ހެލިކޮޕްޓަރެއް ވެއްޓި ގޮވުމުގެ ސަބަބުން އެއިން ދަތުރުކުރި މެކްސިކޯގެ ގަވަރުނަރާއި އޭނާގެ ފިރިކަލުން މަރުވެއްޖެއެވެ.
ހޯމަ ދުވަހު ހިނގި މި ހާދިސާގައި ގަވަރުނަރ މާރތަރ އެލިކާ އެލޮންސޯ މަރުވެފައިވާއިރު، އޭނާ ގަވަރުނަރ ކަމަށް އައްޔަނުކޮށްފައި ވަނީ 14 ޑިސެމްބަރ 2018 ގައެވެ.
އެލިކާ މަރުވެއްޖެކަން އެ ޤައުމުގެ ޚާރިޖީ ވަޒީރު ކަށަވަރު ކޮށްދެއްވާފައިވާއިރު، އެ ހާދިސާގައި މަރުވި އޭނާގެ ފިރިމީހާ ރަފޭލް މޮރީނޯއަކީ 2011 އިން ފެށިގެން 2017 އަށް އެޤައުމުގެ ގަވަރުނަރުކަން ކޮށްފައިވާ ބޭފުޅެކެވެ.
އެ ހާދިސާގައި ހެލިކޮޕްޓަރުން ދަތުރުކުރި ދެ ޕައިލެޓާއި އެސިސްޓެންޓް ވެސް މަރުވެފައިވާކަން އެ ޤައުމުގެ ޚާރިޖީ ވަޒީރު ވަނީ ކަށަވަރުކޮށްދެއްވާފައެވެ.
އެ ހާދިސާއާ ހިނގަން މެދުވެރިވި ސަބަބެއް އަދި ދެނެގަނެވިފައި ނުވާއިރު، އެކަމާ ގުޅިގެން މެކްސިކޯގެ ރައީސް އަންދްރެސް މަނުއެލް ލޮޕޭޒް އޮބްރާދޯ ވަނީ އެލިކާ އާއި ރަފޭލްގެ އާއިލާއަށް ތައުޒިޔާ ކިޔުއްވާފައެވެ. އަދި އެ ހާދިސާ އެ ޤައުމުގެ ސަރުކާރުން ބޮޑު އިސްކަމެއް ދީގެން ތަހުޤީޤުކުރާނެ ކަމަށް ވެސް ވަނީ ވިދާޅުވެފައެވެ.
