އިންޑިޔާގެ ބޮޑު ވަޒީރު ނަރެންދުރަ މޯދީ ހޮނިހިރު ދުވަހު ރައްޔިތުންގެ މަޖިލީހުގައި ތަގްރީރް ކުރައްވާ ޖަލްސާ ބޮއިކޮޓް ކުރައްވާނެ ކަމަށް މަހިބަދޫ ދާއިރާގެ މެމްބަރު އަހްމަދު ތޯރިގް (ޓޮމް) ވިދާޅުވެއްޖެއެވެ.
ޓޮމް އޭނާގެ ފޭސްބުކް އެކައުންޓްގައި ކުރެއްވި ޕޯސްޓެއްގައި ވަނީ އިންޑިޔާގެ ބޮޑު ވަޒީރު ނަރެންދުރަ މޯދީ، ރައްޔިތުންގެ މަޖިލީހުގައި ތަގްރީރް ކުރެއްވުމަށް ފެންނަ ކަމަށް ނެގި ވޯޓުގައި ވެސް ބައިވެރިވަޑައިނުގަންނަވާ ކަމަށެވެ.
"އިންޑިއާގައި މުސްލިމުންނާ ދޭތެރޭގައި ހިންގާ ލާ އިންސާނީ އަމަލުތަކާއި ދުއްތުރާތަކަށް އިހުތިޖާޖު ކުރުމުގެ ގޮތުން، ޕްރައިމް މިނިސްޓަރު މޯދީގެ ސްޕީޗް ދިނުމުގެ ކުރިން ޖަލްސާ ދޫކޮށް ނުކުންނާނެ ވާހަކަ ދާއިރާގެ ރައްޔިތުންނަށް ދަންނަވަން،"އަހްމަދު ތޯރިގް
ރައްޔިތުންގެ މަޖިލީހުގެ ޖަލްސާ އިރުއޮއްސި 6:45 އަށް އެޖެންޑާކޮށްފައި އޮތް މައްސަލައަށް އަލިއަޅުއްވާލައްވަމުން ތޯރިގް ވިދާޅުވީ، ޖަލްސާ އެގަޑިއަށް އެޖެންޑާ ކުރުމަކީ ރާއްޖެ ސެކިއުލާ ސްޓޭޓްއަކަށް ބަދަލުކުރުމުގެ ފުރަތަމަ ފިޔަވަޅު ކަމަށެވެ.
"ދީނާއި ސިޔާސަތު ވަކިކުރާ ސެކިއުލަރ ވިސްނުމަށް ވަކާލާތު ކުރާ ފަރާތްތަކުން ރާއްޖެ، ސެކިއުލަރ ސްޓޭޓް ސްޓޭޓަކަށް ބަދަލު ކުރުމުގެ ފުރަތަމަ ފިޔަވަޅަކީ، ރައްޔިތުންގެ މަޖިލީހުގެ ޖަލްސާ މަޣްރިބް ނަމާދާއި ދޭތެރެއަށް ހަމަޖެއްސުން،" ތޯރިގް ވިދާޅުވިއެވެ.
މަޣްރިބް ނަމާދާއި އިޝާނަމާދާ ދޭތެރޭގައި ޖަލްސާ ބާއްވާތީ ތޯރިގްގެ އިތުރުން މަޖިލީހުގެ ބައެއް އެހެން މެންބަރުންނާއި އާންމުން ވެސް އެތައް ބަޔަކު ދަނީ ސޯޝަލް މީޑިއާގައި ފާޑުކިޔަމުންނެވެ.
ގައުމެއްގެ އިސްވެރިއަކަށް އެ ގައުމެއްގެ ގާނޫނު ހަދާ މަޖިލީހުގައި ތަގްރީރް ކުރެއްވުމުގެ ޝަރަފް އަރުވަނީ، އެ ފަރާތަކަށް އެރުވޭ އެންމެ މަތީ ޝަރަފް އެރުވުމުގެ ގޮތުންނެވެ.
