އދ. ގެ ވާރލްޑް ފުޑް ޕްރޮގްރާމުން ފަލަސްތީނަށް ވަމުން އައި އެހީ، ފައިސާގެ ދަތިތަކާ ގުޅިގެން ވަގުތީ ގޮތުން މެދުކަނޑާލައިފިއެވެ.

މި ކަމުގެ ސަބަބުން ޣައްޒާ އާއި ހުޅަނގު އައްސޭރީގައި ދިރިއުޅޭ، 27000 މީހުންނަށް ޖެނުއަރީ 1 ގެ ފަހުން އެހީ ދިނުން ހުއްޓާލާފައިވާ ކަމަށް ޑަބްލިޔުއެފްޕީ އިން ފަލަސްތީނަށް ކަނޑައަޅާފައިވާ ޑިރެކްޓަރު ސްޓެފަން ކިއަރނޭ ވަނީ ބުނެފައެވެ.

ފަންޑިން ނުލިބިގެން އެ ޖަމިއްޔާ އިން ކުރި މަސައްކަތުން ޔޫރަޕުގެ އިއްތިހާދުންނާއި ސްވިޒަލެންޑުން އިތުރު އެހީ ފޯރުކޮށްދީގެން ވެސް ބޭނުންވާ ވަރަށް ފައިސާ ހަމަވެފައި ނުވާ ކަމަށް ކިއަރނޭ ވަނީ ބުނެފައެވެ. އޭނާ ބުނީ މި ވަގުތަށް އެކަނި ވެސް 57 މިލިއަން ޑޮލަރު ބޭނުންވާ ކަމަށާއި، މި ފައިސާ އެހެން ގައުމުތަކުން ހޯދުމުގެ މަސައްކަތް ކުރާނެ ކަމަށެވެ.

އެހީ ކަނޑަލުމާ ގުޅިގެން އެ ހިސާބުތަކުގެ އިގްތިސާދަށް ވެސް ބުރޫއަރާނެ ކަމަށް ބެލެވޭ ކަމަށް ކިއަރނޭ ވަނީ ބުނެފައެވެ. މި ހިސާބުތަކުގެ މީހުން ފިހާރަތަކުން ވިޔަފާރި ކުރަން ގެންގުޅެނީ ޑަބްލިޔުއެފްޕޭ އިން ފޯރުކޮށްދީފައިވާ ކާޑުތަކެކެވެ.

ފަންޑިންގައި މިހާ ބޮޑު ދަތިތަކެއް ކުރިމަތިވެފައި މި ވަނީ، އެމެރިކާ އިން ފަލަސްތީނަށް ދެމުން އައި 500 މިލިއަން ޑޮލަރުގެ އެހީ ކަނޑާލަން ރައީސް ޑޮނަލްޑް ޓްރަމްޕް ނިންމެވުމާއި ގުޅިގެންނެވެ.

ހުޅަނގު އައްސޭރީގައި ދިރުއުޅޭ 2 މިލިއަން މީހުންގެ ތެރެއިން 80 އިންސައްތަ މީހުންނަކީ ބައިނަލްއަގްވާމީ އެހީއަށް ބަރޯސާވެގެން ދިރިއުޅޭ މީހުންނެވެ.