އުތުރު ކޮރެއާގެ ލީޑަރު ކިމް-ޖޮން އުން އެމެރިކާގެ ރައީސް ޑޮނަލްޑް ޓްރަމްޕް އާއި ބައްދަލު ކުރުމަށް ވިއެޓްނާމް އަށް ދަތުރު ފަށައިފި ކަމަށް ރިޕޯޓްތައް ބުނެފިއެވެ.
މި ބައްދަލުން ވެގެންދާނީ ކިމް އާއި ޓްރަމްޕްގެ ދެ ވަނަ ބައްދަލުވުމަށެވެ. މި ދެބޭފުޅުންގެ ތާރީހީ ބައްދަލުވުން ބާއްވާފައި ވަނީ މިދިޔަ އަހަރުގެ ޖޫން މަހުގެ 12 ވަނަ ދުވަހު ސިންގަޕޫރުގައެވެ.
މި މަހުގެ 27–28 އަށް ވިއެޓާންމްގެ ވެރިރަށް ހަނޯއީގައި ބާއްވާ ބައްދަލުވުމަށް ކިމް ދަތުރު ކުރަނީ ރޭލްގައެވެ. ހޮނިހިރު ދުވަހު ކިމްގެ ރޭލް އުތުރު ކޮރެއާގެ ޕިއޮންގްޔަންގް އިން ޗައިނާގެ ސިނޯ-ކޮރިއަން ފްރެންޑްޝިޕް ބުރިޖް ހުރަސްކޮށް ދަތުރުކޮށްފައި ދިޔަ ކަމަށް މަންޒަރު ދުށް މީހުންނާއި ހަވާލާދީ ރިޕޯޓްތައް ބުނެއެވެ.
ކިމްއަށް ވިއެޓްނާމް އަށް ފްލައިޓްގައި ދަތުރު ކުރެވެން އޮތަސް ވިއެޓްނާމްއިން ވަނީ ކިމް ދަތުރުކުރުމަށްޓަކައި ހާއްސަ ރޭލެއް އުތުރު ކޮރެޔާ އަށް ފޮނުވާފައެވެ.
ރިޕޯޓްތައް ބުނާގޮތުން ކިމް ދަތުރު ކުރާ ރޭލް މިހާރު ވަނީ ޗައިނާގެ ޑަންޑޮންގަށް ގޮސްފައެވެ. ކިމް ވިއެޓްނާމް އަށް ވަޑައިގަތުމުގެ ކުރިން ޗައިނާގެ ރައީސް ޝީ ޖިންޕިން އާއި ބައްދަލުކުރައްވާނެ ކަމަށް ލަފާކުރެވޭ ކަމަށް ރޮއިޓާސް އިން ރިޕޯޓްކުރެއެވެ. އެއަށްފަހު ކިމް ޗައިނާ އިން ވިއެޓްނާމް އަށް ދަތުކުރާނީ 170 ކިލޯމީޓަރު ކަނޑަތުކޮށް ކާރުގައެވެ.
ކިމް ވަޑައިގަންނަވާއިރަށް ވިއެޓްނާމްގެ ބޯޑަރު ކައިރީ ސަލާމަތީ ކަންތައްތައް ވަރުގަދަ ކޮށްފައިވާއިރު، ޗައިނާ އިން ވިއެޓްނާމް އަށް ދަތުރު ކުރާ މަގު ބަންދު ކުރާންވަނީ ހަމަޖެހިފައެވެ.
ޓްރަމްޕް އާއި ކިމްގެ ސަމިޓް ބާއްވަން ހަމަޖެހިފައިވަނީ ވެރިރަށް ހަނޯއީގެ ހޯން ކިއެމް ޑިސްޓްރިކްޓްގައި ހުންނަ އާސާރީ ގެސްޓް ހައުސްއެއްގައި ކަމަށްވެސް ރިޕޯޓްތައް ބުނެއެވެ.
ވިއެޓްނާމްގެ ރައީސްގެ ގުއެންހޫ ޓްރަންގެ ދައުވަތަކަށް ކިމް ވިއެޓްނާމްއަށް ވަޑައިގަންނަވާނެ ކަމަށް އެގައުމުގެ ފޮރިން މިނިސްޓްރީން ހޮނިހިރު ދުވަހު ކުރި ޓްވީޓެއްގައި ވަނީ ބުނެފައެވެ. ކިމްއާއި ޓްރަމްޕްގެ ބައްދަލުވުމާއި ބެހޭ ގޮތުން ރަސްމީކޮށް އެއްވެސް އެއްޗެއް ބުނެފައެއް ނުވެއެވެ.
At the invitation of the Gen.Sec. of the CPV/President of the SR of #VietNam, Nguyen Phu Trong, Chairman of the Workers' Party of Korea/Chairman of the State Affairs Commission of the DPRK, Kim Jong-Un, will pay an official friendly visit to Viet Nam in the coming days pic.twitter.com/wiEr51S15S
— MoFAVietNam Spokesperson (@PressDept_MoFA) February 23, 2019
މިފަހަރުގެ ބައްދަލުވުމުގައި މައިގަނޑު ގޮތެއްގައި މަޝްވާރާ ކުރަން ހަމަޖެހިފައި ވަނީ އުތުރު ކޮރެޔާ އިން ނިއުކުލިޔާ ހަތިޔާރު ނައްތާލުމާއި ބެހޭ ގޮތުންނެވެ. މިދިޔަ އަހަރު ޖޫން މަހު ކިމްއާއި ޓްރަމްޕް ބޭއްވި ބައްދަލުވުމުގައި އުތުރު ކޮރެޔާ އިން ނިއުކުލިޔާ ހަތިޔާރު އުފެއްދުން ހުއްޓަލާނެ ކަމަށް ކިމް އެއްބަސްވެވަޑައިގެންފައިވާ ކަމަށް ޓްރަމްޕް ވިދާޅުވިއެވެ. ނަމަވެސް އަދި މިހާތަނަށް ކޮރެޔާއިން ނިއުކުލިޔާ ހަތިޔާރު އުފެއްދުން އެއްކޮށް ހުއްޓަލާފައިއެއް ނުވެއެވެ.
