ލިޔޯން އަށް ކުޅެމުން އަންނަ ފްރާންސްގެ ފޯވާޑް ނަބިލް ފެކީރް އެ ކްލަބް ދޫކޮށްލަން އުޅޭކަމަށް ރިޕޯޓްތައް ބުނެފިއެވެ.

ރިޕޯޓްތައް ބުނާ ގޮތުން މި ސީޒަނަށް ފަހު ލިޔޯން ދޫކޮށްލަން ފެކީރް ވަނީ ކުރިން ވެސް ނިންމާފައެވެ. ނަމަވެސް އޭނާ ބަދަލުވާން އުޅޭ ކްލަބެއް އަދި ކަށަވަރެއް ނުވެއެވެ.

ލިޔޯންގެ ރައީސް ޖީން މިޝޭލް އައުލަސް ވިދާޅުވީ، ފެކީރްގެ ޓްރާންސްފާއާ ގުޅޭ އެއްވެސް މައުލޫމާތެއް މި ވަގުތު ނެތް ކަމަށާއި، އޭނާ ކްލަބުގައި މަޑުކުރާނެކަން އަދި ކަށަވަރުނުވާ ކަމަށެވެ.

ފެކީރް ހޯދުމަށް މިދިޔަ އަހަރުވެސް ގިނަ ކްލަބްތަކުން ވަނީ މަސައްކަތްކޮށްފައެވެ. ނަމަވެސް މިދިޔަ އަހަރު އޭނާ ދޫކޮށްލަން ލިޔޯން އިން ވަނީ ދެކޮޅު ހަދައި، ހުށަހެޅި ހުށަހެޅުންތައް ބަލައިނުގަންނަން ނިންމާފައެވެ.

ކުރިޔަށް އޮތް ސީޒަނަށް އަމާޒުކޮށް ގިނަ ކްލަބްތަކުން ފެކީރްއަށް ފާރަލަމުން އަންނައިރު، ލިޔޯންއިން މިފަހަރު އޭނާ ވިއްކާލާނެ ކަމަށް ބެލެވެއެވެ.

ލިޔޯންގެ ޔޫތު ސިސްޓަމުން ތަމްރީންވި ފެކީރް ވަނީ އެ ޓީމަށް 192 މެޗު ކުޅެދީ 69 ލަނޑު ޖަހައިދީފައެވެ. އޭނާ ލިޔޯންއަށް އެންމެ ފުރަތަމަ މެޗެއް ކުޅެދިނީ 2013 ވަނަ އަހަރުއެވެ. ލިޔޯންގެ ކެޕްޓަން ކަން ވެސް ކުރަމުން އަންނަ ފެކިރް އަންނަނީ އެ ކްލަބުގައި މޮޅު ކުޅުމެއް ދައްކަމުންނެވެ.

ފްރާންސް ގައުމީ ޓީމަށް ކުޅުނު 21 މެޗުގައި ދެ ލަނޑު ކާމިޔާބުކޮށްފައިވާ ފެކީރް ވަނީ އެ ޓީމާ އެކު 2018 ވަނަ އަހަރު ފީފާ ވޯލްޑް ކަޕް ވެސް ކާމިޔާބުކޮށްފައެވެ.