ސިއްރުކޮށްގެން ކުރިޔަށް ގެންދިޔަ މާލިއްޔަތު ކޮމެޓީގެ ބައްދަލުވުމުގައި ޕްރޮސެކިޔުޓަރ ޖެނެރަލް (ޕީޖީ) އައިޝަތު ބިޝާމް ވިދާޅުވި ވަޒީރުންގެ ނަންތައް އާންމުވި މައްސަލަ ބަލަމުންގެންދާކަމަށް ރައްޔިތުންގެ މަޖިލީހުގެ އަމީން އާންމު ފާތުމަތު ނިއުޝާ ވިދާޅުވެއްޖެ އެވެ.
އެމްއެމްޕީއާރުސީގެ ޚިޔާނާތާއި ގުޅިގެން ރައްޔިތުންގެ މަޖިލީހުގެ މާލިއްޔަތު ކޮމެޓީއަށް ޕީޖީ ހާޒިރުކޮށް މައުލޫމާތު ސާފުކުރުމަށް ބޭއްވި ބައްދަލުވުން ވަނީ ސިއްރުކޮށްފަ އެވެ. ކޮމެޓީ ބައްދަލުވުން ސިއްރުކޮށްފައިވަނީ އެމްއެމްޕީއާރުސީގެ ޚިޔާނާތުގެ ފައިސާގައި މިސަރުކާރުގައި ހިމެނިވަޑައިގަންނަވާ ބޭފުޅުންނާއި ރައްޔިތުންގެ މަޖިލީހުގެ މިހާރުގެ މެމްބަރުންވެސް ހިމެނޭކަމަށް ބިޝާމް ވިދާޅުވެ އެނަންތައް ހާމަކުރުމަށް ބިޝާމް އުޒުރުވެރިވެ ވަޑައިގަތުމުން ނެވެ.
ނަމަވެސް ޖެހިގެން އައި ދުވަހު އެމްއެމްޕީއާރުސީގެ މައްސަލާގައި އެފައިސާގައި ޖެހިފައިވާ ފަރާތްތަކުގެ ނަންތަކެއް ހާމަކުރައްވާފައިވާކަމަށް ކޮމިއުނިކޭޝަން ސައިންސް އެންޑް ޓެކްނޮލޮޖީ މިނިސްޓަރު މުހައްމަދު މަލީހު ވަނީ ވިދާޅުވެފައެވެ. އަދި އެ ދުވަހު ބޭއްވި މަޖިލީހުގެ ޖަލްސާގައި މަހިބަދޫ ދާއިރާގެ މެމްބަރު އަހުމަދު ތޯރިގް ވަނީ އެމްއެމްޕީއާރުސީގެ މައްސަލައިގައި ހިމެނޭކަމަށް ބިޝާމް ހާމަކުރެއްވީ މަލީހާއި، ޔޫތް މިނިސްޓަރު އަހުމަދު މަހުލޫފާއި ފިޝަރީޒް މިނިސްޓަރު ޒަހާ ވަހީދުގެ ނަންފުޅުކަމަށް ވިދާޅުވެފަ އެވެ.
މިމައްސަލަ ފެންމަތިވުމާއެކު މަލީހު ވަނީ ބިޝާމްގެ މައްޗަށް އަބުރުގެ ދައުވާ ކުރައްވާނެކަމަށް ވިދާޅުވެ ބިޝާމްއަށް ސިޓީ އެއް ފޮނުވާފަ އެވެ. އެ ސިޓީގައި ވަނީ މަލީހު އާއި ބެހޭގޮތުން އެފަދަ ވާހަކައެއް ދެއްކެވި ނަމަ، އޭގެ ތަފްސީލު ހިއްސާ ކޮށްދެއްވުމަށް އެދިވަޑައިގަންނަވާ ކަމަށެވެ. އަދި އެމްއެމްޕީއާރުސީގެ ޚިޔާނާތާ ގުޅޭގޮތުން ޕީޖީ އަށް ލިބިފައިވާ އެއްވެސް ލިޔުމެއްގައި އޭނާގެ ނަމެއް ނުވަތަ ތުހުމަތު ކުރެވޭ ކަމެއް އޮތް ނަމަ، އެކަމުގެ މައުލޫމާތު ތިން ދުވަސް ތެރޭ ރާއްޖޭގެ ހުރިހާ މީޑިއާއަކަށް ދެއްވަން މަލީހު އެދިވަޑައިގަންނަވާ ކަމަށް ސިޓީގައި ބުނެފައިވެ އެވެ.
ސިއްރުކޮމެޓީގައި ހާމަކުރި ނަންތަކެއް އާންމުވުމާއި ގުޅިގެން އެމައްސަލަ މާލިއްޔަތު ކޮމެޓީންވެސް ބެލުމަށް ވަނީ ނިންމާފައެވެ. އަނެއްކޮޅުން ނޫސްވެރިންނަށް މައުލޫމާތުދެއްވަމުން މަޖިލީހުގެ އަމީން އާންމު ވިދާޅުވީ އެކަން މަޖިލީހުގެ އިދާރާއިން ބަލަމުންދާކަމަށެވެ.
އެނގިވަޑައިގަންނަވާނެ ފަދައިން މަޖިލީހުގެ ގަވާއިދުގައި ބަޔާންކުރެވިފައިވޭ ސިއްރު ކޮމެޓީއެއްގައި ދެކެވޭ ވާހަކަތަކެއް އާންމުކުރާނީ، އެ ނިންމާ ނިންމުންތަކެއް ހާމަކުރާނީ އެކޮމެޓީގެ މުގައްރިރުކަމަށް. ތި ވިދާޅުވި ހާދިސާ އާއި ގުޅޭގޮތުން އަޅުގަނޑުމެން މިހާރު މިދަނީ ބެލުންތަކެއް ބަލަމުން. އެކަންތައް މިދަނީ ތަހްޤީޤުކުރަމުން މަޖިލީހުގެ އިދާރާއިން.
އެމްއެމްޕީއާރުސީގެ ހިޔާނާތުގެ ފައިސާ މިހާރުގެ ސަރުކާރުގެ ހަތް ބޭފުޅަކާއި ހަތް ފަނޑިޔާރަކަށާއި ކުރީގެ ރައްޔިތުންގެ މަޖިލީހުގެ 44 މެމްބަރަކަށް އަދި މިހާރުގެ ރައްޔިތުންގެ މަޖިލީހުގެ 16 މެމްބަރަކަށް ލިބިފައިވާކަމަށް ފުލުހުން ވަނީ ދާދިފަހުން ބުނެފައެވެ.
