ނިއުޒީލެންޑްގެ ކްރައިސްޓްޗަރޗްގެ ދެ މިސްކިތަކަށް ބަޑިހިފައިގެން ތިބި ބަޔަކު ހުކުރު ދުވަހު ވަދެ، ބަޑީގެ ހަމަލާތަކެއްދީ އެތައް ބަޔަކު މަރާލައިފި އެވެ.
ބޮޑުވަޒީރު ޖެސިކާ އާޑެން ވިދާޅުވީ ހަމަލާތަކުގައި 40 މީހަކު މަރާލާފައިވާކަމަށާއި، 20 މީހަކަށް އެކިވަރުގެ ޒަހަމްތައް ލިބިގެން ފަރުވާދެމުން އަންނަކަމަށެވެ. އަދި އެތަންތަނުގެ ހާލަތު ގާތުން ބަލަމުންދާކަމަށާއި، މިވަގުތު އޮތީ ބަދަލުވަމުންދާ ހާލަތެއްގައިކަމަށް ބޮޑު ވަޒީރު ވިދާޅުވި އެވެ.
ބޮޑުވަޒީރުވަނީ މިއީ އެ ގައުމުގައި "ކަޅު ދުވަހެއް"ގެ ގޮތުގައި ސިފަ ކުރައްވާފައެވެ.
JUST IN: 40 people have been killed and at least 20 others injured in Friday's mosque attacks in Christchurch, Prime Minister Jacina Ardern has confirmed https://t.co/EzUNGVO474 pic.twitter.com/cAy1QPWvQd
— CNN Breaking News (@cnnbrk) March 15, 2019
ފުލުހުންގެ ކޮމިޝަނަރ މައިކް ބުޝް ވިދާޅުވީ ހަމަލާއާއި ގުޅިގެން ތުހުމަތުކުރެވޭ ހަތަރު މީހަކު ފުލުހުން ހައްޔަރުކޮށްފައިވާކަމަށެވެ. ނަމަވެސް ކޮމިޝަނަރ ވިދާޅުވީ ހަމަލާގެ ބިރުވެރިކަން މުޅިން ފިލާ ދިޔައީކަމަށް އަދި ނުނިންމާ ކަމަށެވެ.
ޓީވީއެންޒެޑްގެ ރިޕޯޓަރ ސަމް ކްލާކްވަނީ ހަމަލާދޭން ފެށި ވަގުތު، މަސްޖިދު އަލް ނޫރުގައި ތިބި އެތައް ބަޔަކާ ވާހަކަދައްކާފައެވެ. އަލް ޖަޒީރާގައި އޭނާ ބުނެފައިވަނީ އޮޓަމެޓިކް ބަޑި ހިފައިގެން ހުރި ފިރެހެނަކު މިސްކިތަށް ވަދެ ހަމަލާ ދޭން ފެށީކަމަށެވެ.
"ބަޑިއެއް ހިފައިގެން ކަޅު ހެދުމެއްލައިގެން ހެލްމެޓް އަޅައިގެން ހުރި އެ މީހާ މިސްކިތުގެ ފަހަތުން އައިސް އަޅުކަމުގައި ތިބި މީހުންނަށް ހަމަލާދޭން ފެށީ." ކްލާކް ބުންޏެވެ.
ފުލުހުން ބުނެފައިވަނީ ދެވަނަ ހަމަލާ ދީފައިވަނީ ލިންވުޑް މިސްކިތުގައި ހުކުރު ނަމާދަށް ތިއްބާކަމަށެވެ. މި ހަމަލާގެ ތަފްސީލެއް ފުލުހުން އަދި ހާމައެއް ނުކުރެއެވެ.
އާއްމުކޮށް ސުލްހަވެރި ގައުމެއްގެ ގޮތުގައި ފާހަގަވާ ޕެސިފިކްގެ މި ގައުމުގައި ދިން ހަމަލާތަކަށްފަހު ވަނީ މިސްކިތްތަކާއި ސްކޫލްތައް ބަންދުކޮށްފައެވެ.
