ހަނގުރާމައިގެ ސަބަބުން ސުންނާފަތިވެ އިންސާނީ ކާރިސާއެއްގެ ތެރޭގައި އޮތް ޔަމަނަށް އެހީވުމަށް ބޭނުންވާ ފައިސާ ހޯދުމަށް ބޭއްވި ކޮންފަރެންސްގައި 2.6 ބިލިއަން ޑޮލަރު ދިނުމަށް ގައުމުތަކުން ވައުދުވެއްޖެ ކަމަށް އދ.ގެ އޮފިޝަލުން އަންގާރަ ދުވަހު ވިދާޅުވެއްޖެއެވެ.

މިއީ އުމުރުން ފަސް އަހަރުން ދަށުގެ 80،000 އަށް ވުރެ ގިނަ ކުޑަކުދިން މިހާރު ވެސް ބަނޑުހައި ހޫނުކަމުގައި މަރުވެފައިވާ ޔަމަނަށް މިހާރުން މިހާރަށް ހަތަރު ބިލިއަން ޑޮލަރު ބޭނުންވެ އެވެ. 

ސައުދީ އަރަބިއާއާއި ޔުނައިޓެޑް އަރަބް އެމިރޭޓްސްއަކީ އެންމެ ބޮޑު އެހީއެއްދިނުމަށް ވައުދުވީ ގައުމުތައް ކަމަށްވާއިރު އެެއިން ކޮންމެ ގައުމަކުންވަނީ 500 މިލިއަން އެމެރިކާ ޑޮލަރު ދިނުމަށް ވައުދުވެފައެވެ.  ނަމަވެސް މި ދެ ގައުމަކީވެސް ޔަމަނުގައި ހިނގަމުންދާ ހަނގުރާމައިގެ ބައިވެރިންނެވެ. މީގެ އިތުުރުން އެމެރިކާއާއި އިނގިރޭސި ވިލާތަކީވެސް އެ ހަނގުރާމައިގެ ބައިވެރިިންނެވެ.

ސައުދީ އަރަބިއާ އިސްވެ އޮވެ އުފައްދާފައިވާ ކޯލިޝަނުން 2015 ވަނަ އަހަރުން ފެށިގެންދަނީ ޔަަމަނުގެ ރައީސް އަބްދު ރައްބޫ މަންސޫރު ހާދީގެ ސަރުކާރުގެ ދިފާއުގައި އެ ގައުމުގެ ހޫޘީ ހަނގުރާމަވެރިންނަށް ވައިގެ މަގުން ހަމަލާދެމުންނެވެ.

ހޫޘީ ހަނގުރާމަވެރިން ވަނީ  ވެރި ރަށް ސަންއާ އާއި ހުދެއިދާގެ ބަނދަރާއި އަދި އެ ގައުމުގެ އިރުއުތުރުގެ ބޮޑުބައެއް ކޮންޓްރޯލްގެ ދަށަށް ގެންގޮސްފައެވެ.

އދ.ގެ ސެކްރެޓަރީ އެންޓޯނިއޯ ގުޓަރެސް އަންގާރަ ދުވަހުވަނީ އެހީ ދިން ގަލްފްގެ ގައުމުތަކަށް ތައުރީފްކުރައްވާފައެވެ.

"މިއީ އެހީ ދޭ ކޮންފަރެންސެެއް އަދި އެއްވެސް ގައުމަކުން ހަނގުރާމައިގަ އަދާކުރާ ދައުރަށް ބެލުމުގެ ބަދަލުގައި ބަލަނީ އެހީއަށް" ގުޓަރެެސް ވިދާޅުވިއެވެ.

ޔަމަނުގެ 24 މިލިއަން މީހުންގެ އާބާދީގެ ތެރެއިން 80 އިންސައްތަ މީހުންނަށް ވަނީ އިންސާނީ އެހީ ބޭނުންވެެފައިވާ މީހުންކަމަށް އދ.ގެ އޮފިޝަލުން މި ކޮންފަރެންސްގައި ވިދާޅުވިއެވެ.

ޔަަމަނުގެ 20 މިލިއަނެއްހާ ރައްޔިތުންނަކީ އަމިއްލައަށް ކާބޯތަކެއްޗަށް ބަރޯސާ ނުވެވޭ ބަޔަކަށްވާއިރު އޭގެ ތެރެއިން 10 މިލިއަނެއްހާ ރައްޔިތުން ތިބީ ބަނޑަށް ޖެހުމުގެ ފައްތަރެއްގައިކަމަށް އދގެ ހިސާބުތަކުން ދައްކައެވެ.

ފުނޑުފުޑުވަމުންދާ އިގްތިސާދާއެކު މިދިއަ އަހަރުން ފެށިގެން ވަނީ އިތުރު ދެ މިލިއަން މީހުން އިންސާނީ ކާރިސާގެ ތެރެެއަށް ވެއްޓިފައެވެ.

ހަނގުރާމައިގައި އެންމެ ބޮޑު އަސަރެއް ކޮށްފައިވަނީ ކުޑަކުދިންނަށެވެ. ސެކްރެޓަރީ ޖެނެރަލް ފާހަގަކުރެއްވި ރިޕޯޓެއްގައިވާގޮތުން އުމުރުން 5 އަހަރުން ދަށުގެ 80،000އަށްވުރެ ގިނަ ކުދިން ބަނޑުހައިހޫނުކަމުގައިވަނީ މަރުވެފައެވެ.

ޔުނިސެފުން ބުނާ ގޮތުގައި ސުކޫލަށް ދަނިކޮށް ނުވަތަ ގެއިން ބޭރުގައި ކުޅެން އުޅެނިކޮށް ނުވަތަ ހަނގުރާމައާއި ގުޅުންހުރި ކޮންމެވެސް ކަމެއްގައި ދުވާލަކަށް އަށް ކުދިން އެ ގައުމުގައި މަރުވަމުންދެއެވެ.