މައާފުދިނުމާއި އަދަބު ލުއިކޮށްދިނުމުގެ ގާނޫނުގެ ދަށުން ރައީސުލްޖުމްހޫރިއްޔާ މައާފުދެއްވި ފަރާތްތައް މިނިވަންކުރުމުގެ ތެރޭގައި، މައާފުނުދެއްވާ ގައިދީއަކު މިނިވަންވި މައްސަލައެއް ބަލަން ފަށައިފި އެވެ.
ހޯމް މިނިސްޓްރީން ބުނީ ރައީސް އަދަބު ލުއިކޮށްނުދެއްވާ ގައިދީއަކު ޖަލުން ދޫކޮށްލާފައިވާކަމަށް މިނިސްޓްރީ އަށް މައުލޫމާތު ލިބިފައިވާ ކަމަށެވެ. އަދި އެކަން އިތުރަށް ބެލުމަށް މިނިސްޓަރު އިމްރާން އަންގަވާފައިވާތީ އެކަން ހިނގައިދިޔަގޮތް ބަލާފައިވާ ކަމަށެވެ.
ހޯމް މިނިސްޓްރީން ބުނީ އެމައްސަލަ އިތުރަށް ބަލާ ދިރާސާކޮށް އަޅަންޖެހޭ އިދާރީ ފިޔަވަޅު އެޅުމަށް ކަރެކްޝަންސް އަށް އަންގާފައިވާ ކަމަށާއި އެކަމުގެ ތަހުގީގެއް ހިންގުމަށް ފުލުހުންނަށްވެސް އަންގާފައިވާ ކަމަށް ހޯމް މިނިސްޓްރީ އިން ބުންޏެވެ.
ގަވާއިދާ ޚިލާފަށް މިނިވަންވި ގައިދީ މިވަގުތު ހުރީ ތަހުގީގުގެ ބޭނުމަށް ބަންދުކުރެވިފައިވާ ކަމަށް ހޯމް މިނިސްޓްރީން ބުންޏެވެ.
