ރައީސް މައުމޫނު އަބްދުލް ގައްޔޫމްގެ 30 އަހަރުގެ ޚުދުމުޚުތާރު ވެރިކަމުގައި ސިއްކަ ޖެހުމުގައި ނުވަތަ ސިއްކަޖެހުމުގެ ފެށުމަކަށް ވެގެން ގޮސްފައިވަނީ ޖަލުގެ ހާދިސާއެކެވެ. 2003 ވަނަ އަހަރުގެ ސެޕްޓެމްބަރު 19 ވަނަ ދުވަހު، މ އޭޝިއާ ހަސަން އީވާން ނަސީމް 19، ޖަލުގައި އަނިޔާކޮށް މަރާލައި އޭނާގެ ހަށިގަނޑު އާއިލާއަށް ނޭނގި ވަޅުލަން އުޅުނު އުޅުމުގެ ތެރޭގައި އެކަން ފަޅާއަރައި މާލެ ކެކިއެރި ހާދިސާއަކީ ރައީސް މައުމޫނަށް ގޮތް ދޫކުރައްވައި ދައުލަތް އިސްލާހުކުރައްވަން މަޖުބޫރުކުރުވި އެއް ހާދިސާއެވެ.

އެޖަރީމާއާ އިދިކޮޅަށް ޖަލުގައި އިޙްތިޖާޖުކުރި އެތަކެއް އެހެން ގައިދީން ތަކެއް ކޮންޓްރޯލްކުރަން ޖެހުނީ ގަޔަށް ބަޑިޖަހައި އެމީހުންގެ ތެރެއިން ބަޔަކު މަރައިގެންނެވެ.

އީވާން ނަސީމްއަށް ކޮށްފައިވާ އަނިޔާ ފަޅާއަރުވާލައި ޖަލުގައި އަނިޔާކުރާކަން ކަށަވަރު ކޮށްދެއްވުމަށް އެ ދުވަހު އެންމެ ބޮޑު ގުރުބާނީއެއް ވެ ވަޑައިގެންނެވި ބޭފުޅަކީ ރާއްޖޭގެ ފުރަތަމަ ޑިމޮކްރެޓިކް ރައީސް މުހައްމަދު ނަޝީދެވެ.

ޖަލުގައި މަރުވާ މީހުން މާލޭގެ އައިޖީއެމް ހޮސްޕިޓަލަށް ގެންގޮސް އެމީހުންގެ ހަށިގަނޑު ބެލުމަކާއި ނުލައި އެތަނުގެ ޑޮކްޓަރުން މަރުގެ ސެޓްފިކެޓްގައި ސޮއިކުރުމަކީ އާއްމު ކަމެއް ކަމަށް ބުނެވެއެވެ.

އީވާން ނަސީމްގެ ހަށިގަނޑު ގެނައި ކަމުގެ ޚަބަރު ލިބުމާއެކު ރައީސް މުހައްމަދު ނަޝީދު އެތަނަށް ވަޑައިގެންނެވިކަމާއި ހަށިގަނޑު ރަނގަޅަށް ބެއްލެވުމަށް ފަހު ނޫނީ މަރުގެ ސެޓްފިކެޓްގައި ސޮއި ނުކުރުމަށް އަލް މަރްހޫމް ޑރ އަހުމަދު ރާޒީގެ އަރިހުގައި ރައީސް މުހައްމަދު ނަޝީދު އާދޭސް ދެންނެވިކަމަށް އޭރު ރައީސް މުހައްމަދު ނަޝީދު އަރިހުގައި ހުންނެވި މިހާރުގެ ސްޓޭޓް މިނިސްޓަރ އަހުމަދު މުޖުތަބާ ވިދާޅުވެއެވެ.

އަދި ރައީސް މުހައްމަދު ނަޝީދު އިނގިރޭސި ވިލާތުގެ ހިމާޔަތަށް އެދިވަޑައިގެން ލިޔުއްވާފައިވާ ބަޔާނުގައިވެސް އެވާހަކަ އޮގަތަށް ބަޔާން ކުރައްވާފައިވެއެވެ.

