ކުރެއްވި އެވެ.
850 މިލިއަން ރުފިޔާ ބިލިއަނަކާ ގާތަށް މިމަޖިލީހުގެ ބަހެއްވެސް ނުހޯދާ ބަޖެޓުން އެޕްރޫވްވެސް ނުހޯދާ ޤާނޫނާއި ގަވާއިދާ މާލިއްޔަތު ޤާނޫނާއި މުޅިން ހިލާފަށް ރާއްޖޭގެ ފައިނޭންސް މިނިސްޓަރ އެފައިސާ ޕޭ ކުރީ އިބްރާހީމް މުހައްމަދު ސޯލިހުގެ އޯޑަރަށް.ކާށިދޫ ދާއިރާގެ މެމްބަރ އަބްދުﷲ ޖާބިރު
ޖާބިރު ވިދާޅުވީ ވައްކަން ކުރި މީހުންގެ ތެރޭގައި އެމަނިކުފާނު ހިމެނިވަޑައިނުގަންނަވާ ކަމަށެވެ. ޖާބިރުގެ މިވާހަކަތަކަށް މިއަދު ރައްދުދެއްވީ ހަނިމާދޫ ދާއިރާގެ އެމްޑީޕީ މެމްބަރު އަބްދުލްޣަފޫރު މޫސާ އެވެ. ޣަފޫރުގެ ވާހަކަފުޅުގައި ތަކުރާރުކޮށް ވިދާޅުވީ ރައީސް ސޯލިހަކީ ދިވެހި ރައްޔިތުންގެ ފައިސާއިން ވައްކަން ކުރައްވާނެ ބޭފުޅެއް ނޫންކަމުގަ އެވެ.
އަޅުގަނޑުގެ އަމިއްލަ ނަފްސަށް އޮންނަ އިތުބާރު އެމަނިކުފާނާ ދޭތެރޭ އޮވޭ އިއްޒަތްތެރި ރައީސް. އެހެންނަމަވެސް ތަކުރާރުކޮށް މިތާންގައި ރައީސުލްޖުމްހޫރިއްޔާ އާ ދިމާއަށް ވަގަށް ގޮވަމުންދާއިރުގައި އަޅުގަނޑުމެންނަށް އެއަޑުތައް އެބައިވޭ އިނގޭތޯ. އިދިކޮޅު ފަރާތްތަކުންވެސް ގަަބޫލުކުރާނެ ރައީސް ސޯލިހަކީ ދިވެހި ރައްޔިތުންގެ ފައިސާގައި ޖެހޭނެ ބޭފުޅެއް ނޫންކަންހަނިމާދޫ ދާއިރާގެ މެމްބަރު އަބްދުލްޣަފޫރު މޫސާ
ޣަފޫރު ވިދާޅުވީ ޖާބިރު އެމޭރުމުން ވާހަކަދައްކަވަނީ އެމަނިކުފަނުގެ އަމިއްލަ މަސްލަހަތު ހިމާޔަތް ނުކޮށްދެވޭތީވެ ކަމަށެވެ.
ދައުލަތަށް ދައްކަންއޮތް 1 ބިިލިއަން ރުފިޔާ އިހަށް ކާށިދޫ ދާއިރާގެ މެމްބަރު ދައްކަބަލަ. ތަންކޮޅެއް ބޮޑުވަރު މިހާރު މިއީ މިތާންގައި. ދޮގުހެދުމުގައި ހައްދު ފަހަނަ އަޅައިގެން މިހާރު މިދަނީ. މިކަންކަމަކީ އަޅުގަނޑުމެން މިހެން އަޑުއަހަން ތިބޭނެ ކަންކަމެއް ނޫން. އެމަނިކުފާނޭ ކިޔައިގެން ކާށިދޫ ދާއިރާގެ މެމްބަރ މިތާންގައި ނުދައްކާ ދޮގު ވާހަކައެއް ނެތް.ހަނިމާދޫ ދާއިރާގެ މެމްބަރު އަބްދުލްޣަފޫރު މޫސާ
ރައީސް ސޯލިހު ޖާބިރު އަތުން ފައިސާ ނެންގެވިކަމަށް ޖާބިރު ވިދާޅުވާ ވާހަކައަށް ރައްދުދެއްވަމުން ޣަފޫރު ވިދާޅުވީ ރައީސް ސޯލިހު ޖާބިރުގެ އަތުން ފައިސާ ނުހޯއްދަވާނެ ކަމަށެވެ.
މީކީ ގަބޫލު ކުރެވޭނެ ކަމެއް ނޫން. އެއްވެސް މީހެއްގެ ހަޔާތް ކުޑަކަމަކަށް މިސަރުކާރުން އަގެއް ނުދައްކާނެ. ވަރަށް ސާފުކޮށް އޮތް އެއްޗެއް. އެމްޑީޕީގެ ރިޔާސީ އިންތިޚާބަށް ފައިސާ ޚަރަދުކުރި މީހެއް ނޫން އަބްދުﷲ ޖާބިރަކީހަނިމާދޫ ދާއިރާގެ މެމްބަރު އަބްދުލްޣަފޫރު މޫސާ
އެމްއެމްޕީއާރުސީ އާއި ދައުލަތުގެ ފައިސާއިން ރައީސް ސޯލިހު ފައިސާ ނެންނެގެވި ކަމަށް ޖާބިރު ވިދާޅުވަމުންދާ ކަމަށް ވިދާޅުވެ ޣަފޫރު ވިދާޅުވީ އެންމެން ވައްކަން ކުރާނެ ކަމަށް ދެކުމަކީ މޮޔަ ހިޔާލެއް ކަމަށެވެ. ރައީސް ސޯލިހުގެ ޓްރެކް ރެކޯޑެއް ވައްކަމުގައި ނޯންނާނެ ކަމަށާއި އެއީ ފައިސާ ގައި ޖެހިވަޑައިގެންނަވާނެ ބޭފުޅެއް ނޫންކަމަށް ޣަފޫރު ވިދާޅުވި އެވެ. ތަރައްޤީ ފެނިގެންދާނެކަމަށާއި މިސަރުކާރަކީ ރައްޔިތުންގެ ފައިސާގައި ޖެހޭނެ ސަރުކާރެއް ނޫންކަމަށް ޣަފޫރު ވިދާޅުވި އެވެ.
