މިދިޔަ ހުކުރު ދުވަހު ނިއުޒިލެންޑްގެ ކްރައިސްޓްޗަރޗުގައި ހުންނަ ދެ މިސްކިތަށް ދިން ބަޑީގެ ހަމަލާގެ ޓާގެޓަކީ ތުރުކީ ކަމަށް އެގައުމުގެ ރައީސް ތައްޔިބު އުރުދުޣާން ވިދާޅުވެއްޖެއެވެ.

ކްރައިސްޓްޗަރޗުގެ ދެ މިސްކިތަކަށް ހަމަލާދީ މިހާތަނަށް 50 މީހުން ވަނީ ޝަހީދުވެފައެވެ.

އުރުދުޣާން ވިދާޅުވީ ހަމަލާދިން ކަމަށް ތުހުމަތު ކުރެވޭ ބްރެންޓަން ޓެރަންޓް ދެ ފަހަރެއްގެ މަތިން ތުރުކީއަށް ގޮސްފައިވާ ކަމަށެވެ. އަދި އެކަން ތުރުކީގެ ތަހުގީގު ޓީމުން ތަހުގީކުރަމުންދާކަމަށް އުރުދުޣާން ވިދާޅުވިއެވެ.

އުރުދުޣާން ވިދާޅުވީ ބްރެންޓަން ޓެރަންޓް ތުރުކީއަށް ގޮސް ހުރި ދުވަސްތަކުގައި އެގައުމުގެ މީހުންނަށް ޔޫރަޕްގެ ގައުމުތަކުގައި އެއްވެސް ޖާގައެއް ނެތްކަމަށް ބުނެފައިވާ ކަމަށެވެ.

ތުރުކީގެ ސީނިއާ ސެކިއުރިޓީ ފަރާތަކުން ބުނެފައިވަނީ ބްރެންޓަން ޓެރަންޓް އެގައުމަށް ގޮސްފައިވަނީ 2016 ވަނަ އަހަރު ކަމަށެވެ. އެއީ މާޗު މަހުގެ ތެރޭގައި ހަފްތާއެއް އަދި އެއަހަރުގެ ސްޕެޓެމްބަރު މަހުގެ ތެރޭގައި ތުރުކީއަށް ގޮސް މަހަކަށްވުރެ ގިނަ ދުވަހުއެވެ. ތުރުކީގެ ތަހުގީގީ އިދާރާތަކުން ދަނީ ބްރެންޓަން ޓެރަންޓް އެގައުމުގައި އުޅުނު ހޮޓެލް އާއިލ އެ ހޮޓެލްގެ ކެމެރާ ފޫޓޭޖާއި އަދި އޭނާ ގުޅުންބޭއްވި ފަރާތްތަކުގެ ތަހުގީގު ކުރަމުންނެވެ.

ކްރައިސްޓްޗަރޗުގެ ހަމަލާގައި 50 މީހުން ޝަހީދުވެފައިވާއިރު 38 މީހަކަށް އަދިވެސް ދަނީ ފަރުވާ ދެމުންނެވެ. އޭގެ ތެރެއިން 11 މީހަކު އޮތީ ސީރިއަސް ހާލުގައެވެ. ސީރިއަސް ހާލުގައި ތިބި މީހުންގެ ތެރޭގައި 11 އަހަރުގެ ކުޑަ އަންހެން ކުއްޖެއްވެސް ހިމެނެއެވެ. ޝަހީދުވި މީހުންގެ ތެރޭގައި ސައުދީ އަރަބިއްޔާ، ތުރުކީ، އުރުދުން، ބަންގްލަދޭޝް، އިންޑޮނީޝިއާ އަދި މެލޭޝިއާއަށް ނިސްބަތްވާ މުސްލިމުން ހިމެނެއެވެ.