އަވަށްޓެރި ސްރީލަންކާގެ ޖެފްނާގައި އޮންނަ ކަންކެސަންތުރައި ޕޯޓް (ކޭކޭއެސް) ތަރައްގީ ކުރުމަށް އިންޑިއާއިން 48 މިލިއަން ޑޮލަރުގެ ކްރެޑިޓެއް އެހީ ހޯދަން ނިންމާފައިވާ ކަމަށް ލަންކާގެ ސަރުކާރުން ބުނެފިއެވެ.

 ޖެފްނާގައި އޮންނަ ކޭކޭއެސް ޕޯޓްއަކީ މަސްބޭނުމުގެ އިތުރުން ރިސޯޓް ހަބެއްގެ ގޮތުގައި ބޭނުން ކުރާ ތަނެކެވެ.

ނޯތް ޑިވެލޮޕްމެންޓްގެ ސެކެރެޓަރީ ވީ. ސިވަވަގަނޮސްތީ ލަންކާގެ ޑެއިލީ މިރާ އަށް ދިން އިންޓަވިއުއެއްގައި ވިދާޅުވީ، އިގްތިސާދީ ބޭނުންތަކަށް ޕޯޓު ތަރައްގީ ކުރުމުގެ މަސައްކަތް ކުރިޔަށް ގެންދިޔުމުގެ ހުއްދަ ކެބިނެޓުން ދީފައިވާ ކަމަށާއި، އެކަމުގެ އަމަލީ މަސައްކަތް މިހާރު ފަށާފައިވާ ކަމަށެވެ.

އެކަމާ ގުޅިގެން އިތުރަށް މަޝްވަރާ ކުރަން ޖެހޭ ކަންތައްތަކުގައި އިންޑިއާ ގުޅިގެން ކުރިޔަށް ގެންދާނެ ކަމަށް ވެސް އޮފިޝަލް ވިދާޅުވިއެވެ.  

މީގެ ކުރިން މި ޕޯޓް ބޭނުން ކޮށްފައި ވަނީ ބޮޑު ހަނގުރާމައިގެ ދުވަސްވަރު ކޮލަމްބޯ އިން ލަންކާގެ އުތުރު ސަރަހައްދަށް އެއްޗެހި ސަޕްލައި ކުރުމަށެވެ. އޭގެ ފަހުން އެއްޗެހި ސަޕްލައި ކުރި މަގު ވަނީ ބަންދުކޮށްފައެވެ.

މީގެ އިތުރުން ސިވަވަގަނޮސްތީ ވިދާޅުވީ، ޕަލަލީ އެއާޕޯޓް ތަރައްގީކޮށް އިންޓަނޭޝަނަލް ފްލައިޓް އޮޕަރޭޝަންސް އަށް ހުޅުވާލުމަށްޓަކައި ސަރުކާރުން ދެ ބިލިއަން ޑޮލަރު ހަރަދު ކުރަން ހަމަޖެހިފައިވާ ކަމަށެވެ. ދިގުމިނު ގައި 2600 މީޓަރުގެ ރަންވޭއެއް އޮންނަ މި އެއާޕޯޓްގައި އިތުރަށް 950 މީޓަރު މިހާރު ހަދާފައިވާ ކަމަށް ވެސް އޮފިޝަލް ވިދާޅުވިއެވެ. އަދި އޭގެ އިތުރުން ޓެކްސީވޭ އާއި އޭޕްރޯންސް ހެދުމަށް ސަރުކާރުގެ ބަޖެޓުން ދެ ބިލިއަން ރުޕީސް ހަރަދު ކުރަން ހަމަޖެހިފައިވާ ކަމަށް ވެސް އޭނާ ވިދާޅުވިއެވެ.

ދެވަނަ ބޮޑު ހަނގުރާމައިގެ ދުވަސް ވަރު ކަންކެސަންތުރައި ސަރަހައްދުގައި އިނގިރޭސިން ގެންގުޅޭ އުދުހޭ އުޅަނދުތައް ޖައްސަން ބޭނުން ކުރި އެ އެއާޕޯޓް ގިނަ ދުވަސްތަކެއް ވަންދެން ބޭނުންނުކޮށް އޮތުމަށް ފަހު ލަންކާގެ ޑިޕާޓްމެންޓް އޮފް ސިވިލް އޭވިއޭޝަނުން އެތަން ނަގައި އެއާޕޯޓްގެ ދަތުރުތައް ފަށާފައި ވަނީ 1947 ވަނަ އަހަރު ޑިސެމްބަރު މަހުގެ 10 ވަނަ ދުވަހުއެވެ.  

ނަމަވެސް މާ ގިނަ ދުވަސްތަކެއް ނުވާނީސް ތަމަޅަ ހަނގުރާމައިގެ ޖަމާއަތެއް ކަމަށްވާ އެލްޓީޓީ އިން ވަނީ އެއާޕޯޓަށް ނުފޫޒު ގަދަކޮށްފައެވެ.