ފަލަސްތީނުގެ ރައީސް މަހްމޫދް އައްބާސްގެ އިސްތިއުފާއަށް ގޮވާލައި، ގިނަ އަދަދެއްގެ ބަޔަކު ޢައްޒާގައި މުޒާހަރާކޮށްފިއެވެ.
އާދިއްތަ ދުވަހު އައްބާސް އާއި ދެކޮޅަށް މުޒާހަރާ ކުރީ، ހަމާސް ޖަމާއަތަށް ދަތިކުރުމުގެ ގޮތުން މާލީ ފިއްތުންތައް ކުރިމަތި ކުރަން އޭނާ މަސައްކަތް ކުރެއްވުމާއި ގުޅިގެންނެވެ. މުޒާހަރާގެ ބައިވެރިން ވަނީ ޣައްޒާގައި މަސައްކަތް ކުރާ ސަރުކާރުގެ މުވައްޒަފުންގެ ހަމަ އުޖޫރަ ދިނުމަށް ވެސް ގޮވާލާފައެވެ. އަދި 2006 ގެ ފަހުން އެއްވެސް އިންތިހާބެއް ބާއްވާފައި ނުވާ ފަލަސްތީނުގައި އިންތިހާބުތައް ބޭއްވުމަށް ވެސް އެ މީހުން ވަނީ މުޒާހަރާގައި ގޮވާލާފައެވެ.
މީގެ އިތުރުން މުޒާހަރާގެ ބައިވެރިން ވަނީ އިޒްރޭލުން ޣައްޒާއަށް އަޅާފައިވާ ދަތިކުރުމުގެ ފިޔަވާޅުތައް އުވާލަން ވެސް ގޮވާލާފައެވެ. އިޒްރޭލުން ޣައްޒާއަށް ދަތިކުރުމުގެ ފިޔަވަޅު އަޅާފައި ވަނީ އެ ގައުމާ އެކު 2008ގެ ފަހުން ތިން ހަނގުރާމަތަކެއް ކޮށްފައިވާ ހަމާސް ޖަމާއަތަށް ހަތިޔާރާއި އެހެނިހެން ތަކެތި ހޯދޭނެ މަގު ހަނި ކުރުމުގެ ގޮތުން ކަމަށް އިޒްރޭލު ސަރުކާރުން ވަނީ ބުނެފައެވެ.
އައްބާސްއާ ދެކޮޅަށް މުޒާހަރާ ކުރި ވަގުތު، ހުޅަނގު އައްސޭރީގެ އެހެން އަވަށެއް ކަމުގައިވާ ހިބްރޫންގައި ބަޔަކު އޭނާއަށް ތާއީދުކޮށް މުޒާހަރާ ކޮށްފައި ވެއެވެ. އެ މީހުން ވަނީ ފަލަސްތީނާ ދެކޮޅަށް ގިނަ ފަރާތްތަކަކުން މަސައްކަތް ކުރަމުންދާ ދަނޑިވަޅެއްގައި، ހަމާސް އިން ވެސް ފަލަސްތީނުގެ ލާބަ އާއި މަންފާއަށް މަސައްކަތް ކުރަން ގޮވާލާފައެވެ.
ފަލަސްތީނުގެ ރައީސް މަހްމޫދު އައްބާސްގެ ދައުރު 2009ގައި ނިމިފައިވީ ނަމަވެސް، އޭގެ ފަހުން އިންތިހާބެއް ނުބާއްވައި އޭނާ އަދިވެސް ހުންނެވީ އެ މަގާމުގައެވެ. އައްބާސްގެ ފަތަހް ޖަމާއަތާއި ހަމާސްގެ ގުޅުން ގޯސްވީ، 2007 ވަނަ އަހަރު ވަރުގަދަ ކުރިމަތިލުންތަކަަކަށް ފަހު ޢައްޒާގެ ކޮންޓްރޯލް ހަމާސްއިން ނެގުމާއި ގުޅިގެންނެވެ. ދެ ފަރާތަށް އެއްބަސްވެވޭ ގޮތްތަކެއް ހޯދުމަށް މިހާތަނަށް ދެ ޖަމާއަތުން ކުރި މަޝްވަރާތައް ވަނީ ނާކާމިޔާބުވެފައެވެ.
