ސައުދީ އަރަބިއާގެ މަޝްހޫރު ދީނީ އިލްމުވެރިޔާ އަދި މަދީނާގައި ހުންނަ ރަސޫލާ ﷺ މިސްކިތުގައި ޤުރުއާން ކިޔަވާ ވިދާޅުވަމުންގެންދެވި އަލް އަމާރީ ޖަލުގައި ބަހައްޓަވާފައިހުރި ދެރަވަރު ހާލަތުގެ ސަބަބުން އަވަހާރަވެއްޖެކަމަށް އެކްޓިވިސްޓުން ބުނެފިއެވެ.

މަދީނާގެ އިސްލާމިކް ޔުނިވަރސިޓީގެ ޤުރުއާން ކޮލެޖްގެ ކުރީގެ ޑީންކަންވެސް ކުރައްވާފައިވާ ޝެއިޚް އަހުމަދު އަލް އަމާރީ އަވަހާރަވެފައިވަނީ އާދީއްތަ ދުވަހުކަމަށް، ހައްޔަރުކުރެވޭ ސައުދީގެ ގާރީންނާއި ދީނީ އިލްމުވެރިންގެ ލިޔެކިއުންވެސް ބަލަހައްޓަމުން އަންނަ ޖަމާއަތެއްކަމަށްވާ ޕްރިޒަނަރސް އޮފް ކޮންޝަންސްއިން ބުނެފައިވެއެވެ.

އިލްމުވެރިންނާއި ގާރީންގެ ހައްގުތަކަށް ސޯޝަލް މީޑިއާގައި ގޮވާލަމުންދާ މި ގްރޫޕުން ތުހުމަތުކުރާ ގޮތުގައި އުމުރުފުޅުން 69 އަހަރުފުޅުގެ އަމާރީ އަވަހާރަވީ "ގަސްތުގައި އިހުމާލުވުމުން" ނެވެ.

ލަންޑަންގައި ގާއިމްވެފައިވާ ALQST އިން ބުނީ އަލް އަމާރީ ހައްޔަރު ކުރެވުވުނީ މިދިޔަ އަހަރުގެ އޯގަސްޓްމަހު އޭނާގެ ގެއިންކަމަށެވެ.

އެފަހަރު ހައްޔަރު ކުރެވުނު މީހުންގެ ތެރޭގައި އަމާރީގެ އަރިސް ދީނީ އިލްމުވެރިއެއްކަމަށްވާ ސަފަރް އަލް ހަވާލީ ހިމެނިވަޑައިގަންނަވައެވެ.

އުމުރުފުޅުން 68 އަހަރުގެ އަލް-ހަވާލީ ހައްޔަރުކޮށްފައިވަނީ ވަލީއަހުދު މުހައްމަދު ބިން ސަލްމާންއާއި ސައުދީގެ ޝާހީއާއިލާއިން އިސްރާއީލާއެކު ބާއްވާ ގުޅުމުގެ ވާހަކަވެސް ހިމެނޭގޮތުން 3،000 ސަފްހާގެ ފޮތެއް ޝާއިއުކުރުމާއި ގުޅިގެންނެވެ.