މަލީކު އަކީ މިހާރު ރާއްޖޭގެ ރައްޔިތުންނަށް އާ ނަމަކަށް ނުވާނެއެވެ. ދިވެހިންގެ ހިތްތަކުން ފުރިހަމައަށް ލޯބި ހޯދާފައިވާ އަދި ގިނަ ބައެއްގެ ހިތްތަކުން ޖާގަ ހޯދާފައިވާ މަލީކުގެ ކުޅަދާނަކަން މިދިޔަ އަހަރު ރާއްޖެޓީވީން ރަމަޟާން މަހަށް ޚާއްސަކޮށްގެން ގެނެސްދިން "ހީލަމާ" ޝޯއިން ފެނިގެން ގޮސްފައިވީ ނަމަވެސް މަލީކުގެ މަޝްހޫރުކަން އިތުރުވެގެންދިޔައީ ދާދިފަހުން ސޯޝަލް މީޑިއާގައި އާންމުވި ވީޑިއޯއެއްގެ ސަބަބުންނެވެ.
އެ ވީޑިއޯއިން ފެންނަނީ ރައީސް ސޯލިހު މިސްކިތުން ނުކުންނަވަމުން މަލީކުއާ ސަލާމް ކުރައްވާއިރު، "ތިދަނީ ކޮންތާކަށްހޭ" އަހައި މަލީކު ރައީސް އަރިހުގައި ސުވާލުކުރާ ތަނެވެ. އަދި ރައީސް ވަޑައިގަންނަވަނީ ގެކޮޅަށޭ ވިދާޅުވުމުން ގެއަށް ކިޔަނީ ކޮން ނަމެއްތޯ މަލީކު ސުވާލުކުރެއެވެ. އެހިސާބުން ސަމާސާ ރާގެއްގައި ރައީސް "އެނގޭނެއޭ" ވިދާޅުވުމުން މަލީކު މުލިއާގެ ކަމަށް ވިދާޅުވާ ގޮތުން ގިނަ ބައެއްގެ ހިތުން މަލީކު ވަނީ ޖާގަ ހޯދާފައެވެ. މަލީކުގެ ސަކަ، ހިތްހެޔޮ މިޒާޖު ގިނަ ބަޔަކަށް އެހިސާބުން ވަނީ ކަމުގޮސްފައެވެ. "މިސްކިތު ފުރެންޑު"ގެ ނަމުން މަލީކު މަޝްހޫރުވީ އެހިސާބުންނެވެ.
އަނެއްކާ ވެސް މަލީކު މިވަނީ ހަމަ އެގޮތަށް އެންމެން ހައިރާން ކޮށްލުވާފައެވެ. އެލައިޑް އިންޝުއަރެންއިން މަދިރި ނައްތާލުމަށް ހޭލުންތެރި ކުރުމަށް ތައްޔާރު ކުރި ވީޑިއޯގެ ސަބަބުން މިވަނީ އަނެއްކާ ވެސް މަލީކުގެ ޖާދޫގައި ގިނަ ބަޔަކު ޖައްސާފައެވެ.
ވީޑިއޯއިން ފެންނަނީ އީދު ނަމާދަށް ފަހު މަލީކު ހެނދުނު ސަޔަށް އިންސާފު ކުރުމަށް އާއިލާއާއެކު ސުފުރާ މަތީގައި އިންނަ މަންޒަރެވެ. ކާން އިނދެފައި މަލީކުގެ ކާފަ "މިސްކިތު ފުރެންޑް ބުނީ ކީކޭތޯ" ސުވާލު ކުރުމުން މަލީކު ދޭ ޖަވާބު ވަރަށް ވެސް ފުރިހަމައެވެ.
އެހެން މީހުންގެ ތިބެނީ ފޭސްބުކް ފްރެންޑްސް، މަލީކުގެ ހުންނާނީ މިސްކިތު ފްރެންޑްސްމަލީކު ބުނެއެވެ.
