ކުރިއަށް އޮތް 19 ވަނަ ރައްޔިތުންގެ މަޖިލީސް ހިނގާނީ ޤާނޫނު އަސާސީ އާއި އެއްގޮތަށް ކަމަށާއި، އެ މަޖިލީހުގެ މަސައްކަތްތަކުން ތަފާތު ފެންނާނެކަމަށް ރައީސް މުހައްމަދު ނަޝީދު ވިދާޅުވެއްޖެ އެވެ.

19 ވަނަ ރައްޔިތުންގެ މަޖިލީހުގެ ރައީސްކަމަށް، ރައީސް މުހައްމަދު ނަޝީދުގެ ނަން ހުށަހެޅުމަށް ފާސްކުރުމާއެކު ނޫސްވެރިންނަށް މައުލޫމާތުދެއްވަމުން އެމަނިކުފާނު ވިދާޅުވީ މަޖިލީހުގެ ރައީސްކަމަށް ކުރިމަތިލެއްވުމަށް ނިންމެވީ ކުރިމަތިވެފައިވާ އުދަނގޫ ހާލަތަށް ބެލުމަށްފަހުގައި ކަމަށެވެ. އަދި މެމްބަރުންގެ އެދިވަޑައިގަތުމުން އެ ހުށަހެޅުން ގަބޫލުފުޅުކުރެއްވީ ކަމަށް އެމަނިކުފާނު ވިދާޅުވި އެވެ.

ރައީސް ނަޝީދު ވިދާޅުވީ ރައްޔިތުންގެ މަޖިލީސް ހިނގާނީ ޤާނޫނު އަސާސީ އާއި އެއްގޮތަށް ކަމަށެވެ. އަދި ކުރިއަށް އޮތް 19 ވަނަ ރައްޔިތުންގެ މަޖިލީހުގެ މަސައްކަތްތަކުގެ ތެރެއިން ތަފާތު ފެންނާނެކަމަށް ރައީސް ނަޝީދު ވިދާޅުވި އެވެ.

ރައީސް މުހައްމަދު ނަޝީދު ވިދާޅުވީ މަޖިލީހުގެ މަސައްކަތްތައް ކުރިއަށް ދާއިރު، އިސްލާމީ އުސޫލުތަކާއި ހިލާފު އެއްވެސް ކަމަކަށް ފުރުސަތު ނުދެއްވާނެ ކަމަށެވެ. އަދި ސަރުކާރުގެ ވައުދުތައް ފުއްދުމަށް މަސައްކަތް ކުރާނެ ކަމަށާއި، 19 ވަނަ ރައްޔިތުންގެ މަޖިލީހުގެ ތެރެއިން ރައްޔިތުންގެ އުއްމީދުތައް ހަޤީޤަތަކަށް ހަދައިދޭނެކަމަށް ރައީސް ނަޝީދު ވިދާޅުވި އެވެ.

އެގެއިތުރުން ރައީސް މުހައްމަދު ނަޝީދު ވިދާޅުވީ މަޖިލީސް ކުރިއަށްދާއިރު، ވާދަވެރި ސިޔާސީ ނިޒާމަށް ފުރުސަތު ދޭނެކަމަށެވެ. އަދި ކަންކަން ނިންމުމުގައި އެކަމަށް ވަރަށް ބޮޑު އިސްކަމެއް ދެއްވާނެކަމަށް ރައީސް ނަޝީދު ވިދާޅުވި އެވެ.