ވެރިކަންކުރާ ޕީޕީއެމްއިން އެންމެ މެމްބަރުން ގިނަ ޕާޓިގެ ލަޤަބް ހޯދީ ގަދައަޅައި މަސައްކަތްތަކެއް ކޮށްގެން ނޫން ކަމަށާއި، އެ ލަޤަބް ހޯދީ ރައްޔިތުންގެ މަޖިލީހުގެ މެޖޯރިޓީގެ ބޭނުން ނަހަމަގޮތުގައި ހިފައިގެން ކަމަށް އެމްޑީޕީގެ ސެކެރެޓަރީ ޖެނެރަލް އަންސް އަބްދުއް ސައްތާރު ވިދާޅުވެއްޖެ އެވެ.
ޕީޕީއެމްއަކީ މެމްބަރުން އެންމެ ގިނަ ޕާޓީކަމަށް އިލެކްޝަންސް ކޮމިޝަނުން ކަނޑައަޅާފައިވާއިރު، އެކަމާ ގުޅޭގޮތުން ރާއްޖެޓީވީގެ ފަލަސުރުހި ޕްރޮގްރާމްގައި ވާހަކަދައްކަވަމުން އަނަސް އަބްދުއް ސައްތާރު ވިދާޅުވީ، ހަގީގަތުގައި މެމްބަރުން އެންމެ ގިނަ ޕާޓީއަކީ އަދުވެސް އެމްޑީޕީ ކަމަށެވެ. ނަމަވެސް ޤާނޫނުތައް ބޭނުންވާ ގޮތްގޮތަށް ފަރުމާކޮށް، އެމްޑީޕީގެ ގިނަ އަދަދެއްގެ މެމްބަރުން ޕާޓީން ވަކިކޮށްފައިވާ ކަމަށް އަނަސް ވިދާޅުވި އެވެ. އޭނާ ވިދާޅުވި ގޮތުގައި ޤާނޫނުތައް ހަދަނީ ޕީޕީއެމްއިން ބޭނުންވާ ގޮތަކަށެވެ.
އަނަސް ވިދާޅުވީ، އެންމެ މެމްބަރުން ގިނަ ޕާޓީއަށްވުމަށް ޕީޕީއެމްއިން މާ ގިނަ މަސައްކަތްތަކެއް ކޮށްފައިނުވާ ކަމަށެވެ. އެފަދަ މަސައްކަތްތަކެއް ފެންނަންވެސް ނެތްކަމަށް އަނަސް ވިދާޅުވި އެވެ.
"އެނގިވަޑައިގަންނަވާނެ، ހަމައެކަނި ސިޔާސީ ޕާޓީތަކުގެ ޤާނޫނަށް ހުށައެޅި އިސްލާހުތަކެއް ނޫން، ތަފާތު އެކިއެކި ޤާނޫނުތަކަށްވެސް އެ ބޭފުޅުން ބޭނުންވާ ސިޔާސީ މަންފާ ހޯދުމަށްޓަކައި އެކިއެކި ބަދަލުތައް ގެންނަވައިގެން ދައްކުވަން ބޭނުންވަނީ އެ ބެފުޅުންގެ ތާއީދުބޮޑުކަމަށް" އަނަސް ވިދާޅުވި އެވެ.
އިތުރަށް ވާހަކަދައްކަވަމުން އަނަސް ވިދާޅުވީ، ޕީޕީއެމްއަށް މަޖުބޫރުން މެމްބަރުން ވައްދުވާ މައްސަލަ ދައުލަތުގެ ކަމާއިބެހޭ އިދާރާތަކަށް ހުށައެޅި ކަމަށެވެ. އެގޮތުން ލޭބަރ ރިލޭޝަން އެތޯރިޓީ އާއި އިލެކްޝަންސް ކޮމިޝަނާއި، ހިއުމަން ރައިޓްސް ކޮމިޝަނަށް މައްސަލަ ހުށައެޅި ކަމަށް އޭނާ ވިދާޅުވި އެވެ. ނަމަވެސް އެ އިދާރާތަކުން މައްސަލަ ބަލާފައިނުވަނީ އެ އިދާރާތަކުގެ ތެރޭގައިވެސް ބިރުވެރިކަން އޮތް މިންވަރުގެ ސަބަބުން ކަމަށް އަނަސް ވިދާޅުވި އެވެ.
އޭނާ ވިދާޅުވީ، ލޭބަރ ރިލޭޝަން އެތޯރިޓީއަށް މައްސަލަ ހުށައެޅުމުން އެ މައްސަލަ އެމްޑީޕީއަށް ހުށަނޭޅެނެ ކަމަށް އެނގިކަމަށެވެ. އަދި އިލެކްޝަންސް ކޮމިޝަންގެ ފަރާތުން ދީފައިވާ ޖަވާބަކީ މައްސަލަ ބެލުމުގެ އިހުތިސާސް ލިބިގެންނުވާކަންކަމަށް އަނަސް ވިދާޅުވި އެވެ.
"އިލެކްޝަންސް ކޮމިޝަނުން ބުނީ ކަމާއިބެހޭ އިދާރާތަކަށް ހުށައަޅައިގެން މައްސަލަ ކުރިއަށްގެންދިއުމަށް. އިލެކްޝަންސް ކޮމިޝަނަކުންވެސް ގަބޫލެއް ނުކުރޭ ދިވެހިރާއްޖޭގައި ރަޖިސްޓްރީވެގެން ހިނގާ ޕާޓީއަކަށް މަޖިބޫރުން މީހުން ވައްދާ މައްސަލަ ބަލަންޖެހޭ ކަމަކަށް" އަނަސް ވިދަޅުވި އެވެ.
