އުތުރު ކޮރެއާގެ ލީޑަރު ކިމް ޖޮންގް އުން އާއި، އެމެރިކާގެ ރައީސް ޑޮނަލްޑް ޓްރަމްޕްގެ ދެވަނަ ރަސްމީ ބައްދަލުވުން އަންނަ ފެބްރުއަރީ މަހު ބާއްވަން ހަމަޖެހިފައިވާ ކަމަށް ވައިޓް ހައުސްއިން އިއުލާންކޮށްފިއެވެ.
ހުކުރު ދުވަހު ނޫސްވެރިންނާއި ވާހަކަދައްކަމުން ވައިޓް ހައުސްގެ އޮފިޝަލްއަކު ބުނީ ބައްދަލުވުން ބާއްވާނެ ތާރީހާއި ތަން ފަހުގެ ތާރިހެއްގައި އިއުލާން ކުރާނެ ކަމަށެވެ. އެ ބައްދަލުވުން ބާއްވާން ޝޯޓްލިސްޓު ކުރެވިފައިވާ ގައުމުތަކުގެ ތެރޭގައި ވިއެޓްނާމް، ތައިލެންޑް އަދި ހަވާއީ ހިމެނެއެވެ.
އެ ބައްދަލުވުން އޮންނާނެ ކަން އިއުލާން ކުރެއްވީ، ކުރީގެ އުތުރު ކޮރެއާގެ ޖާސޫސީ އިދާރާގެ ވެރިޔާ އަދި މިހާރު ނިއުކްލިއަރ މައްސަލައިގެ މަޝްވަރާއާ ހަވާލުވެގެން ހުންނެވި އެންމެ އިސް ފަރާތް ކަމުގައިވާ ކިމް ޔޮންގް ޗޮލް، ޓްރަމްޕާ އެކު އޯވަލް އޮފީހުގައި ބޭއްވި 90 މިނިޓުގެ ބައްދަލުވުމަކަށް ފަހުގައިއެވެ.
ކިމް އާއި ޓްރަމްޕް ބައްދަލުކުރައްވާނެ ކަން އިއުލާން ކުރައްވާފައި މި ވަނީ، ދުވަސްތަކެއް ވަންދެން ދެ ގައުމުގެ ދެމެދުގައި ބަހުގެ ހަމަލާތަކެއް ބަދަލުކުރެވުމަށް ފަހުގައެވެ.
ޓްރަމްޕާއި ކިމް ފުރަތަމަ ބައްދަލުކުރެއްވީ 2018 ވަނަ އަހަރުގެ ޖޫން މަހުގައި ސިންގަޕޫރުގައެވެ. އެ ފަހަރުގެ ބައްދަލުމުވުމަށް ފަހު އުތުރު ކޮރެއާއިން ނިއުކްލިއަރ ހަތިޔާރު އުފެއްދުން ހުއްޓާލާނެ ކަމަށް ބުނި ނަމަވެސް، އެމެރިކާގެ ޖާސޫސީ އިދާރާތަކުން ބުނެފައި ވަނީ، އުތުރު ކޮރެއާ އިން އަދިވެސް ނިއުކްލިއަރ ހަކަތައާއި، ހަތިޔާރާއި މިސައިލް އުފެއްދުން ހުއްޓާލާފައި ނުވާ ކަމަށެވެ. އުތުރު ކޮރެއާއިން ބުނަނީ ނިއުކްލިއަރ ހަތިޔާރު އުފެއްދުން ހުއްޓާލާނީ އެމެރިކާއިން އަޅާފައި ހުރި ދަތިކުރުމުގެ ފިޔަވަޅުތައް އުވާލުމުން ކަމަށެވެ.
