ސައުދީ އަރަބިއްޔާގައި މިހާރު ކުރިއަށްދާ 14 ވަނަ އިސްލާމިކް ސަމިޓް ކޮންފަރެންސްގައި ބައިވެރިވަޑައިގަތުމަށް ރާއްޖޭގެ ޚާރިޖީ ވަޒީރު އަބްދުﷲ ޝާހިދު އެ ގައުމަށް ފުރާވަޑައިގެންފިއެވެ.
ޝާހިދު ސައުދީއަށް ފުރާވަޑައިގެންފައި ވަނީ އަންގާރަ ދުވަހުއެވެ. މި ކޮންފަރެންސް ބޭއްވުމަށް ހަމަޖެހިފައި ވަނީ ސައުދީ އަރަބިއްޔާ މައްކާގައެެވެ. ޝާހިދު ވިދާޅުވީ މި ކޮންފަރެންސްގައި އިސްލާމީ އުއްމަތަށް ދިމާވަމުންދާ މައްސަލަތަކާ ބެހޭ ގޮތުން މަޝްވަރާ ކުރައްވާނެ ކަމަށެވެ.
ފޮރިން މިނިސްޓަރު ކަމުގެ މަގާމާ ހަވާލުވެވަޑައިގަތުމަށް ފަހު ރާއްޖެ އާއި އެހެން ގައުމުތަކާ ދެމެދު އޮންނަ ގުޅުން ބަދަހިކުރެއްވުމަށް ޝާހިދު ގެންދަވަނީ އެކި ގައުމުތަކަށް ވަޑައިގަންނަވަމުންނެވެ. ކުރީގެ ސަރުކާރުގައި ރާއްޖެ ޚާރިޖީ ގުޅުންތައް ވަނީ ވަރަށް ބޮޑަށް ހީނަރުވެފައެވެ.
