ކިއުބާގެ ވެރިރަށް ހަވާނާއަށް ނަގޫރޯޅިއެއް އަރައި ތިން މީހަކު މަރުވެ، 175 މީހުންނަށް އެކި ވަރުގެ އަނިޔާ ލިބިއްޖެއެވެ.
މަދުން ނޫނީ ނަގޫރޯޅި ނާރާ، ކިއުބާއަށް އެރި ބާރުގަދަ ނަގޫރޯޅީގެ ސަބަބުން ހަވާނާގެ ބޮޑު ބަޔަކުން ކަރަންޓު ކަނޑައިގެން ދިޔުމުގެ އިތުރަށް، ގިނަ އަދަދެއްގެ އުޅަނދުފަހަރަށާއި މަގުމަތީގައި ހަރުކޮށްފައި ހުރި ބައްތިތަކަށާއި ގަސްތަކަށް ވަނީ ބޮޑެތި ގެއްލުންތަކެއް ލިބިފައިވެއެވެ.
އެ ގައުމުގެ ރައީސް މިގޭލް ޑިއާޒް-ކާނެލް ވަނީ ކަރަންޓު ކެނޑިފައިވާ ހިސާބުތަކަށް ކަރަންޓު ފޯރުކޮށް ދިނުމުގެ މަސައްކަތް ވަރަށް ބުރަކޮށް ކުރަމުންދާ ކަމަށް ވިދާޅުވެފައެވެ. ޑިއާޒް-ކާނެލް ވަނީ ގެއްލުން ލިބިފައިވާ ސަރަހައްދުތަކަށް ފަަތިސް ގަޑީގައި ޒިޔާރަތްކޮށް، އެ ސަރަހައްދުތަކުގައި މަސައްކަތް ކުރަމުން ދިޔަ ކުއްލި ހާލަތުގައި ހިދުމަތް ފޯރުކޮށްދޭ ފަރާތްތަކުގެ މަސައްކަތް ބައްލަވާލައްވާފައެވެ.
މި ނަގޫރޯޅި އަރަން މެދުވެރިވީ، ގަލްފް އޮފް މެކްސިކޯގައި އިން އުފެދިގެން އައި ތޫފާނެއްގެ ސަބަބުންނެވެ. މި ނަގޫރޯޅީގައި ގަޑިއަކު 100 ކިލޯމީޓަރުގެ ބާރުމިނުގައި ވައިޖެހިފައިވެއެވެ. މި ހިސާބުގަނޑަށް އަންނަ ތޫފާނުތަކުގެ ސަބަބުން މީގެ ކުރިން ވެސް ކިއުބާއަށް ބޮޑެތި ގެއްލުންތަކެއް ލިބިފައިވެއެވެ.
