އުރީދޫ މޯލްޑިވްސް އިން ތިން ސްޓާޓް-އަޕް އަކަށް އިތުރު އިންވެސްޓްމަންޓް ފޯރުކޮށްދޭން ނިންމައިފިއެވެ.

ނިރު އެކްސެލެރޭޓަރގެ ފުރަތަމަ ޑެމޯ ޑޭގެ ތެރެއިން، 16 ހަފްތާގެ އެކްސެލެރޭޓަރ ޕްރޮގްރާމު ފުރިހަމަ ކޮށްފައިވާ ތިން ސްޓާޓް-އަޕް ކުންފުނިތަކުން ވަނީ އެ ކުންފުނީގެ ޚިދުމަތްތައް ދައްކާލާފައެވެ.

އުރީދޫ އިން އިންވެސްޓްމަންޓްތައް ފޯރުކޮށްދޭން ނިންމާފައިވަނީ އައިޑިއަނައިޒް، ކުނބު އަދީ ބީޓުބީ ކުންފުންޏަށެވެ.

ނިރު އެކްސެލެރޭޓަރ އަކީ ދިވެހި މުޖުތަމައަށް މަންފާކުރުވާ ތަފާތު އީޖާދީ އުފެއްދުންތައް ރާއްޖެއާ، ރާއްޖެއިން ބޭރުގެ މާކެޓުގައި ކުރިއެރުވުމުގެ ފުރުސަތު އަލަށް ވިޔަފާރީގެ ތެރެއަށް ވަންނަ ޒުވާނުންނަށާއި، ކުރިއަރަމުން އަންނަ މިފަދަ ވިޔަފާރިތަކަށް ހޯދައި ދިނުމުގެ ގޮތުން އުރީދޫއިން ކުރިއަށްގެންދާ ޕްރޮގްރާމެކެވެ. މި އެކްސެލެރޭޓާރ ޕްރޮގްރާމުގައި ބައިވެރިވެވެނީ،  އުރީދޫ އާއި ޑައިލޮގް އެކްޒިއާޓަރ ޕލސ. ގެ އައިޑިއާމާޓް ގުޅިގެން ކުރިއަށް ގެންދިޔަ ނިރު ހެކަތަންގައި ވާދަކޮށް ހޮވުނު ޓީމްތަކަށެވެ.

މި ގޮތުން އެކްސެލެރޭޓަރަށް ހޮވާލެވުނު ޓީމް ތަކަށް ވަނީ 12 ހަފްތާގެ އިންޓެންސިވް މެންޓަރޝިޕް ޕްރޮގްރާމެއްގެ އިތުރުން، މަސައްކަތް ކުރާނެ ކޯ-ވޯކިން ސްޕޭސް، ވިޔަފާރި ބިނާކުރުމަށް ޑިޖިޓަލް ޓޫލްތައް އަދި ދާއިރާގެ ފަންނުވެރިންގެ ފަރާތުން ޓެކްނިކަލް ސަޕޯޓު ފޯރުކޮށްދެވިފައެވެ. ޓްރެއިނިންގް ޕްރޮގްރާމް ނިމުމަކަށް އައުމާއި އެކު، ސީޑް ފަންޑިންގ ފޯރުކޮށްދިނުމުގެ އިތުރުން، އެހެނިހެން އިންވެސްޓްމަންޓު ހޯދުމަށްޓަކައި ސަރުކާރުގެ އޮފިޝަލުން، އަދި ރާއްޖެއާއި ރާއްޖޭން ބޭރުގެ ބޮޑެތި ވިޔަފާރިވެރިންނާއި އިންވެސްޓަރުންނަށް ސްޓާޓްއަޕްތައް ޕިޗްކޮށް، އިތުރު ކުރިއެރުން ފަހިކޮށްދިނުމަށް އުރީދޫ އިން ދަނީ މަސައްކަތްކުރަމުންނެވެ.

ނިރު އެކްސެލެރޭޓަރ ފުރިހަމަ ކުރާ އެންމެހާ ޓީމުތަކަށްވެސް، އުރީދޫގެ ޕާޓްނަރެއްގެ ގޮތުގައި، ދިގު މުއްދަތަށް ދެމިގެންދާނެ އެހީތެރިކަމާއި ފުރުސަތުތައް ލިބިގެންދާނެއެވެ. އަދި މުސްތަޤްބަލުގައި، މި ބައިވެރިން ވެގެންދާނީ، މުޖުތަމައުގެ މަންފާއަށް މަސައްކަތް ކުރުމުގައި އެކަކު އަނެކަކަށް އެހީތެރިވާނެ ގިނަ ސްޓާޓް-އަޕް ތަކެއް ހިމެނޭ ކޮމިއުނިޓީއެއްގެ ތަމްސީލުވެރިންނަށެވެ.

"ނިރު އެކްސެލެރޭޓަރ ޕްރޮގްރާމުގެ އަމާޒަކީ، ރާއްޖޭގެ ސްޓާޓް-އަޕް އީކޯސިސްޓަމް އިތުރަށް ވަރުގަދަކޮށް، އަޅުގަނޑުމެންގެ މުޖުތަމައުގައި ހިމެނޭ ޒުވާން ވިޔަފާރިވެރިންގެ ހުނަރުތައް ބިނާކުރުމާއި އެކު، ކުރިއެރުމުގެ ފުރުސަތުތަކާއި ގުޅުވާލަދިނުން. ނިރުގެ ފުރަތަމަ އަހަރުގެ ތަޖުރިބާ އާއި އެކު، ބައިނަލްއަޤްވާމީ ވިޔަފާރީގެ ދާއިރާގައި ރާއްޖޭގެ ޒުވާނުންނަށް ކާމިޔާބީ ހޯދޭނެކަމާއި މެދު އަޅުގަނޑުމެންގެ ޔަގީންކަން އިތުރަށް ވަރުގަދަވެފައިވޭ" އުރީދޫގެ ސީއީއޯ ނަޖީބް ޚާން ވިދާޅުވިއެވެ.

ނިރު އެކްސެލެރޭޓަރގެ ޑެމޯޑޭގައި، މިނިސްޓަރ އޮފް ކޮމިއުނިކޭޝަން، ސައިންސް އެންޑް ޓެކްނޮލޮޖީ، މުޙައްމަދު މަލީޙް ޖަމާލް، ކޮމިއުނިކޭޝަން އޮތޯރިޓީގެ ޗީފް އެގްޒެކެޓިވް، އިލްޔާސް އަހްމަދާއި ފެނަކަ ކޯޕަރޭޝަންގެ މެނޭޖިންގ ޑައިރެކްޓަރ އަހުމަދު ސައީދު މުހައްމަދުގެ އިތުރުން ރާއްޖޭގެ ކުދި ވިޔަފާރިތައް ވަނީ ބައިވެރިވެފައެވެ.