އެއަށް ފަހު އީދު ހަދިޔާ ބަދަލުކުުރުމުގެ ތެރޭގައި ދެކެވުނު ވާހަކައިގެ ތެރޭގައި "މަލީކަކީ ވަރަށް ޤައުމީ ކުއްޖެއް" ކަމަށް އޭނާ ބުނުމުން އީދުގައި މަލީކު ޤައުމަށް ކޮށްދޭނީ ކޮންކަމެއްތޯ އާއިލާ މެމްބަރަކު ސުވާލު ކުރެއެވެ. އެ ސުވާލަށް ޖަވާބުދެމުން މަލީކު ބުނީ ޤައުމަށްޓަކައި ޚާއްސަ ކެމްޕެއިންއެއް ކުރަން އުޅޭ ކަމަށެވެ.
މަލީކުގެ ފްރެންޑް އަމީން ބަލިވީ، ޗިކުންގުންޔާ ޖެހިގެން އެހެންވެ ކެމްޕެއިން ކުރަން މި އުޅެނީ، ދެން ޗޮކެއް ޖަހާލަބަ. މިއުޅެނީ މަދިރި ނައްތާލަންވެގެން ކެމްޕެއިން ކުރަން، މަދިރި ގިނަވީމަ ޑެންގީއާ ޗިކުންގުންޔާ ގިނަވަނީ، މިސްކިތުން އައި އިރު ދުށިން ސާފުނުކޮށް ހުރި ތަންތަން، އެތަންތާ މަދިރި ބިސް އަޅަނީ، ދެން ފެތުރެނީ ބަލި، އެހެންވީމާ އެންމެން އެބަ ޖެހޭ މަދިރި ހޯހޯއޭ ބުނަން،މަލީކު ވާހަކަ ދައްކަމުން ބުންޏެވެ.
އެހިސާބުން އާއިލާ މެމްބަރަކު މަލީކު ގާތުން ކެމްޕެއިން ފަށަނީ ކޮންއިރަކުތޯ އަހާލުމުން ކެމްޕެއިން ފެށުމުގެ ކުރިން މުހިއްމު ފޯން ކޯލެއް ކުރަންޖެހޭ ކަމަށް މަލީކު ބުނެއެވެ. އެގޮތުން މަލީކު ބުނަނީ ކެމްޕެއިން ފެށުމުގެ ކުރިން ގާތް ރައްޓެއްސަކަށް ގުޅާލަންޖެހޭ ކަމަށެވެ. އަދި އެއީ ކޮން ގެއެއްގައި އުޅޭ ރައްޓެއްސެއްތޯ އެހުމުން މިފަހަރުވެސް މަލީކުގެ ސަމާސާ ރާގުގައި "މުލިއާގެ" އޭ ބުނެއެވެ.
މަދިރި ހޯހޯ ކެމްޕެއިންއާ ގުޅޭގޮތުން އެލައިޑުން ތައްޔާރުކުރި މަލީކުގެ މި ވީޑިއޯ ގިނަ ބަޔަކަށް ކަމުގޮސްފައިވާއިރު، ރައީސް ސޯލިހުވެސް ވަނީ އެމަނިކުފާނުގެ "މިސްކިތު ފްރެންޑު" ގެ މަދިރި ހޯހޯ ކެމްޕެއިން މެސެޖު ވަރަށް ޚާއްސަ ކަމަށް ވިދާޅުވެ ޓްވީޓު ކުރައްވާފައެވެ.
ކޮންމެއަކަސް ކުޑަކުދިންނާ އަބަދުވެސް ގާތްކަމެއް ބަހައްޓަވާ ރައީސް ޞާލިހާއި އެމަނިކުފާނުގެ މިސްކިތު ފްރެންޑުގެ ވާހަކަތައް ދިވެހިންނަށް މިވަނީ ވަރަށް ކަމުގޮސްފައެވެ.
