ލަންކާ އަށް ދިން ފަދަ ޓެރަރިސްޓް ހަމަލާއެއް ކެރެލާއަށް ދޭން ރޭވިކަމުގެ ތުހުމަތަށް، އިންޑިއާގެ ތިން ރައްޔިތަކު އެ ގައުމުގެ ނެޝަނަލް އިންވެސްޓިގޭޝަން އެޖެންސީ (އެންއައިއޭ) އިން ހައްޔަރުކޮށްފިއެވެ.

ކެރެލާގެ ކަސަރްގޮޑް ޑިސްޓްރިކްޓާއި ޕަލައްކަޑް ޑިސްޓްރިކްގައި އެންއައިއޭއިން ހިންގި އޮޕަރޭޝަންތަކުގައި، ތިން މީހުން ވެސް ހައްޔަރުކޮށްފައި ވަނީ އެ މީހުން ދިރިއުޅޭ ގެތައް ބަލާފާސްކުރުމަށް ފަހުގައެވެ. އައިސިސްއާ ގުޅެން ސީރިޔާއަށް ދިޔަ އިންޑިއާގެ ޒުވާނުންގެ ތެރެއިން ގިނަ އަދަދެއްގެ ބަޔަކާ، ކެރެލާއިން ހައްޔަރުކުރެވުނު ތިން މީހުންނާ ގުޅުމެއް އޮންނަ ކަމަށް ވެސް ވަނީ ތުހުމަތުކުރެވިފައެވެ. އިންޑިއާ އިން ހައްޔަރުކުރެވުނު މީހުންނާއި، އީސްޓަރ ސަންޑޭގައި ލަންކާއަށް ދިން ބޮމުގެ ހަމަލާގެ މޭސްތިރި ޒަހްރާން ހާޝިމްއާ ވެސް ގުޅުން އޮންނަ ކަމަށް އިންޑިއާ ޓުޑޭ ނޫހުން ވަނީ ރިޕޯޓްކޮށްފައެވެ.

އާދިއްތަ ދުވަހު އެންއައިއޭ އިން ހިންގި އޮޕަރޭޝަންތަކުގައި މޯބައިލް ފޯނާއި، ސިމް ކާޑާއި، މެމޮރީ ކާޑުތަކާއި، ޕެން ޑްރައިވްތަކާއި، ދީނީ ފަތުވާދޭ ސީޑީތަކާއި، ޑީވީޑީތަކެއް ވަނީ އަތުލައިގަނެފައެވެ. އޭގެ އިތުރުން ޒާކިރް ނައިކް އަދި ސައިދް ކުތުބް ލިޔެފައިވާ ފޮތްތަކަކާއި އަރަބި ބަހުންނާއި މަޅަޔާލަމް ބަހުން ލިޔެފައިވާ ޑައިރީތަކެއް ވެސް ފެނިފައިވެއެވެ. 

އިންޑިއާގެ ނިއުސްއެކްސް އިން ރިޕޯޓްކޮށްފައި ވަނީ، ހައްޔަރުކުރެވުނު މީހުންގެ ތެރެއިން އެކަކީ ރިޔާސް އަބޫބަކުރު ނަމަކަށް ކިޔާ މީހެކެވެ. އެންއައިއޭގެ ކޯޓަށް ހާޒިރުކުރުމަށް ފަހު އޭނާގެ ބަންދުގެ މުއްދަތު ވަނީ މޭ 29 ވަނަ ދުވަހާ ހަމައަށް އިތުރުކޮށްދީފައެވެ. އޭނާގެ މައްޗަށް ކުރެވެނީ ކެރެލާގައި ބޮމުގެ ހަމަލާތަކެއް ދޭން އުޅުނު ކަމުގެ ތުހުމަތެވެ. ރިޔާސް އަބޫބަކުރު ހައްޔަރުކުރެވުނީ ޕަލައްކަޑް ޑިސްޓްރިކްޓުންނެވެ.

އެންއައިއޭގެ ތަހުގީގުގައި، ލަންކާގައި ދިން ފަދަ ހަމަލާތަކެއް ކެރެލާގައި ދޭން އުޅުނު ކަމަށް ރިޔާޒް އެއްބަސްވެފައިވާ ކަަމަށް އިންޑިއާގެ ބައެއް މީޑިއާތަކުން ވަނީ ރިޕޯޓްކޮށްފައެވެ. އެގޮތުން ޑީއެންއޭއިންޑިއާ ނޫހުން ރިޕޯޓްކޮށްފައިވަނީ ޒަހްރާންއާ މުއާމަލާތް ކޮށްފައިވާ ކަމަށާއި، ސީރިޔާގައި ހަރަކާތްތެރިވާ އައިސިސްގެ ހަނގުރާމަވެރިއެއް ކަމުގައިވާ އަބްދުލް ހައްޔޫމްއާ މުއާމަލާތް ކޮށްފައިވާ ކަމަށް ތަހުގީގުގައި ރިޔާސް އިއުތިރާފްވެފައިވާ ކަމަށެވެ.  

މީގެ އިތުރުން، މިދިޔަ އަހަރުގެ ތެރޭގައި ޒަހްރާން ހާޝިމް ދެ މަސް ދުވަސް އިންޑިއާގެ ދެކުނުގެ ދެ ސްޓޭޓް ކަމުގައިވާ ކެރެލާއާއި ޓަމިލް ނާޑޫގައި ހޭދަކޮށްފައިވާ އިރު، އިންޑިއާގެ ރައްތިތުންންތަކަކާ މުއާމަލާތު ކޮށްފައިވާ ކަމަށް އެންއައިއޭއިން ވަނީ ބުނެފައެވެ. އޭގެ ތެރޭގައި ރިޔާސް އަބޫބަކުރު ވެސް ހިމެނެއެވެ. މި އެންމެން އައިސިސްއާ ގުޅެން އެއްބަސްކުރުވީ ޒަހްރާން ހާޝިމް ކަމަށް ވެސް އެ އެޖެންސީއިން ވަނީ ހާމަކޮށްފައެވެ. ޒަހްރާންއާ ގުޅުން ހުރި ކަމަށް ބެލެވޭ، އައިސިސްއާ ގުޅުން ހުރި އިތުރު ބަޔަކަށް އެންއައިއޭއިން ފާރަލަމުންދާ ކަމަށް ވެސް ނިއުސްއެކްސްއިން ވަނީ ރިޕޯޓްކޮށްފައެވެ. މި މީހުންގެ އިތުރުން، ކެރެލާގައި އޮންނަ "ތައުހީދީ ޖަމާއަތަށް" ނިސްބަތްވާ ތިރީހަށް ވުރެން ގިނަ މީހުންނާ އެންއައިއޭއިން ދަނީ ސުވާލުކުރަމުންނެވެ.

ހައްޔަރުކުރެވުނު މީހުންނަކީ ލަންކާގެ ވެރިރަށް ކޮލޮމްބޯއާއި ކެރެލާއާއި ދެމެދު ބަދަލުކުރެވިފައިވާ ފޯނު ކޯލުތަކެއް ޓްރޭސް ކުރަމުން ދަނިކޮށް ލިބުނު މައުލޫމާތުގެ އަލީގައި ހައްޔަރުކުރެވުނު ބަޔަކުކަމަށް އެންއައިއޭއިން ވަނީ ހާމަކޮށްފައެވެ.