ޅ. ވައްވަރުގައި، ކަނޑުގެ ދިރުންތަކާއި މުރަކަތައް ދިރާސާ ކުރުމަށް ކޮރަލިއަން ލެބް ހިންގަނިކޮށް އެރަށް އަތުލީ ވަރަށް ނޭއްގާނީކޮށް ކަމަށާއި، އެމަސައްކަތް އަލުން ފެށޭނެ ކަމުގެ އުންމީދު ވަރަށް ކުޑަ ކަމަށް ޕްރޮފެސަރު ހަސަން އުގެއިލް ވިދާޅުވެއްޖެއެވެ.
ސަން އޮންލައިންގެ "50 މިނެޓް" ޕްރޮގްރާމުގައި ޕްރޮފެސަރު އުގެއިލް ވިދާޅުވީ ޅ.ވައްވަރުގެ ކޮރަލިއަން ލެބްގެ މަސައްކަތް ވަރަށް ބާރު ސްޕީޑްގައި ކުރިއަށްދަނިކޮށް ކުރީގެ ރައީސް އަބްދުﷲ ޔާމީންގެ ވެރިކަމުގައި އެރަށް އަތުލީ ގަވާއިދާ ގާނޫނާ ހިލާފަށް ކަމަށާއި، އެމަސައްކަތް ސަރުކާރުން ހުއްޓުވާލީ ކަމަށެވެ. އަދި މަސައްކަތް ހުއްޓައި ރަށް އަތުލީ ހުށަހަޅަންޖެހޭ ރިޕޯޓުތަކެއް ކަރުދާހުން ހުށަނާޅާ ކަމަށް ބުނެ ކަމަށާއި، ނަމަވެސް ހުރިހާ ރިޕޯޓެއް އީމެއިލް މެދުވެރިކޮށް ހުށަހެޅި ކަމަށެވެ.
އުގެއިލް ވިދާޅުވީ 20 އަހަރުގެ ތަސައްވުރެ އޮތް ކޮރަލިއަން ލެބްއަކީ ދުނިޔޭގެ ފެންވަރުގައި ކުރަމުން އައި މަސައްކަތެއް ކަމަށާއި، އެމަސައްކަތް ހުއްޓުވުން އެއީ ރާއްޖެއަށް ލިބުނު ފޫނުބެއްދޭވަރުގެ ބޮޑު ގެއްލުމެއް ކަމަށެވެ.
އަޅުގަނޑު ބޭނުންވި ދުނިޔޭގެ ފެންވަރުގެ ލެބޯޓަރީއެއް ރާއްޖޭގައި އޮންނަން. އަޅުގަނޑުމެންގެ ތަސައްވުރެއް އޮތް 20 އަހަރުގެ. ކޮރަލިއަން ލެބް، އެހެންބުނީމަ ދުނިޔޭގެ ކޮރަލް ދިރާސާ ކުރާ މުރަކަ ދިރާސާ ކުރާ ކޮންމެ ބޭފުޅަކު ދިވެހިރާއްޖޭގައި ހުންނަތަނެކޭތިއީ. ތިއީ ވަރަށް ފުންނާބު އުސް ވަރަށް މުހިންމު މަސައްކަތްތަކެއް ކުރާ ތަނެއްކޭ. އެލަނޑުދަނޑީގައި މަސައްކަތް ފެށީ. އެކަމަކު އެމަސައްކަތް ހުއްޓުވާލީ.ޕްރޮފެސަރ އުގައިލް
އުގެއިލް ވިދާޅުވީ މިހާރު އެމަސައްކަތް ކުރެވޭނެކަމުގެ އެއްވެސް އުންމީދެއް ނެތް ކަމަށާއި، ކުރިން އެމަސައްކަތް ކުރީ ބޭރުގެ ބޭފުޅެއްގެ އަމިއްލަ ޖީބުން ހަރަދުކޮށްގެން ކަމަށެވެ. އެގޮތުން އެމަސައްކަތަށް އެއްމިލިއަން ޑޮލަރު ހޭދަކޮށްފައިވާ ކަމަށް އުގެއިލް ވިދާޅުވިއެވެ.
މީގެ އިތުރުން އުގެއިލް ވިދާޅުވީ ރަށް އަތުލުމަށްފަހު، ތަން ހުސްކުރުމަށް ދިނީ 30 ދުވަހުގެ މުއްދަތެއް ކަމަށާއި، މިމަސައްކަތަށް އެބޭފުޅާ ހޭދަކުރި ފައިސާ ގެއްލުނީ ކަމަށެވެ.
މިހާރު ސަރުކާރު އޮފަރ ކޮށްފައި އެބައޮތް އެރަށް އަބުރާ ލިބިދާނޭ. އެހެންނަމަވެސް ރަށް އަބުރާ ލިބިގެން ކޮންތޯކުންތޯ އަޅުގަނޑުމެން ދެން އެއަށް ބޭނުންވާ އިންވެސްޓްމެންޓް ހޯދާނީ. އަދި އެޕްރޮޖެކްޓް އޮތީ ކުރިއަށްދާ ހިސާބުގައެއް ނޫން. މިހާރު އޮތް ގޮތުން. އިތުރު ވިސްނުމަކަށް ދާންޖެހޭނީ.ޕްރޮފެސަރ އުގައިލް
އުގެއިލް ވިދާޅުވީ ކަނޑުގެ ދިރާސާތައް ކުރުމަށް ރާއްޖޭގައި މިފަދަ ލެބްއެއް ހުރުން ވަރަށް މުހިންމު ކަމަށެވެ.
ކޮރަލިއަން ލެބް ހިންގުމަށް ޅ.ވައްވަރު ސަރުކާރުން ދޫކުރީ 21 އަހަރުގެ މުއްދަތަށްށެވެ. 2013 ވަނަ އަހަރު ލެބް ހުޅުވައި މަސައްކަތްތައް ކުރިއަށްދަނިކޮށް ކުރީގެ ރައީސް އަބްދުﷲ ޔާމީންގެ ވެރިކަމުގައި އެއްބަސްވުން ބާތިލްކޮށް އެރަށް ސަރުކާރާ ހަވާލުކުރުމަށް އެންގީ 2017 ވަނަ އަހަރެވެ.
