އަވަށްޓެރި ސްރީލަންކާގެ ބަންޑާރަ ނައިކެ އިންޓަނޭޝަނަލް އެއާޕޯޓު (ބީއައިއޭ) އިން ރާއްޖެއަށް ފުރަންވެގެން އުޅެނިކޮށް، ލަންކާ ފުލުހުން ހޯދަމުން ދިޔަ ނުރައްކާތެރި ހަތަރު މީހަކު ހައްޔަރުކޮށްފިއެވެ.
ލަންކާގެ ކްރިންމިނަލް އިންވެސްޓިގޭޝަން ޑިޕާޓްމެންޓް (ސީއަޑީ) އިން ހައްޔަރުކޮށްފައިވާ ހަތަރު މީހުންނަކީ ލަންކާގެ ނުރައްކާތެރި ކުށްވެރިޔާ މަކަންދުރެ މަދުޝްއާ ގުޅުން އޮންނަ މީހުންނެވެ. ސަދަން ޑިވޮލޮޕްމެންޓް އޮތޮރިޓީގެ ޗެއާމަން ޑެނީ ހިތްތަޓިޔާގެ އިތުރުން އިތުރު ބަޔަކު މަރާލި ކަމުގެ ތުހުމަތުގައި އެ ގައުމުގެ ފުލުހުން ހޯދަމުން އަންނަ މަކަންދުރެ ހައްޔަރު ކޮށްފައިވަނީ ދުބާއީގެ ހޮޓަލެއްގެ ތެރޭގާއި ބަޔާކާއި އެކު ޕާޓީ ކުރަން ތިއްބައެވެ.
ހައްޔަރު ކުރި މީހުންގެ ތެރޭގައި ލަންކާގެ މަޝްހޫރު ލަވަކިޔުންތެރިޔާ އަމަލް ޕެރޭރާވެސް ހިމެނެއެވެ. ފުލުހުން ވަނީ މަކަންދުރެއާ ގުޅުން އޮންނަ މީހުން ހައްޔަރުކުރުމަށް ހާއްސަ އޮޕަރޭޝަނެއް ފަށާފައެވެ. ދުބައީން ދަނީ މަކަންދުރޭ ލަންކާގެ ފުލުހުންނާއި ހަވާލު ކުރުމުގެ މަސައްކަތް ކުރަމުންނެވެ.
މަކަންދުރެ އާއި ގުޅުން އޮންނަ ހަތަރު މީހުން ދުބާއިން ޑީޕޯޓްކޮށްލާފައިވާއިރު، އެމީހުން ލަންކާ އަށް އައީ ބުރާސްފަތި ދުވަހުގެ ހެނދުނުގެ ވަގުތެއްގައެވެ. ފުލުހުންގެ މީޑިއާ އޮފިޝަލް އެސްޕީ ރުވާން ގުނަސޭކަރަ ވިދާޅުވީ، މި ހަތަރު މީހުން ލަންކާ އަށް އައުމަށްފަހު އުޅުނީ ރާއްޖެއަށް ފުރަންވެގެން ކަމަށެވެ. އެހެން ނަމަވެސް ފުލުހުންނަށް ލިބުނު މައުލޫމާތާއި ގުޅިގެން ރާއްޖެއަށް ފުރުމުގެ ކުރިން މި ހަތަރު މީހުންވެސް ހައްޔަރުކޮށްފައިވާ ކަމަށް އޭނާ ވިދާޅުވިއެވެ. މި އެންމެންނަކީ ވެސް މީހުން މަރާލުމުގެ ތުހުމަތުގައި ފުލުހުން ހޯދަމުންދާ މީހުންނެވެ.
ހައްޔަރު ކުރި މީހުންނަކީ، ކަންޖިޕަނީ އިމްރާން، އަނުޝްކާ ކައުޝަލް، އަމީލާ ސަންޕަތުގެ އިތުރުން އެންޑަސަން ފެނާންޑޭޒް އެވެ.
މި މީހުންގެ ތެރެއިން އިމްރާން ހޯދަމުން ދަނީ، މާލިގާވައްތަ އަލަމް އިގްބާލް އެވިނިއުގައި މީހަކު މަރާލުމުގެ އިތުރުން ތިން މީހަކު މަރާލި ކަމުގެ ތުހުމަތުގައެވެ. އިމްރާންގެ ކުރީގެ އަންހެނުން އާޝާ ފަރީ މަރާލަން އުޅުނު ކަމުގެ ތުހުމަތުތައްވެސް އޭނާގެ މައްޗަށް ވަނީ ކޮށްފައެެވެ.
މީހަކު މަރާލުމުގެ އިތުރުން ހެންޑް ގްރެނޭޑް ގެންގުޅުނު ކަމުގެ ތުހުމަތުގައި އަނުޝްކާ ވަނީ މީގެ ކުރިން ހައްޔަރުކޮށްފައެވެ. މި އެންމެންވެސް ވަނީ ކުށްކުރުމަށްފަހު ފިލައިގެން ދުބާއިއަށް ގޮސްފައެވެ.
