ކުދި އަދި މެދު ފަންތީގެ ވިޔަފާރި ކުރިއެރުވުމަށް އުފެއްދި އެސްއެމްއީ ޑިވެލޮޕްމަންޓް ފައިނޭންސް ކޯރޕަރޭޝަން (އެސްޑީއެފްސީ) އަށް 450 މިލިއަން ރުފިޔާ ދިނުމަށް އަންނަ އަހަރުގެ ބަޖެޓްގައި ހިމަނައިފިއެވެ.
އަންނަ އަހަރަށް ލަފާކުރާ ދައުލަތުގެ ބަޖެޓް ހުށަހަޅުއްވަމުން ފިނޭންސް މިނިސްޓަރ އިބްރާހީމް އަމީރު ވިދާޅުވީ އިޤްތިސާދު ކުރިއެރުމުގައި އެންމެ ބޮޑު ދައުރެއް އަދާކުރަނީ ޕްރައިވެޓް ސެކްޓަރ ހާއްސަކޮށް ކުދި އަދި މެދު ފަންތީގެ ވިޔަފާރިތަކުންކަމަށެވެ. މިގޮތުން، ކުދި އަދި މެދުފަންތީގެ ވިޔަފާރިތަކުން ވިޔަފާރީގެ މައިދާނަށް ވަދެ ފައިހަމަކުރުމަށް އެހީވެދިނުމަށް، އެސްއެމްއީ ޑިވެލޮޕްމަންޓް ފައިނޭންސް ކޯރޕަރޭޝަން މެދުވެރިކޮށް 2020 ވަނަ އަހަރުވެސް ލޯނު ދޫކުރަމުންދާނެ ކަމަށް މިނިސްޓަރ ވިދާޅުވި އެވެ.
ސަރުކާރުގެ އަމާޒަކީ މި 3 އަހަރު ކެޕިޓަލް ދޫކޮށް، ސަރުކާރަށް ބަރޯސާނުވެ ލޯނު ދޫކުރަން ބޭނުންވާ މިންވަރުގެ ފަންޑެއް އެ ކުންފުނީގައި ގާއިމުކުރުން. އެއާއެކު، މަދުވެގެން އަހަރަކު 400 މިލިއަން ރުފިޔާގެ ލޯނު ކުދި އަދި މެދު ފަންތީގެ ވިޔަފާރިތަކަށް ދޫކުރެވޭނެ ގާބިލުކަން ހުރި ފުދުންތެރި ކުންފުންޏަކަށް، އެ ކުންފުނި ހެދުން. އަދި އެސް.އެމް.އީ ޤާނޫނުގައިވާ ގޮތުގެ މަތިން އިތުރު 50 މިލިއަން ރުފިޔާ އިންވެސްޓް ކުރެވޭނެ.ފިނޭންސް މިނިސްޓަރ އިބްރާހީމް އަމީރު
ކުދި އަދި މެދު ފަންތީގެ ވިޔަފާރިތަކަށް ހާއްސަކޮށްގެން އެސްއެމްއީ ބޭންކެއް އުފެއްދުމަކީ މިސަރުކާރުގެ ވައުދެކެވެ. މި ބޭންކު އުފައްދާ ލޯނުދޫކުރުމަށް ފަށާފައިވަނީ މިއަހަރުގެ ކުރީކޮޅު އެވެ. އެސްއެމްއީ ޑިވެލޮޕްމެންޓް ފައިނޭންސް ކޯޕަރޭޝަނަކީ މާލޭގެ އިތުރުން އައްޑު އާއި ފުވައްމުލަކު ސިޓީ ކައުންސިލްގެ ފަސް ޕަސެންޓް ހިއްސާ ހިމެނޭ ކުންފުންޏެކެވެ.
