ޑާކާއިން ޑުބާއީއަށް ފުރި ބަނގްލަދޭޝްގެ ގައުމީ އެއާލައިން ބީމާންގެ ފްލައިޓެއް ހައިޖެކް ކޮށްފިއެވެ.

143 ފަސިންޖަރުންނާއި ޑާކާއިން ފުރި މި ފްލައިޓް ހައިޖެކް ކޮށްފައިވަނީ، އާދިއްތަ ދުވަހުގެ ހަވީރު ބަނގްލަދޭޝް ގަޑިން 4.35 ގައެވެ.

25 އަހަރުގެ ފިރިހެން މީހާ ފިސްތޯލައެއް ބޭނުންކޮށްގެން ފްލައިޓްގައި ތިބި މީހުންނަށާއި ޕައިލެޓަށް ބިރުދެއްކުމަށް ފަހު އެދުނީ، ބޮޑުވަޒީރު ޝެއިޚް ހަސީނާއާއި ވާހަކަދެއްކޭނެގޮތް ހަދައިދިނުމަށެވެ. އަދި އޭނާގެ އަންހެނުންނާއި ވާހަކަދެއްކޭނެ ގޮތް ހަދައިދިނުމަށް ވެސް އެދުނުކަމަށް ބައެއް ރިޕޯޓްތައް ބުނެއެވެ.

ރިޕޯޓްތައް ބުނާގޮތުން އެމީހާ ފިސްތޯލައިން ބިރުދެއްކުމަށް ފަހު ފްލައިޓްގެ ކޮކްޕިޓަށް ވަންނަން މަސައްކަތްކޮށް، ޕައިލެޓަށް ބިރުދެއްކިއެވެ.

އެ ފިރިހެން މީހާގެ ހަރަކާތްތަކަށް ޝައްކު ކުރެވިގެން ކަމާބެހޭ ފަރާތްތަކަށް ރިޕޯޓްކުރުމާއިއެކު  އެއާޕޯޓްތައް އެލާޓަށް ގެނެސް، ބޯޓް ފުރިތާ 40 މިނެޓް ތެރޭ ޗިޓަގޮންގް ޝާހު އަމާނަތު އިންޓަނޭޝަނަލް އެއާޕޯޓަށް އިމަޖެންސީގައި ފްލައިޓް ވަނީ ޖައްސާފައެވެ.

އަދި ވަގުތުން އެއާޕޯޓް އެލާޓަށް ގެނެސް، ފްލައިޓްގައި ތިބި ފަސިންޖަރުން ސަލާމަތްކުރިއެވެ. އަދި ހައިޖެކް ކުރި މީހާ އެގައުމުގެ ސަލާމަތީ ބާރުތަކުގެ ބެލުމުގެ ދަށަށް ގެންދިއުމަށް މަސައްކަތްކުރުމުން އޭނާ އެކަމަށް އެއްބާރުލުން ނުދިނުމުން އޭނާގެ ގަޔަށް ބަޑިޖެހިކަމަށް ރިޕޯޓްތައް ބުނެއެވެ. އަދި އޭނާ ހޮސްޕިޓަލަށް ގެންދެވުނު މަގުމަތީގައި ވަނީ މަރުވެފައެވެ.

ބައެއް ރިޕޯޓްތައް ބުނާ ގޮތުގައި ފްލައިޓް ހައިޖެކް ކުރި މީހާއަކީ ނަފްސާނީ މައްސަލަތަކެއް ހުރި މީހެކެވެ. އަދި އޭނާގެ އަންހެނުންނާއި މައްސަލަތަކެއް ޖެހިގެންއުޅޭކަމަށް ވެސް ބައެއް ރިޕޯޓްތަކުގައި ބުނެފައިވެއެވެ.