ސުޕްރީމް ކޯޓުގެ ފަނޑިޔާރު އަދި ޖުޑީޝަލް ސާރވިސް ކޮމިޝަން (ޖޭއެސްސީ)ގެ ރައީސް އަލީ ހަމީދު މުހައްމަދުގެ މައްޗަށް ތުހުމަތުކޮށް، ކަސްބީ އަންހެނަކާ އެކު ބަދުއަހުލާގީ އަމަލު ހިންގާ ކަމަށް ބުނާ ވީޑިއޯގެ މައްސަލަ ނުބަލަން ޖޭއެސްސީ ނިންމައިފި އެވެ.
ޖޭއެސްސީން އެގޮތަށް ނިންމިއިރު އެކޮމިޝަނުގެ ރައީސަކީ ވެސް ފަނޑިޔާރު އަލީ ހަމީދު އެވެ. އެކޮމިޝަނުން އެމައްސަލަ ނުބަލަން ނިންމާފައިވަނީ އެއީ ކުރިން ބަލާ ނިންމާފައިވާ މައްސަލައަކަށް ވާތީ ކަމަށް އެކޮމިޝަނުން ބުނެއެވެ.
އެމައްސަލަ އަލުން ޖޭއެސްސީއަށް ހުށަހެޅީ އެ ވީޑިއޯގެ މައްސަލާގައި މީގެ ކުރިން ފުލުހުންގެ އިދާރާއަށް ހާޒިރުކޮށް، ސުވާލުކޮށްފައިވާ ރައްޔިތުންގެ މަޖިލީހުގެ ފޭދޫ ދާއިރާގެ ކުރީގެ މެމްބަރު އަލްހާން ފަހުމީ އެވެ.
އެމައްސަލަ އަލުން ނުބެލޭނެ ކަމަށް އެކޮމިޝަނުން ލިޔުމަކުން ވަނީ އަލްހާނަށް އަންގާފަ އެވެ.
ޖޭއެސްސީން އަލްހާނަށް ފޮނުވާފައިވާ ލިޔުމުގައި ވަނީ ފަނޑިޔާރު އަލީ ހަމީދުއާ ބެހޭ ގޮތުން އެކޮމިޝަނަށް ހުށަހަޅާފައިވާ ޝަކުވާއަކީ އެ ކޮމިޝަނުގެ ތަހުގީގު ޓީމަކުން ތަހުގީގުކުރުމަށް ފަހު، ތަހުގީގު ނިންމާ، ތަހުގީގު ނިމުނު ގޮތުގެ ރިޕޯޓް ޖޫން 19، 2014 ވަނަ ދުވަހު އެކޮމިޝަނަށް ހުށަހެޅުމުން، ޖޫން 25، 2014 ވަނަ ދުވަހު ނިންމާފައިވާ މައްސަލައެއް ކަމަށެވެ.
ޖޭއެސްސީން އެގޮތަށް އެންގުމާ ގުޅިގެން އަލްހާން ކުރައްވާފައިވާ ޓްވީޓެއްގައި ވަނީ "ކުރިއަށް އަޅަންޖެހޭ ފިޔަވަޅުތައް އަޅާނަން" ކަމަށް ވިދާޅުވެފައެވެ.
