ކޮރަޕްޝަންގެ ތުހުމަތުތަކެއް ކުރަން ފެށުމުން, އެމެރިކާގެ ރައީސް ޑޮނަލްޑް ޓްރަމްޕްގެ ޓްރަމްޕް ނޭޝަނަލް ޑޯރަލް ރިސޯޓްގައި ބާއްވަން ނިންމި ޖީ-7 ސަމިޓް އެ ރިސޯޓްގައި ނުބާއްވަން ނިންމައިފިއެވެ.
އެކަން ހާމަކުރައްވާފައިވަނީ ޓްރަމްޕް ކުރެއްވި ޓްވީޓެއްގައެވެ. އެ ޓްވީޓްގައި މީޑިއާގެ އިތުރުން ޑިމޮކްރަޓިކުންގެ އުނގަދޫ ބޮޑުވުމުގެ ސަބަބުން ޖީ 7 ގެ ސަމިޓް އޭނާގެ ރިސޯޓްގައި ނުބާއްވަން ވަނީ ނިންމަވާފައެވެ. އަދި އެ ސަމިޓް ބާއްވާނެ އެހެން ތަނެއް ހޯދަމުންދާ ކަމަށް ވެސް ޓްވީޓްގައި ވިދާޅުވެފައިވެއެވެ.
ޓްރަމްޕްގެ ޓްވީޓްގައި، އެ ސަމިޓު ކޭމްޕް ޑޭވިޑްގައި ބޭއްވިދާނެ ކަމަށް ޓްރަމްޕް ވިދާޅުވެފައިވާއިރު، ވައިޓް ހައުސްގެ އެކްޓިން ޗީފް އޮފް ސްޓާފް މިކް މަލްވަނީ އެ ސަމިޓް ބާއްވަން އެންމެ ރަނގަޅު ތަނަކީ ފްލޮރިޑާގެ ޓްރަމްޕް ގޮލްފް ކޯސް ކަމަށް ވިދާޅުވެފައެވެ.
ޓްރަމްޕްގެ ނޭޝަނަލް ޑޯރަލް ރިސޯޓް ވެފައިވަނީ ޓްރަމްޕް އޯގަނައިޒޭޝަނަށް އެންމެ ފައިސާ ވައްދާ އެއް ތަނަށް ކަމަށް ރިޕޯޓްތަކުން ބުނެއެވެ.
