ފެނަކައިގެ ހިދުމަތްތައް ރައްޔިތުންނަށް އެކަށީގެންވާ ގޮތެއްގައި ފޯރުކޮށްދިނުމަށް މިހާތަނަށް 135 މިލިޔަން ރުފިޔާ ޚަރަދުކުރެވިފައިވާ ކަމަށް ފެނަކަ ކޯޕަރޭޝަންގެ މެނޭޖިން ޑިރެކްޓަރ އަހުމަދު ސައީދު މުހައްމަދު ވިދާޅުވެއްޖެއެވެ.

ފެނަކައިން މިހާރު ކުރަމުންދާ މަސައްކަތްތަކާއި ކުރެވިފައިވާ މަސައްކަތްތަކުގެ ތަފްސީލް މީޑިޔާތަކާއި ހިއްސާކުރުމަށް ބޭއްވި ނޫސްވެރިންގެ ބައްދަލުވުމުގައި ވާހަކަދައްކަވަމުން ސައީދު ވިދާޅުވީ ރޯދަމަހަށް ކަރަންޓް ބޭނުންކުރާ މިންވަރު އިތުރުވެދާނެތީވެ، މިއަދާ ހަމައަށް 48 ޖަނަރޭޓަރު އެކި ރަށްރަށަށް ގެންދެވިފައިވާނެ ކަމަށެވެ.

ސައީދު ވިދާޅުވީ މި ހިދުމަތް ރައްޔިތުންނަށް އެކަށީގެންވާ ހަރުދަނާ ނިޒާމަކުން ފޯރުކޮށްދިނުމަށްޓަކާ ތަފާތު ގޮންޖެހުންތަކާއި ކުރިމަތިލާންޖެހުނު ކަމަށާއި، ހާއްސަކޮށް ރޯދަމަހު އުއްމީދުނުކުރާ ގޮންޖެހުންތަކާ ކުރިމަތިލާންޖެހުނު ކަމަށެވެ.

ކަރަންޓްގެ ހިދުމަތް ރައްޔިތުންނަށް ހަރުދަނާ ގޮތަކަށް ފޯރުކޮށްދިނުމަށްޓަކާ މިހާތަނަށް 13 ޕަވަރ ހައުސްއެއް އިއުލާންކުރެވި އިވެލުއޭޓް ކުރުމުގެ މަރްހަލާގައިވާ ކަމަށާއި، އޭގެ ބައެއް މަސައްކަތްތައް މިހާރު ފެށިފައިވާ ކަމަށް ސައީދު ވިދާޅުވިއެވެ.

ސައީދު ވިދާޅުވީ ކުރިއަށް އޮތް ތިން އަހަރުގެ ތެރޭގައި 56 ރަށެއްގެ އިންޖީނުގެ ރީލޮކެޓް ކުރުމާއި، އާ އިންޖީނުގެތައް އެޅުމުގެ މަޝްރޫއުތައް އެކުލަވާލެވިފައިވާ ކަމަށެވެ.

ސައީދު ވިދާޅުވީ ކަރަންޓްގެ މައްސަލައެއް ދިމާވެއްޖެ ނަމަ، ވީހާވެސް އަވަހަށް އެ މައްސަލަ ހައްލުކުރުމުގެ މަސައްކަތް ކުންފުނިން ކުރަމުން އަންނަ ކަމަށާއި، ކުންފުނި އަބަދުވެސް އޮންނާނީ ރައްޔިތުންގެ ހިދުމަތުގައި ކަމަށެވެ.