މާލެއިން ހުޅުމާލެއަށް ދުއްވާފައި ދިޔަ ވެހިކަލަކުން ބްރިޖު ހައިވޭގެ ރޯޑް ޑިވައިޑަރތަކުގައި ޖެހި ފުނޑުފުނޑުވެފައިވާއިރު، އެ ވެހިކަލް ހޯދުމުގެ މަސައްކަތް ފުލުހުން ފަށައިފިއެވެ.

އެކަމާ ގުޅިގެން ފުލުހުންގެ މީޑިއާ އޮފިޝަލު ވިދާޅުވީ، މި ހާދިސާ ފުލުހުންނަށް ރިޕޯރޓް ކޮށްފައި ވަނީ އަންގާރަ ދުވަހުގެ ހެނދުނު 10:15 ހާއިރު ކަމަށާއި، ވެހިކަލް ޖެހުމުގެ ސަބަބުން ޑިވައިޑަރގެ ބޮޑު ބައެއް ހަލާކުވެފައިވާ ކަމަށެވެ. އަދި އެކްސިޑެންޓްވި ވެހިކަލް މަޑުނުކޮށް ގޮސްފައިވާ ކަމަށާއި، އެ ވެހިކަލް ހޯދުމުގެ މަސައްކަތް ފުލުހުން ކުރަމުންދާ ކަމަށް ވެސް އޭނާ ވިދާޅުވިއެވެ.

މި މައްސަލަ ފުލުހުން ތަހުޤީޤު ކުރަމުން ދާއިރު، އެކްސިޑެންޓްވި ވެހިކަލްއާ ގުޅޭ ގޮތުން ފުލުހުންގެ މީޑިއާ އޮފިޝަލު "ރާއްޖެއެމްވީ" އަށް ވިދާޅުވީ، އެކްސިޑެންޓް ވެފައިވަނީ ކާރެއް ކަމަށެވެ.

މީގެ ކުރިން ވެސް އެކި ފަހަރުމަތިން ބްރިޖްގެ ޑިވައިޑަރތައް ހަލާކުވެފައި ވެއެވެ. އަދި ބްރިޖްގެ ހަލާކުވެފައިވާ ބައެއް އަދިވެސް ހުރީ މަރާމާތު ނުކޮށްކަން ފާހަގަކޮށްލެވެއެވެ.

މި ފަހަކަށް އައިސް އެކްސިޑެންޓްތައް ހިނގާ މިންވަރު އިތުރުވެފައިވާއިރު، މަގުމަތީގެ ސަލާމަތާއި ރައްކާތެރިކަމާ ގުޅޭ ހަރަކާތެއް މީސްމީޑިއާގައި ވެސް ވަނީ ފަށާފައެވެ. އެގޮތުން މި ވަރުގެ ގައުމެއްގައި މިހާ ވަރަށް އެކްސިޑެންޓްތައް ހިނގުމަކީ ގަބޫލު ކުރެވޭނެ ކަމެއް ނޫން ކަމަށާއި، ނުރައްކާތެރި އެކްސިޑެންތްތަކުގެ ސަބަބުން އެތައް ބައެއްގެ ފުރާނަ ގެއްލިފައިވާއިރު، މިފަދަ މަންޒަރުތަކަކީ ގަބޫލު ކުރާ އަދި ދެކެން ބޭނުންވާ ކަންކަން ނޫން ކަމަށް މި ހަރަކާތް ރަސްމީކޮށް ފައްޓަވައި ދެއްވަމުން ނައިބު ރައީސް ފައިސަލް ނަސީމް ވަނީ ވިދާޅުވެފައެވެ.