ލ. ފޮނަދޫ އިން އެމްޑީޕީގެ މެމްބަރޝިޕްގެ 100 ފޯމް ފުރައިފި ނަމަ އެއް އަހަރު ދުވަހުގެ މުސާރަ އެމްޑީޕީއަށް ހަދިޔާ ކުރާނެ ކަމަށް ފޮނަދޫ ދާއިރާގެ މެމްބަރު އަބްދުއްރަހީމް އަބްދުﷲ ވިދާޅުވެފައި ވާތީ، އެރަށުން އޭނާއަށް ރައްދު ދީފި އެވެ.

ފޮނަދޫގައި އެމްޑީޕީގެ ހަރަކާތްތަކުގައި އިސްކޮށް ހަރަކާތްތެރިވާ މީހަކު "ރާއްޖެއެމްވީ"އަށް ބުނީ އެމްޑީޕީއަށް މެމްބަރުން އިތުރު ކުރުމަށް މަސައްކަތްތަކެއް ކުރަމަށް ރާވާފައި ވަނިކޮށް، ތިން ދުވަހުގެ ތެރޭގައި 100 ފޯމް ވެސް އެމްޑީޕީއަށް ހަމަ ނުކުވޭނެ ކަމަށް މެމްބަރު އަބްދުއްރަހީމް ވިދާޅުވުމުން އެކަން ވާނެ ކަމަށް އަބްދުއްރަހީމަށް ދައްކާލުމުގެ ގޮތުން ތިން ދުވަހުގެ ތެރޭގައި 100 އަށް ވުރެ ގިނަ އެމްޑީޕީގެ މެމްބަރުޝިޕް ފޯމް ފުރާފައިވާ ކަމަށެވެ.

މިދިޔަ އަންގާރަ ދުވަހު ރައްޔިތުންގެ މަޖިލީހުގެ ޖަލްސާގައި ވާހަކަ ދައްކަވަމުން ފޮނަދޫ ދާއިރާގެ މެމްބަރު އަދި ޕީޕީއެމްގެ ނާއިބު ރައީސް އަބްދުއްރަހީމް ވަނީ އެމްޑީޕީއަށް ގޮންޖައްސަވާފަ އެވެ. އަބްދުއްރަހީމް ވިދާޅުވީ ފޮނަދޫއިން ތިން ދުވަހުގެ ތެރޭގައި 100 ފޯމް އެމްޑީޕީއަށް ހަމަކޮށްފި ނަމަ އޭނާގެ އެއް އަހަރު ދުވަހުގެ މުސާރަ އެމްޑީޕީއަށް ހަދިޔާ ކުރައްވާނެ ކަމަށެވެ.

"މިދިއަ ހަފްތާގައި ރަށަށް ގޮސްފަ އެއްދުވަހު ހެނދުނު 9 ޖެހިއިރު، އަޅުގަނޑުގެ ގޭގައި މޭޒެއް ބަހައްޓާފަ، އަޅުގަނޑު ދަންނަވާލީ އަޅުގަނޑު ބޭނުމޭ މިއަދު ފޯމް ފުރާލަން. އަޅުގަނޑު އެއްވެސް ގެއަކަށް ފޯމް ފުރާކަށް ނުދަން. އެއްވެސް ރައްޔިތަކަށް މަޖުބޫރެއް ނުކުރަން. 9 ޖެހިއިރު ފެށީ ހަވީރު 4 ޖެހިއިރު 300 ފޯމް އަޅުގަނޑު ފުރިން ޕީޕީއެމަށް. ވަޑައިގަންނަވާ އަޅުގަނޑުމެންނާއެކީގައި. އެމްޑީޕީގެ ބޭފުޅުން ތިން ދުވަހު މަސައްކަތްކޮށްގެން 100 ފޯމް ފޮނަދޫއިން އެމްޑީޕީއަށް ފުރައިފިއްޔާ އަޅުގަނޑުގެ އެއް އަހަރު ދުވަހުގެ މުސާރަ އެމްޑީޕީއަށް ހަދިޔާ ކުރާނަން. ލާހިކެއް ނޫން 100 ފޯމް ހަމަކުރާކަށް،" އަދުރޭ ވިދާޅުވެފައި ވެއެވެ.

އޭނާ ބުނީ ތިން ދުވަހުގެ ތެރޭގައި އެމްޑީޕީއަށް 100 ފޯމް ހޯދައިފި ނަމަ އެއް އަހަރު ދުވަހުގެ މުސާރަ އެމްޑީޕީއަށް ހަދިޔާ ކުރައްވާނެ ކަމަށް އަބްދުއްރަހީމް ވިދާޅުވިޔަސް، އަބްދުރަހީމް އަތުން ލޯލާރިއެއް ވެސް ބޭނުން ނުވާ ކަމަށާއި ދައްކާލަން ބޭނުންވަނީ ސަރުކާރުން ކިތައްމެ ބިރެއް ދެއްކި ނަމަވެސް އެމްޑީޕީއަށް މެމްބަރުން ވަންނަމުންދާކަން ކަމަށެވެ. އަދި ފޮނަދޫގައި ހިންގި ހަރަކާތަކީ އެމްޑީޕީއަށް މީހުން ވަންނަމުންދާކަން އަބްދުއްރަހީމަށް ދައްކާލުމުގެ ގޮތުން ހިންގި ކުއްލި ހަރަކާތެއް ކަމަށް ވެސް އޭނާ ބުންޏެވެ.

އޭނާ ބުނީ އެމްޑީޕީއަށް ސަޕޯޓް ކުރާ ރައްޔިތުންނަށް ބޮޑަށް ހިތްވަރު އައީވެސް އަބްދުއްރަހީމް އެމްޑީޕީއަށް ގޮންޖައްސަވާފައި ދެއްކެވި ވާހަކަތައް މުޅި މީޑިއާ އާއި ރަށުތެރޭގަ އިވެން ފެށުމުން ކަމަށެވެ. އޭނާ ބުނީ އެމްޑީޕީއަށް މެމްބަރު އިތުރު ކުރުމަށް ހިންގަން ރާވާފައިވާ ހަރަކާތް ކުރިއަށް އޮތް ދުވަސްތަކުގައި ވަރުގަދަވާނެ ކަމަށެވެ.