ހުއްދަ ނުނަގާ ހިންގާ އިންޑޮނޭޝިއާގެ މައިނެއްގެ ބިންގަނޑު ކަނޑައިގެން ދިޔުމާއި ގުޅިގެން އެކަކު މަރުވެ، 60އަށް ވުރެ ގިނަ މީހުން މައިން ތެރޭގައި ތާށިވެއްޖެއެވެ.
ސުލަވޭސީ ޕްރޮވިންސްގައި ހިނގި ހާދިސާގައި މިހާތަނަށް 13 މީހަކު ސަލާމަތް ކޮށްފައިވާ އިރު، މީހުން ސަލާމަތް ކުރުމުގައި މަސައްކަތް ކުރާ ފަރާތްތަކުން ދަނީ ތާށިވެފައިވާ މީހުން ސަލާމަތް ކުރުމަށް ކެނޑިނޭޅި މަސައްކަތް ކުރަމުން ކަމަށް އެ ގައުމުގެ ޑިޒާސްޓަރ އެޖެންސީއިން ވަނީ ބުނެފައެވެ.
މައިން ހިންގާ ސަރަހައްދުގެ ބިންގަނޑު ކަނޑައިގެން ދާން މެދުވެރިވީ، އެއްވެސް ބެލުމެއް ނެތި ޝާފްޓްތައް ހެދުމާއި މައިން ތެރޭގައި ޖަހާފައި ހުރި ސަޕޯޓިންގ ބީމްތަކާއި ބޯޑުތައް ބިންދައިގެން ދިޔުމާއި ގުޅިގެން ކަމަށް ޑިޒާސްޓަރ އެޖެންސީގެ ތަރުޖަމާނު ސުޓޮޕޯ ޕުރްވޯ ވިދާޅުވިއެވެ.
Puluhan orang penambang emas tertimbun longsor di arel Penambangan Emas Tanpa Ijin (PETI) di Desa Bakan Kec Lolayan Kab Bolaang Mongondow Sulut pada 26/2/2019 pukul 21.00 WITA. Data sementara per 05.00 WITA 1 orang tewas, 13 orang luka, dan puluhan orang masih tertimbun. pic.twitter.com/TKY5ewPX55
— Sutopo Purwo Nugroho (@Sutopo_PN) February 26, 2019
އިންޑޮނޭޝިއާގެ މަރުކަޒީ ސަރުކާރުން މިފަދަ މައިންތައް ހިންގުން މަނާ ކޮށްފައިވީ ނަމަވެސް، ސަރަހައްދީ ސަރުކާރުތަކުން މިކަމަށް އަޅާނުލުމުގެ ސަބަބުން މިކަހަލަ ހާދިސާތައް އިންޑޮނޭޝިއާގައި ވަނީ ގިނަވެފައެވެ. އެ ގައުމުގައި ހިންގާ މިކަހަލަ މައިންތަކުގެ ސަބަބުން އެތައް ބަޔަކު މަރުވެފައިވާ އިރު، އެ ތަންތަނުގައި މަސައްކަތް ކުރާ މީހުންނަށް ވިހަ މާއްދާތަކުގެ އަސަރުކުރުމުގެ މައްސަލަ ވެސް ވަނީ ބޮޑުވެފައެވެ.
