ވެނެޒުއޭލާގެ ރައީސް ނިކޮލަސް މަޑޫރޯ ދެވަނަ ދައުރަކަށް މަގާމުގައި ހުންނެވުމާއި ދެކޮޅުހެއްދެވުމުގެ ގޮތުން އެ ގައުމުގެ ސުޕްރީމް ކޯޓުގެ ފަނޑިޔާރު ކްރިސްޓިއަން ޒެޕްރާ ފިއްލަވައިގެން އެމެރިކާއަށް ވަޑައިގެންފިއެވެ.
މިދިޔަ އަހަރު ބޭއްވި އިންތިޚާބަކީ "ވާދަވެރި މިނިވަން އިންތިޚާބެއް ނޫން" ކަމަށް ކުރިން މަޑޫރޯއަށް ވަފާތެރި ފަނޑިޔާރު ފްލޮރިޑާ ރޭޑިއޯގައި ވިދާޅުވިއެވެ.
މީގެ އިތުރުން އޭނާވަނީ ނިޒާމުގެ ތެރެއިން ސުޕްރީމް ކޯޓުގެ އިހްތިސާސަށް މަޑޫރޯ ނުފޫޒު ފޯރުއްވާކަމަށްވެސް ވަނީ ތުހުމަތުކުރައްވާފައެވެ.
ޒެޕްރާއަށް ރައްދުދީ އެ ގައުމުގެ ސުޕްރީމް ކޯޓުން ބުނެފައިވަނީ އޭނަ ފިއްލެވީ ޖިންސީ ފުރައްސާރައިގެ ތުހުމަތުންކަމަށެވެ.
އިދިކޮޅު ޕާޓީތަކުންވަނީ 2018 ގެ އިންތިޚާބަކީ މަލާމާތެއްކަމަށްބުނެ އިންތިޚާބު ބޮއިކޮޓް ކޮށްފައެވެ.
ސުޕްރީމް ކޯޓުގައި ޒެޕްރާ ވެގެން ގޮސްފައިވަނީ މަޑޫރޯއަށް ދެކޮޅު ރައުޔުތަައް ނެރުއްވާ ބޭފުޅެއްގެ ގޮތުގައެވެ. ގާނޫނުހަދާ މަޖިލީހުގެ ބާރުތައް ކަނޑުވާލުމަށް 2016 ވަނަ އަހަރު މަޑޫރޯ ނިންމެވި ނިންމެވުމުގައިވެސް ޒެޕްރާއަކީ އެ މައްސަލައިގައި ގާނޫނީ ރައުޔު ތަފާތު ބޭފުޅެކެވެ.
މަޑޫރޯގެ ސޯޝަލިސްޓް ޕާޓީއަށް އެ އަހަރުގެ ކުރީކޮޅު ބޭއްވި ގާނޫނުހަދާ މަޖިލީހުގެ އިންތިޚާބު ނާކާމިޔާބުވެ އިދިކޮޅުންވަނީ ބޮޑުތފާތަކުން އިންތިޚާބު ކާމިޔާބުކޮށްފައެވެ.
