ރަށްތަކުގެ ރައްޔިތުންގެ ޙާލަތު އެންމެ ރަނގަޅަށް އެނގޭނީ އެރަށްތަކަށް ދަތުރުކޮށް އެފަރާތްތަކާއި ބައްދަލުކޮށްގެން ކަމަށް ޔޫތު މިނިސްޓަރ އަހުމަދު މަހްލޫފް ވިދާޅުވެއްޖެއެވެ.

ރާއްޖެޓީވީގެ ފަލަސުރުޚީ ޕްރޮގްރާމްގައި އާދިއްތަ ދުވަހުގެ ރޭ ވާހަކަ ދައްކަވަމުން މިނިސްޓަރ މަހުލޫފް ވިދާޅުވީ ސިޔާސީ ދާއިރާގައި މިވީ ފަނަރަ ވަރަކަށް އަހަރުގެ ތެރޭގައި ރާއްޖޭގެ ހުރިހާ ރަށްތަކަށް ދަތުރު ކުރެވިއްޖެ ކަމަށާއި އެހެންކަމުން މަޖާކޮށްލުމަށް ނުވަތަ ރެސްޓް ނަގާލުމަށް އެއްވެސް ރަށަކަށް ދާން ނުޖެހޭ ކަމަށެވެ. އަތޮޅުތަކުގެ ރަށްތަކަށް ދަތުރު ކުރަނީ މާތް މަގުސަދެއްގައިކަން ފާހަގަ ކުރައްވާ މަހްލޫފް ވިދާޅުވީ އެރައްޔިތުން ޚާއްސަކޮށް ޒުވާނުންގެ ކަންބޮޑުވުންތަކާއި އެމީހުންގެ އިހްސާސްތަކާއި ބޭނުންތައް އެންމެ ގާތުން އެންމެ ރަނގަޅަށް އެނގެނީ އެމީހުންގެ ގާތަށް ގޮސްގެން ކަމަށެވެ. އަދި ކުރަންވީ ކަމަކީ އެއީ ކަމަށް ވެސް މިނިސްޓަރ ވިދާޅުވިއެވެ.

މީގެ އިތުރުން މިނިސްޓަރ ވިދާޅުވީ ރަށްތަކަށް ކުރަމުންދާ ދަތުރުތަކުން އެރައްޔިތުން ބޭނުންވާ ކަންކަން ދެނެގަންނަ ކަމަށާއި އަދި އެއަށް ފަހު އެކަން ހައްލު ކޮށްދިނުމަށްޓަކައި މަސައްކަތްތަކެއް ކުރަމުން ދާކަމަށެވެ.

މަހްލޫފް އިތުރަށް ވިދާޅުވީ މިސަރުކާރުގެ މަސައްކަތުގެ ސްޕީޑް ދަށްވެގެން ނުވަތަ މެގަ ޕްރޮޖެކްޓްތަކެއް ހިންގާފައި ނުވާތީ ކަންބޮޑު ނުވާ ކަމަށާއި ކުރިއަށް މިއޮތް ދުވަސްތަކުގައި ރައްޔިތުންނަށް ލާބަޔާއި މަންފާ ހުރި ކަންތައްތަކެއް މިސަރުކާރުން ކޮށްދޭނެ ކަމަށެވެ.