ރައީސް މުހައްމަދު ނަޝީދުގެ އެދިވަޑައިގަތުމަށް ޑރ ރާޒީ ހަށިގަނޑު ބައްލަވައި އެއީ އާއްމު މަރަކުން މަރުވެފައިވާ މީހެއްކަމަށް ސޮއި ނުކުރެއްވިއެވެ. އާއްމު މީހަކަށްވެސް އެނގޭނެ މިންވަރަށް ހަށިގަނޑުގެ ބޭރުފުށުގައިވެސް ޒަޚަމްތައް ހުއްޓެވެ. ރައީސް މައުމޫގެ ވެރިކަމުގައި ޖަލުގައި އަނިޔާކުރާކަމަށް ދެކެވެމުންދިޔަ ވާހަކަތައް ދުނިޔެއަށް ބޭޒާރުވެގެންދިޔަ އެންމެ ބޮޑު ހާދިސާއަކީ އެއީއެވެ.

ރައީސް މައުމޫނުގެ ވެރިކަމުގައި ޖަލުގައި އެތައް ބަޔަކު ނުހައްގުން އަނިޔާކޮށް މަރުވެފައިވާ ކަމަށް މަޝްހޫރު ތާރީޚު ލިޔުންތެރިޔާ ހ. ޝަފީގުގޭ އަހުމަދު ޝަފީގު ލިޔުއްވާފައިވެއެވެ. އެ މައްސަލަ ބަލައިދިނުމަށް ރައީސް މުހައްމަދު ނަޝީދުގެ ވެރިކަމުގައި، ހުޅުހެންވޭރުދާއިރާގެ މެމްބަރު މޫސާމަނިކު އެތައް ފަހަރަކު ގޮވާލައްވާފައިވެއެވެ.

މޫސާމަނިކަކީ ރައީސް މައުމޫގެ ވެރިކަމުގައި ޖަލުގައި އެތައް އަނިޔާތަކެއް ލިބިވަޑައިގެންނެވި ކަމަށް ތަކުރާރުކޮށް ވިދާޅުވަމުން ގެންދަވާ ބޭފުޅެކެވެ. މީގެ އިތުރުން ޖަލުގައި މޫސަ ހުންނެވި ދުވަސްވަރު އެހެން ގައިދީންނަށް ދިމާވެފައިހުރި އަނިޔާގެ ވާހަކަވެސް މޫސަ ދައްކަވައެވެ.

ޖަލު އަނިޔާއަކީ ރައީސް މައުމޫގެ ވެރިކަމުގައި ޖެހިފައި އޮތް އެންމެ ބޮޑު އެއް ލައްގަނޑަށްވާއިރު އެމަނިކުފާނުގެ ވެރިކަން ބަދަލުކުރުމަށް އެދުވަސްވަރު އިދިކޮޅު ފަރާތްތަކުން ބޭނުންކުރި އެންމެ ވަރުގަދަ ހަތިޔާރެވެ.

ރައީސް މައުމޫނުގެ ވެރިކަމުގައި ހިނގާދިޔަ ކަމަށް ބުނެވޭ ޖަލުގެ އަނިޔާތައް ބެލިފައެއް ނުވެއެވެ. އެމިނަކުފާނުގެ ވެރިކަމަށް ފަހު އުފެދުނު ފުރަތަމަ ވެރިކަން ދެ އަހަރާ ބައިގެ ތެރޭ ބަދަލުވީއިރު އޭގެ ފަހުން އުފެދުނު ކޮންމެ ވެރިކަމެއްގައި އެ މަނިކުފާނުގެ ހިއްސާ އޮވެއެވެ.

ރައީސް މައުމޫން ވެސް ހިމެނި ވަޑައިގަންނަވާ ކޮއެލިޝަނަކުން މިއަދު ވެރިކަން ކުރަމުންދާއިރު އެ ވެރިކަމުގައި ތިއްބެވި ބޭފުޅުން ޖަލަށް ފޮތް ހަދިޔާކުރައްވާއިރު އެ މަނިކުފާނު ބައިވެރިވެ ވަޑައިގެންނެވިއަސް އީވާން ނަސީމާއި، ސ ހިތަދޫ ނާޒުކީގެ ހުސެން ސޮލާހުގެ އާއިލާފަދަ އެތައް އާއިލާތަކަކުން އެ ވެރިކަމުގެ ޖަލު އަނިޔާތައް ހަނދާން ކުރާނެއެވެ.