އިންޑިއާގެ ބޮޑުވަޒީރު ނަރެންދުރަ މޯދީއާ ދެކޮޅަށް ކުރިޔަށް އޮތް އާއްމު އިންތިހާބުގައި ކޯލިޝަން ހަދައިގެން މަސައްކަތް ކުރުމަށް ސަމަޖްވާދީ ޕާޓީ (އެސްޕީ) އާއި ބަހުޖާން ސަމާޖް ޕާޓީ (ބީއެސްޕީ) އިން ނިންމައިފިއެވެ.
މި ދެ ޕާޓީ ނިސްބަތްވާ އުއްތަރު ޕްރަދޭޝްއިން ގާނޫނު ހަދާ މަޖިލީހުގެ ތިރިގެއަށް 80 މެމްބަރުން ހޮވާއިރު، އެ ސްޓޭޓަށް ނިސްބަތްވާ ނުވަ ބޭފުޅަކު ވަނީ އިންޑީއާގެ ބޮޑުވަޒީރުކަން ކުރައްވާދައެވެ
ހޮނިހިރު ދުވަހު އެ ސްޓޭޓްގެ ވެރިރަށް ލަކްނޯގައި ސަމަޖްވާދީ ޕާޓީގެ ލީޑަރު އަކިލޭޝް ޔާދަވްއާއި ބަހުޖާން ސަމާޖް ޕާޓީގެ ލީޑަރު ކުމާރީ މަޔާވަތީ ވަނީ ދެ ޕާޓީ ގުޅިގެން ގާނޫނުހަދާ މަޖިލީހުގެ 76 ގޮނޑިއަކަށް ކުރިމަތިލާން ނިންމައިފައިވާ ކަމަށް އިއުލާންކޮށްފައެވެ.
އެ ބައްދަލުވުމުގައި މަޔާވަތީ ވިދާޅުވީ މި ކޯލިޝަންގެ ސަބަބުން ވެރިކަން ކުރާ ބީޖޭޕީގެ ލީޑަރު އަމިތް ޝާހްއަށާއި މޯދީއަށް ކުރިޔަށް އޮތް ތާނގައި "ނިދި ނުލިބި" ގިނަ ރޭތަކެއް ހޭދަކުރަން ޖެހޭނެ ކަމަށެވެ. އަދި މިއީ ގައުމަށް އަންނަ އައު ސިޔާސީ އިންގިލާބެއް ކަމުގައި ވެސް މާޔާވަތީ ވަނީ ސިފަކުރައްވާފައެވެ.
އެސްޕީގެ ލީޑަރު ޔާދަވް ވިދާޅުވީ ގުޅިގެން މަސައްކަތް ކުރަން ނިންމީ ބީޖޭޕީއިން ހިންގަމުން އަންނަ ބޭއިންސާފުވެރި ކަންކަން ނިމުމަކަށް ގެނައުމަށް ކަމަށެވެ. މި ދެ ލީޑަރުންނަކީ ވެސް ކުރިން އެ ސްޓޭޓްގެ ޗީފް މިނިސްޓަރުކަން ކުރައްވާފައިވާ ދެ ބޭފުޅުންނެވެ.
މި ސަރަހައްދުގައި މި ދެ ޕާޓީއަށް އޮތް ތާއީދު ބޮޑުކަމުން، މާހިރުން ބުނެފައިވަނީ މި އިއްތިހާދުގެ ސަބަބުން ބީޖޭޕީއަށް ވަރުގަދަ ހުރަސްތަކެއް ކުރިމަތި ވާނެ ކަމަށެވެ. މިހާރު އުއްތަރު ޕްރަދޭޝްގައި ވެރިކަން ކުރަނީ ބީޖޭޕީއިންނެވެ.
