ކުރިއަށް އޮތް 19 ވަނަ ރައްޔިތުން މަޖިލީހުގެ ވިލުފުށީ ދާއިރާއަށް އިންތިޚާބުވެ ވަޑައިގެންނެވި ހަސަން އަފީފް އެ މަޖިލީހުގެ ރައީސް ކަމަށް ގެނައުމަށް ތާއީދު ކުރުމަށް ޕީޕަލްސް ނޭޝަނަލް ކޮންގްރެސް ޕާޓީ (ޕީއެންސީ) އިން ނިންމައިފިއެވެ.

ބުދަ ދުވަހުގެ ރޭ ޕީޕީއެމް އަދި ޕީއެންސީން ބޭއްވި ނޫސްވެރިންގެ ބައްދަލުވުމުގައި ޕީއެންސީގެ ނައިބު ރައީސް އަހުމަދު ނިހާން ހުސެއިން މަނިކު ވިދާޅުވީ، ރައީސް އަިބްރާހީމް މުހައްމަދު ސޯލިހް އަފީފަށް ތާއީދުކުރއްވާފައިވާއިރު، އެ ދެ ޕާޓީން ވެސް މަޖިލިސް ރައީސް ކަމަށް ތާއީދު ކުރާނީ ރައީސް ސޯލިހް ތާއީދު ކުރެއްވި ގޮތަށް އަފީފަށް ކަމަށެވެ. އަދި ވިދާޅުވީ ރައީސް އެދިވަޑައިގެންނެވި ގޮތަކީ އެންމެ ރަނގަޅު ގޮތް ކަމަށް ގަބޫލުކުރައްވާ ކަމަށެވެ.

ދެ ޕާޓީން ވެސް އަފީފަށް ތާއީދުކުރުމުގެ ވިސްނުމެއްގެ ގެންގުޅޭ ކަމަށް ނިހާން ވިދާޅުވި ނަމަވެސް ޕީޕީއެމްގެ ނައިބު ރައީސް އަދި ނައިފަރު ދާއިރާ މެމްބަރު އަހްމަދު ޝިޔާމް ވިދާޅުވީ، ޕީޕީއެމްގެ ޕާލިމެންޓްރީ ގުރޫޕުން އަދިވަކި ގޮތެއް ނުނިންނާ ކަމަށެވެ.

އަފީފް މަޖިލީހުގެ ރައީސް ކަމަށް ގެނައުމަށް ރައީސް އިބްރާހީމް މުހައްމަދު ސޯލިހް މަސައްކަތްކުރައްވާ ކަމަށް އަޑުތައް ފެތުރިފައިވާ އިރު އެމްޑީޕީގެ ރައީސް މުހައްމަދު ނަޝީދު ވަނީ އައްޑޫ ހިތަދޫ އުތުރު ދާއިރާގެ މެމްބަރު މުހައްމަދު އަސްލަމް އަށް ތާއީރުކުރައްވާކަން ހާމަކުރައްވާފައެވެ.

އަފީފް އާއި އަސްލަމްގެ އިތުރުން މަޖިލީހުގެ ރައީސް ކަމަށް އިތުރު ތިން ބޭފުޅަކު ވަނީ ޝައުގުވެރިކަން ފާޅުކޮށްފައެވެ. އެއީ އައްޑޫ މީދޫ ދާއިރާގެ މެމްބަރު ރޮޒައިނާ އާދަމް އާއި މަރަދޫ ދާއިރާގެ މެމްބަރު އިބްރާހިމް ޝަރީފް، އަދި މެދު ހެންވޭރު ދާއިރާގެ މެމްބަރު އަލީ އާޒިމްއެވެ.

އާ މަޖިލީހުގައި ޕީއެންސީގެ ތިން މެންބަރަކު ތިއްބަވާނެއެވެ. އަދި ޕީޕީއެމްގެ ފަސް މެންބަރަކު ތިއްބަވާނެއެވެ.