ލ. ފޮނަދޫ ބަންޑާރަ ބިމެއްގައި ހުރި ގެއެއްގައި، ހަށިވިއްކުމާއި މަސްތުވާތަކެތި ބޭނުންކުރުމުގެ އިތުރުން ރޯދަ މަހު ދުވާލު ކައިބޮއި އުޅުނު ކަމުގެ މައްސަލައެއް ފެންމަތިވެ، އެ ގެ ރޫޅާލައިފިއެވެ.
މި ގެ ރޫޅާލާފައިވަނީ ފުލުހުންގެ އެހީގައި އެރަށު ކައުންސިލުންނެވެ. އެގޮތުން، ފުލުހުން ވަނީ އެތަން ރޫޅުމުގެ މަސައްކަތް ކުރިއަށް ދިޔަ ވަގުތު އެތަނުގެ ސެކިއުރިޓީ ބަލަހައްޓައިދީފައެވެ.
ފުލުހުންގެ މީޑިއާ އޮފިޝަލް ވިދާޅުވި ގޮތުގައި އެގޭގައި އެފަދަ ދީނާއި ހިލާފު ކަންކަން ކުރަމުންދާކަމުގެ މައުލޫމާތު އެރަށު މީހުން ވަނީ ފުލުހުންނަށާއި އެރަށު ކައުންސިލަށް ވެސް ހުށަހަޅާފައެވެ.
އެ ރަށުގެ ކުރިމަގު އަވަށުގެ ވަލުތެރޭގައި ބިނާކޮށްފައިވާ މި ގެއަކީ ކައުންސިލުގެ ހުއްދައާއި ނުލައި ބިނާކޮށްފައިވާ ގެއެއް ކަމަށް ފޮނަދޫ ކައުންސިލުން މައުލޫމާތު ދީފައިވާ ކަމަށް ވެސް މީޑިއާ އޮފިޝަލް ވިދާޅުވިއެވެ.
މި މައްސަލަ ފުލުހަށް ހުށަހަޅާފައިވަނީ މިމަހުގެ ޖޫން މަހުގެ އެއްވަނަ ދުވަހުއެވެ.
