ޖުޑީޝަލް ސަރވިސް ކޮމިޝަން (ޖޭއެސްސީ) ން ބަލަމުންދާ ސްޕްރީމް ކޯޓުގެ ފަނޑިޔާރު އާދަމް މުހައްމަދުގެ ސުލޫކީ މައްސަލާގައި ވަކީލަކަށް ޑރ. މުހައްމަދު ޖަމީލު އަހުމަދު އައްޔަކުރެއްވުމުން، އިތުރު މައްސަލައެއް ފެންމަތިވެ، ބުރާސްފަތި ދުވަހު އަލުން އަޑުއެހުމެއް ބޭއްވުމަށް ތަހުގީގު ކޮމެޓީން ނިންމައިފި އެވެ.

އެމައްސަލަ ބަލާ، ޖޭއެސްސީގެ ތަހުގީގު ކޮމެޓީން ބުދަ ދުވަހު ބައްދަލުވުން ފެށުމާއެކު، ޖޭއެސްސީގެ ރައީސް އަދި އެ ތަހުގީގު ކޮމެޓީގެ ރައީސް މަސްތޫރު ހުސްނީ ވިދާޅުވީ، ފަނޑިޔާރު އާދަމް މުހައްމަދުގެ ގާނޫނީ ވަކީލެއްގެ ގޮތުގައި އައްޔަން ކުރައްވާފައިވާ ޑރ. ޖަމީލު، ސުޕްރީމް ކޯޓަށް ދުސްތޫރީ މައްސަލައެއް ހުށަހަޅުއްވާފައި އެބައޮތް ކަމަށާއި އަދި އެމައްސަލަ ބަލާ ސުޕްރީމް ކޯޓުގެ ފަނޑިޔާރުންގެ ބެންޗުގައި އާދަމް މުހައްމަދު ހިމެނިވަޑައިގަންނަވާ ކަމަށެވެ.

މަސްތޫރު ވިދާޅުވީ ޖަމީލަކީ ސުޕްރީމް ކޯޓުން މިހާރު ބަލަމުންދާ މައްސަލައެއްގެ ހަސްމެއް ކަމަށްވެފައި، އަދި ފަނޑިޔާރު އާދަމް އެމައްސަލަ ބައްލަވާ ފަނޑިޔާރުންގެ ބެންޗުގައި ހިމެނިވަޑައިގަންނަވާތީ، ފަނޑިޔާރު އާދަމް މުހައްމަދުގެ ދިފާއީ ވަކީލެއްގެ ގޮތުގައި އައްޔަނު ކުރެއްވުމަކީ ފަނޑިޔާރުންގެ ސުލޫކީ މިންގަނޑާ ހިލާފު ކަމެއް ކަމަށް ކޮމިޓީއަށް ގަބޫލު ކުރެވޭ ކަމަށެވެ.

އެހެންކަމުން ފަނޑިޔާރު އާދަމް މުހައްމަދު އިތުރު ސުލޫކީ މައްސަލައެއް ޖޭއެސްސީ ހުށަހެޅިފައިވާ ކަމަށް މަސްތޫރު ވިދާޅުވި އެވެ.

މީގެއިތުރުން މަސްތޫރު ވިދާޅުވީ، ދިފާއީ ވަކީލެއް އައްޔަން ކުރެއްވުމަށް އިތުރު ފުރުސަތެއް އާދަމް މުހައްމަދު ބޭނުފުޅުވާތީ، އެފުރުސަތު ދެއްވާ ކަމަށާއި އަދި މިހާރު ކުރިއަށް ސުލޫކީ މައްސަލައިގެ އިތުރު އަޑުއެހުމެއް ބުރާސްފަތި ދުވަހުގެ 12:30 ބޭއްވުމަށް ނިންމާ ކަމަށެވެ.

އާންމުކޮށް ހުޅުވާލައިގެން އަޑުއެހުންތައް ބާއްވައިދިނުމަށް ފަނޑިޔާރު އާދަމް އެދިވަޑައިގެންފައިވާތީ، ބުދަ ދުވަހުގެ އަޑުއެހުން ވަނީ ޓީވީން ލައިވްވެސް ކޮށްފަ އެވެ.

މީގެ ކުރިން ފަނޑިޔާރު އާދަމް މުހައްމަދުގެ މައްސަލަ ބަލައި ޖޭއެސްސީން ވަނީ އޭނާއަށް ނަސޭހަތް ދޭން ނިންމާފަ އެވެ. ނަމަވެސް އެ ނަސޭހަތް އޭނާ ގަބޫލު ނުކުރުމުން، އެއީ ސުލޫކީ މައްސަލައެއް ކަމަށް ޖޭއެސްސީން ނިންމައި އެ ނަސޭހަތް ގަބޫލުނުކުރި މައްސަލަ ބެލުމަށް ޖޭއެސްސީން ފަހުން ނިންމިއެވެ.

މީގެ ކުރިން ސުޕްރީމް ކޯޓުގެ ކުރީގެ ފަނޑިޔާރު އަބްދުﷲ ދީދީގެ މައްސަލަ އާންމުކޮށް ހުޅުވާލައިގެން ދަރުބާރުގޭގައި ވަނީ ބާއްވާފަ އެވެ. އެ މައްސަލަ ބަލައި ފަނޑިޔާރު އަބްދުﷲ ދީދީ މަގާމުން ވަކިކުރުމަށް ޖޭއެސްސީން ނިންމިއިރު ފަހުން ރައްޔިތުންގެ މަޖިލީހުން ވަނީ އަބްދުﷲ ދީދީ އެ މަގާމުން ވަކިކުރުމަށް ފާސްކޮށް މަގާމުން ވަކިކޮށްފަ އެވެ. ފަނޑިޔާރު އަބްދުﷲ ދީދީގެ ގާނޫނީ ވަކީލަކަށް ވެސް ވަޑައިގެންނެވީ ޑރ، ޖަމީލު އެވެ.

މިފަހުން ޖޭއެސްސީން އަންނަނީ ފަނޑިޔާރުންގެ ސުލޫކީ މައްސަލަތައް ބަލާ ފިޔަވަޅު އަޅަމުންނެވެ.