ރައީސުލްޖުމުހޫރިއްޔާގެ ނައިބު ފައިސަލް ނަސީމް ތިލަދުންމަތީ އުތުރުބުރީގެ ބައެއް ރަށްރަށަށް މިހާރު ކުރައްވަމުން ގެންދަވާ ދަތުރުފުޅުގައި އެއަތޮޅުގެ މޮޅަދޫއަށް ވަޑައިގަންފިއެވެ.
ނައިބް ރައީސް މޮޅަދޫއަށް ކުރެއްވި މި ދަތުރުފުޅުގައި އެރަށުގެ ރައްޔިތުންނާ މުހާތަބްކުރައްވައި ވާހަކަފުޅުދައްކަވަމުން ވިދާޅުވީ، މޮޅަދޫގެ އިޖްތިމާއީ ކަންކަން ރަނގަޅުކުރުމަށް ސަރުކާރުން މަސައްކަތް ކުރައްވާނެކަމަށެވެ. އަދި ރަށުގެ ރައްޔިތުން ބޭނުންވެފައިވާ ކަންކަން ކުރުމުގައި ކައުންސިލްގެ މަޝްވަރާއާއިއެކު މަސައްކަތްކުރައްވާނެކަމަށްވެސް އެމަނިކުފާނު ވިދާޅުވި އެވެ.
ރައީސުލްޖުމްހޫރިއްޔާގެ ނައިބުގެ މި ޒިޔާރަތުގައި މޮޅަދޫގެ ސުކޫލަށާއި، ޞިއްޙީ މަރުކަޒުގެ އިތުރުން އިންޖީނުގެއަށް ޒިޔާރަތްކުރައްވާ އެ މުއައްސަސާތަކުގެ މުއައްޒަފުންނާ ބައްދަލުކުރައްވައި އެތަންތަނުގެ މަސައްކަތްތައް ކުރިއަށްދާގޮތް އޮޅުންފިލުއްވައި، އެތަންތަނުގެ މިހާރުގެ ހާލަތުވަނީ ބައްލަވައިލައްވައިފައެވެ.
ނައިބު ރައީސްގެ މި ދަތުރުފުޅުގައި މޮޅަދޫ ކައުންސިލް މެންބަރުންނާ ބައްދަލުކުރެއްވުމަށްވެސް ވަނީ ހަމަޖެހިފައެވެ.
