ބަންގްލަދޭޝްގެ ވެރިރަށް ޑާކާގެ އުސް އިމާރާތެއްގައި ބުރާސްފަތި ދުވަހު ހިނގި އަލިފާނުގެ ހާދިސާގައި މިހާތަނަށް 25 މީހުން މަރުވެފައިވާ ކަމަށް އެ ގައުމުގެ އޮފިޝަލުން ބުނެފި އެވެ.

ބަންގްލަދޭޝްގެ އޮފިޝަލުން ބުނީ ޑާކާގެ ބަނާނީ އޭރިއާގައި ހުރި އިމާރާތުގައި އަލިފާން ރޯވި ހާދިސާއާ ގުޅިގެން އެ އިމާރާތުގެ ވެރި ފަރާތާ ދެކޮޅަށް ޖިނާއީ ދައުވާ ކުރަން ނިންމާފައިވާ ކަމަށެވެ. އަދި ހައުސިން މިނިސްޓަރު އެސްއެމް ރިޒައުލް ކަރީމް ވިދާޅުވީ އިމާރާތަށް ހުއްދަ ދިނުމުގައި އެ މިނިސްޓްރީގެ އޮފިޝަލަކު ގޯހުން ކަމެއް ކޮށްފައިވާ ނަމަ ފިޔަވަޅު އަޅުއްވާނެ ކަމަށެވެ.

މި ހާދިސާގައި 60 މީހަކަށް މިހާރު ވެސް ހޮސްޕިޓަލުގައި ފަރުވާ ދެމުންދާ އިރު، ފުލުހުން ހިންގާ ތަހުގީގުގައި އިމާރާތުގެ ވެރި ފަރާތާ ސުވާލު ކުރާނެ ކަމަށް އެ ގައުމުގެ ފުލުހުން ވަނީ ބުނެފައެވެ.

އިމާރާތުގައި ރޯވި އަލިފާނުން ސަލާމަތްވުމަށް ބައެއް މީހުން ވަނީ ކުޑަ ދޮރުތަކުން ބޭރަށް ފުންމާލި މީހުންގެ ތެރޭން ހަ މީހަކު ވަނީ މަރުވެފަ އެވެ. މަންޒަރު ދުށް ފަރާތްތަކުން ބުނެފައިވަނީ އެއްބައި މީހުން އިމާރާތުގެ އަރިމަތީ ހުރި ހޮޅިތަކާއި ކޭބަލްތަކުން ފައިބައިގެން ވެސް ސަލާމަތް ވާން މަސައްކަތް ކުރި ކަމަށެވެ. މީގެ ތެރެއިން ދެ މީހަކު މަރުވެފައިވާ ކަމަށް އެ ގައުމުގެ ނޫސްތަކުން ވަނީ ރިޕޯޓްކޮށްފައެވެ.

މި ހާދިސާ ހިނގާފައިވަނީ ޑާކާގައި ހުންނަ ޑިއޯޑޮރަންޓްއާއި ކުދި ޕްލާސްޓިކް ރައްކާކޮށްފައި ހުރި ގުދަނެއްގައި މިދިޔަ މަހުގެ ތެރޭގައި ހިނގި އަލިފާނުގެ ހާދިސާއެއްގައި 70 މީހުން މަރުވެފައި ވަނިކޮށެވެ. ފަހުގެ ތާރީހެއްގައި މި ސަރަހައްދުގައި ހިނގި އެއްމެ ނުރައްކާތެރި އަލިފާނުގެ ޙާދިސާގައި، ބަނާނީ ކައިރީގައި އޮންނަ ނިމްތޯލީގައި 2010 ވަނަ އަހަރު އަލިފާނުގެ ހާދިސާއެއް ހިނގާ، 123އަށް ވުރެ ގިނަ މީހުން މަރުވެފައިވެއެވެ.