އެހެން އަހަރުތަކޭ އެއްގޮތަށް މި އަހަރުވެސް ގޮވާމުގެ ބާވަތްތަކުން ފިޠުރު ޒަކާތް ދެއްކުމަށް ބޭނުންފުޅުވާ ފަރާތްތަކަށް މެއި މަހުގެ 26 ވަނަ ދުވަހުން ފެށިގެން އެ ފުރުސަތު ހުޅުވާލާނެކަމަށް އިސްލާމިކް މިނިސްޓްރީން ބުނެފި އެވެ.

އިސްލާމިކް މިނިސްޓްރީން ކުރި އިއުލާނެއްގައި ބުނެފައިވަނީ ގޮވާމުގެ ބާވަތްތަކުން ފިޠުރު ޒަކާތް ދެއްކުމަށް ބޭނުންފުޅުވާ ފަރާތްތަކަށް އެފުރުޞަތު، 21 ރަމަޟާން 1440 (26 މެއި 2019) ވާ އާދިއްތަ ދުވަހުން ފެށިގެން 29 ރަމަޟާން 1440 (3 ޖޫން 2019) ވާ ހޯމަ ދުވަހުގެ ނިޔަލަށް ހުޅުވާލާނެ ކަމަށެވެ. އަދި ފިޠުރު ޒަކާތުގެ ގޮތުގައި ދައްކާނީ އެބަޔަކު އާންމު ގޮތެއްގައި ކެއުމަށް ބޭނުންކުރާ ގޮވާމުގެ ބާވަތަކުން ބޮލަކަށް 2.4 ކިލޯ ގެ މިންވަރުކަމަށް މިނިސްޓްރީން ބުންޏެވެ.

އިސްލާމިކް މިނިސްޓްރީން ބުނިގޮތުގައި މާލެ ސިޓީގައި ގޮވާމުން ފިޠުރުޒަކާތް ބަލައިގަތުމަށް ހަމަޖެހިފައިވަނީ،އަލްމަދްރަސަތުލް ޢަރަބިއްޔަތުލް އިސްލާމިއްޔާގެ(ޢަރަބިއްޔާ ސްކޫލް)ހޯލުގައެވެ.

އިސްލާމިކް މިނިސްޓްރީން ބުނިގޮތުގައި ފައިސާގެ ގޮތުގައި މި ރަމަޟާން މަހު ގެ 16 ވަނަ ދުވަހުގެ ނިޔަލަށް ޒަކާތުގެ ގޮތުގައި 1.6 މިލިއަން ރުފިޔާ ލިބިފައިވެއެވެ.

އިސްލާމިކް މިނިސްޓްރީން އާންމު ކުރި ތަފާސްހިސާބުތަކަށް ބަލާއިރު ރަމަޟާން މަހުގެ 16 ވަނަ ދުވަހާއި ހަމައަށް 1،655،275ރ. (އެއް މިލިއަން ހަލައްކަ ފަންސާސް ފަސްހާސް ދުއިސައްތަ ހަތްދިހަ ފަސް ރުފިޔާ) އެ މިނިސްޓްރީއަށް ވަނީ ލިބިފައެވެ. މިއަދަދަކީ މިދިޔަ އަހަރުގެ ރަމަޟާން މަހާއި އަޅާބަލާއިރު ގާތްގަނޑަކަށް ދެ ލައްކަ ރުފިޔާއަށްވުރު އިތުރު އަދަދެކެވެ.